2003ko azaroan, % 0,1 urritu zen Euskal AEko Eraikuntzaren Kostuen Indizea, aurreko hilaren aldean, eta, horrenbestez, hil horretako urte arteko tasa % 2,5ekoa da, Eustatek eskainitako datuen arabera. Urteko lehenengo hamaika hilabeteko tasak, aurreko abenduaren gainean, % 2,4ko igoera izan du.

Urte arteko aldian (2003ko azaroa, 2002ko azaroaren gainean), lan-eskuaren kostua % 5,8 handitu da; lehengaien kostuak, berriz, % 0,2 hazi dira.

Eraikuntza eta obra zibila azpisektoreek antzeko bilakaera izan dute. Biek hala biek % 0,1eko gutxitzea izan dute, aurreko hilaren gainean. Azpisektore bi horien urte arteko bilakaerari begiratuz gero, ikusiko dugu biak hazi direla, neurri berean ez bada ere: eraikuntzako kostuak % 2,3 hazi dira, eta obra zibilekoak, aldiz, % 3,1.

Sektoreak kontsumitutako lehengaien artetik, 2003ko azaroan, hauek izan dira inflazio-tasarik handienekoak: energia elektrikoa (% 1,6), garbitzeko eta txukuntzeko materialak (% 0,7), plastikozko hoditeria (% 0,7), bulegoko materiala (% 0,5) eta burdina eta altzairua (% 0,4). Aitzitik, hileko batez besteko prezioetan murrizketak izan dituzte laneko arropak (% -3,9), karea, igeltsua eta eskaiola (% -2,6), beira (% -1,8) eta leherkariak eta gasak (% -1,3) lehengaiek.