2003ko urrian, Euskal AEko Eraikuntzaren Kostuen Indize Orokorra %0,1 igo zen, aurreko hilaren aldean, eta urrirako urte arteko tasa %2,5era iritsi zen, EUSTATen datuen arabera. Urteko lehenengo hamar hilabeteko tasak, aurreko abenduaren gainean, igoera berdina izan du: % 2,5ekoa, alegia.

Urte arteko aldian (2003ko urria, 2002ko urriaren gainean), lan-eskuaren kostua % 5,8 handitu da; lehengaien kostuak, berriz, % 0,2.

Eraikuntza eta obra zibila azpisektoreek zeinu bereko bilakaera izan dute euren guztizko kostuetan: eraikuntzako kostuak % 0,1 goratu dira aurreko hilaren aldean, eta obra zibilekoak, ostera, % 0,2, joan den irailaren aldean. Azpisektore horien urte arteko bilakaerari begiratuz gero, ikusiko dugu, hazkundeari dagokionez, biak hazi arren, badela bien artean aldetxo bat: eraikuntzako kostuak % 2,4 hazi dira, eta obra zibilekoak, aldiz, % 2,8.

Sektoreak kontsumitutako lehengaien artetik, 2003ko urrian, hauek izan zituzten inflazio-tasarik handienak: garbitzeko eta txukuntzeko materialak (%2,5), asfalto-produktuak (%2,4), petroliotik eratorritakoak (%1,8) eta plastikozko hoditeria (%1,4) lehengaiek. Aitzitik, hileko batez besteko prezioetan murrizketak izan dituzte karea, igeltsua eta eskaiola (%-0,3), olioak eta koipeak (%-0,3), bestelako metalezko artikuluak (%-0,2), leherkariak eta gasak (%-0,1) eta beira (%-0,1) lehengaiek.