2003ko irailean, bere horretan mantendu zen Euskal AEko Eraikuntzaren Kostuen Indizea (% 0,0), aurreko hilaren aldean, eta, horrenbestez, hil horretako urte arteko tasa % 2,3koa da, Eustatek eskainitako datuen arabera. Urteko lehenengo bederatzi hilabeteko tasak, aurreko abenduaren gainean, igoera berdina izan du: % 2,3koa, alegia.

Urte arteko aldian (2003ko iraila, 2002ko irailaren gainean), lan-eskuaren kostua % 5,8 handitu da; lehengaien kostuak, berriz, % 0,1 txikitu dira.

Eraikuntza eta obra zibila azpisektoreek ez dute zeinu bereko bilakaera izan euren guztizko kostuetan: eraikuntzako kostuak % 0,1 goratu dira aurreko hilaren aldean, eta obra zibilekoak, ostera, % 0,2 beheratu dira joan den abuztuaren aldean. Azpisektore horien urte arteko bilakaerari begiratuz gero, ikusiko dugu, hazkundeari dagokionez, badela bien artean aldetxo bat: eraikuntzako kostuak % 2,2 hazi dira, eta obra zibilekoak, aldiz, % 2,6.

Sektoreak kontsumitutako lehengaien artetik, 2003ko irailean, hauek izan dira inflazio-tasarik handienekoak: asfaltozko produktuak (% 5,4), metalezko hodiak (% 1,0), karea, igeltsua eta eskaiola (% 1,0), makineriarako osagarriak (% 0,6), olioak eta koipeak (% 0,5) eta pinturak eta bernizak (% 0,3). Aitzitik, hileko batez besteko prezioetan murrizketak izan dituzte petroliotik eratorriak (% -4,7), ), garbitzeko eta txukuntzeko materialak (% -2,1), leherkariak eta gasak (% -0,8) eta ateratze-agregatuak (% -0,3) lehengaiek.