EUSTATek egiten duen Jaiotzen Estatistikako 2004ko bigarrren hiruhilekoko datuetan, 4.908 jaio ageri ziren, hots, aurreko urteko aldi berean baino %2 gutxiago. Lurraldez lurralde, Araban 724 haur jaio ziren, Bizkaian 2.548, eta Gipuzkoan 1.636.

Jaiotza-hurrenkeraren arabera, 2004ko bigarren hiruhilekoan jaioen erdiak baino gehiago, hots, 2.767 ume, lehenengo seme-alabak izan ziren; 1.826 ume (%37,2) aurretik beste bat zegoen familietara iritsi ziren; eta hirugarren eta ondorengo seme-alabak %6,4ra iritsi ziren. Araban (%45,2), bigarren eta ondorengo seme-alaben kopurua Euskal AEko batez bestekoa (% 43,6) baino handiagoa izan zen, eta hori lurralde historiko horretan baino ez zen gertatu.

Lau jaiotzatik hirutan amak 30 urtetik gora zituen

Jaiotzak amaren adinaren arabera banatzen baditugu, ikusiko dugu 3034 urteko amen taldea oraindik ere nagusi dela, eurak baitira erditzen direnen ia erdiak. Ondoren, goragoko taldea dago, hau da, 3539 urte artekoa (%25,6) eta 2529ko taldea beherago geratu da, erditzeen %18,5 ekarri baititu. Muturreko adinak dituzten taldeetan, 25 urtez behera amatu zirenak %5,3 izan ziren, eta 40 urtez gorakoen taldeak, berriz, jaiotzen %3,9 besterik ez zuen ekarri.

Ezkontzaz kanpo jaioek guztizkoaren %21,2 hartu zuten eta puntu bat igo ziren 2003ko bigarren hiruhilekoaren aldean. Araba (%19,8) izan zen Euskal AE osoko balioa baino txikiagoa izan zuen lurralde bakarra. Talde horren erditze-adina haurrak eduki zituzten amen multzo osoarena baino txikiagoa izan zen. Izan ere, ama ezkongabeen %17,8 14 eta 24 urte bitartekoak izan ziren.