2010-04-29ko prentsa-oharra
Euskal AEko osasuneko aseguruek prima eta aseguratu gehiago izan zituzten
Aseguratu gehiago izan zen mediku-aseguru kolektiboei esker
Eustaten datuen arabera, Euskal AEn jarduten duten aseguru libreko entitateek (ALEN) 2008. urtean 220 milioi euro inguru bildu zituzten osasun asistentziarako primen bidez, aurreko urtean baino %9,3 gehiago. Guztira 369.017 aseguratu izan zituzten. Dagoeneko kaltegarria zen testuinguru ekonomikoan, osasuneko aseguruen sektoreak prima eta aseguratu gehiago izan zituen 2008. urtean.
ALENek 219,8 milioi euroko primak aitortu zituzten, Estatu osoko prima guztien bolumenaren %4 eta Euskal AEko BPGren %0,3. Hazkunde tasa (%9,3), gainera, Estatu osokoa (%8,3) baino altuagoa izan zen. Hazkunde horren arrazoietako batzuk honakoak izan ziren: kolektibo jakin batzuei egokitutako eta enpresentzako (zerga abantailekin) mediku-aseguruen eskaintza, eta estalduren handitzea.
Osasun asistentziaren adarreko aseguratu kopurua 369.017 pertsonakoa izan zen (2007an baino ia 23.000 gehiago), hau da, Euskal AEko biztanleen %17. Poliza motaren arabera, aseguru kolektiboen modalitatean (enpresak eta beste kolektibo jakin batzuk) aseguratuen %45,8 izan zen; kopuru horrek banakoen eta familien kopurua (aseguratuen %43,2) eta mutualitate publikoena (%11) gainditu zituen.
Aurreko urtearekin alderatuta, aseguratu kopurua %6,6 igo zen. Banakoen eta familien aseguruetan egon den baja kopurua gorabehera, mediku-aseguru kolektiboen kontratazioak 2008. urtean gora egin zuen eta horri esker aseguratu kopurua ere igo eta aseguratu kopuru handiena zuen aseguru modalitatea bihurtu zen.
Aseguratu gehienek (%94) izan zuten kontratatuta osasun asistentzia orokorra estaltzeko mediku-asegurua, lehen mailako arreta eta ospitaleko asistentzia estaltzen zituena. Aseguratuen %6ak, aldiz, arreta bereziko poliza kontratatu zuen (lehen mailako arreta, arreta espezializatua edo hortzetako zerbitzua).
Guztira 1.299.156 mediku-kontsulta, 52.818 ospitaleratze eta 154.563 egonaldi izan ziren. Kopuru horiek erakusten dute osasun asistentziarako aseguruen sektorean asistentziari lotutako jarduerak neurrizko hazkundea izan zuela. Aurreko urtearen aldean, mediku-kontsultek %1,1 egin zuten gora eta bisita gehien izan zuten espezialitateak hauek izan ziren: traumatologia, tokoginekologia eta pediatria. Ospitaleratzeen kopuruak %1,2 egin zuen gora, 2007. urtearekin alderatuta; batez besteko egonaldia 3 egun ingurukoa izan zen eta kirurgia orokorra, barne-medikuntza eta traumatologia izan ziren ospitaleetako arreta gehiena hartu zuten espezialitateak.
Ohar metodologikoa: estatistika honetan jasotako informazioa Euskal AEn establezimenduren bat duten asistentzia mediko-farmazeutikoko aseguru libreko entitateei buruzkoa da.
2006 eta 2007 urteetako datuak berrikusi dira eta, ondorioz, eguneratu egin dira.
Argibide gehiago:
Euskal Estatistika-Erakundea / Instituto Vasco de Estadística
Donostia-San Sebastian kalea, 1 01010 Vitoria-Gasteiz
Tel.:+34-945-01 75 00 Faxa: +34-945-01 75 01 Helb. elek.: eustat@eustat.es
Harremanetarako pertsona: Marta de la Torre Fernández
Tel.:+34-945-01 75 48 Faxa:+34-945-01 75 01
Asistentzia mediko-farmazeutikoko aseguru libreko entitateei buruzko prentsa-ohar gehiago
Asistentzia mediko-farmazeutikoko aseguru libreko entitateei buruzko datu-bankua