EUSTATen datuen arabera, eta lan-egutegi homogeneoari dagokionez, Euskal Autonomia Erkidegoko industri produkzioa 2005eko otsailaren aldean %8,0 hazi da 2006ko otsailean. Urteko lehenengo bi hilabeteetako hazkundea %9,1ekoa izan da, 2005eko aldi beraren aldean Industri produkzioaren urte arteko portaera horretan lagundu dute energiaren sektoreko jarduera berrien sustapenak eta ekipamenduko ondasunen ekarpen garrantzitsuak.

2006ko otsailean, eta 2006ko urtarrilaren aldean, Euskal Autonomia Erkidegoko industri produkzioa %0,6 murriztu da baina estazionalitate-ondorioak zuzendu ostean. Urtarrilean, alabaina, hil arteko tasa hori %1,3 hazi zen.

Sektoreen araberako bilakaera

Sektoreen arabera, eta industri sektore nagusienak sailkatu ostean, 2006ko otsaileko indizearen bilakaera hazi egin da sektore guztietan, 2005eko otsailaren aldean: energia (%29,1), ekipamenduko ondasunak (%12,0), tarteko ondasunak (%2,3) eta kontsumo-ondasunak (%3,9). Azken hauetan bi atal bereiz daitezke: kontsumo-ondasun iraunkorrak, urte arteko %2,4ko hazkundea izan dutenak, eta kontsumo-ondasun ez iraunkorrak, %4,6ko hazkundea izan dutenak.

2006ko otsaileko hil arteko aldaketak, 2006ko urtarrilaren aldean, positiboak izan dira hurrengo sektoreetan: energia (%1,2) eta kontsumo-ondasunak (%0,9); azken hauen artean, gainera, kontsumo-ondasun ez iraunkorrak hil artean %1,9 hazi dira baina kontsumo-ondasun iraunkorrak hil arte berean %1,1 murriztu dira. Bestalde, ekipamenduko ondasunek eta tarteko ondasunek hil artean %-2,0 eta %-0,4ko tasa negatiboak izan dituzte hurrenez hurren.

Lurralde Historikoen araberako bilakaera

Lurralde historikoen arabera, Industri Produkzioaren Indizearen urte arteko bilakaerak positiboak izan dira sektore guztietan; izan ere, Araban %14,4 hazi da, Bizkaian %8,6 eta Gipuzkoan %3,9.

Lurraldeetako hil arteko hazkunde-tasei dagokienez (2006ko otsailekoak, 2006ko urtarrilaren aldean) bilakaera ezberdinak eman dira aipatu aldian: Araban %0,6 hazi da tasa hori hil artean baina Bizkaian (%0,7) eta Gipuzkoan (%1,1) tasa horrek behera egin du.