2005eko apirilean, maiatzean eta ekainean 2.980 ezkontza kontatu ziren Euskal AEn, aurreko urteko hiruhileko berean baino %3 gutxiago, Eustaten datuen arabera. Lurraldez lurralde, bizkaitarrek 1.500 ezkontza ospatu zituzten, gipuzkoarrek 980 eta arabarrek 385. Euskal AEz kanpo bizi direnen kasuan, ezkontzak 115 izan ziren.

Ezkontza zibilak gehitu egin ziren

Aurreko hiruhilekoan, ohi bezala, ezkontza gutxi ospatu ziren, baina 2005eko bigarren hiruhileko honetan, berriz, nabarmen igo ziren ospakizunak maiatzean eta ekainean. Beste alde batetik, tarte honetako ezkontzen %42,2 ezkontza zibilak izan ziren, 2004ko aldi berean baino ehuneko puntu 1 gehiago. Era berean, proportzio hori 2005eko aurreneko hiruhilekoan baino nahiko txikiagoa da, aldi hartako ezkontzen %73,8 zibilak izan baitziren.

2005eko bigarren hiruhileko horretako 2.980 ezkontzetan, bizilekua Euskal AEn duten 2.878 gizonezko eta 2.942 emakumezko ezkondu ziren. Horietatik 2.689 senarrentzat (%93,4), lehen ezkontza izan zen; 24 alargun eta 165 dibortziatu, aldiz, berriro ezkondu ziren. Lehen ezkontza zuten emakumeen ehunekoa gizonezkoena baino zertxobait altuagoa izan zen: aurretik ezkongabeak ziren emakumeak 2.773 (%94,3) izan ziren; alargunak, 6; eta dibortziatuak, 163.

Apur bat jaitsi zen emazteen adina

Ezkontideek eztei-egunean zuten adinari erreparatuta, senarren artean, %68,9k 30 urtetik gora zituzten; emazteen artean, berriz, %49,2k. Emazteen adina apur bat jaitsi zela ikusten da, 2004ko bigarren hiruhilekoan 30 urtetik gorako emakumeen proportzioa (%51,4) ehuneko-puntu 2 handiagoa izan baitzen.