2004ko apirilean, maiatzean eta ekainean 3.002 ezkontza kontatu ziren Euskal AEn, aurreko urteko hiruhileko berean baino %3,1 gutxiago, Eustaten datuen arabera. Lurralde historikoka, bizkaitarrek 1.476 ezkontza ospatu zituzten, gipuzkoarrek 993 eta arabarrek 397. Euskal AEz kanpo bizi direnen kasuan, ezkontzak 136 izan ziren.

Ezkontza zibilak gehitu egin ziren

Aurreko hiruhilekoaren aldean, hiruhileko honetan ezkontza gehiago izan ziren, maiatzean eta ekainean izaten direlako ezkontza gehien. Beste alde batetik, tarte honetako ezkontzen %41,4 ezkontza zibilak izan ziren, eta portzentaje hori 2003ko aldi berekoa baino ia 7 puntu handiagoa da. Era berean, proportzio hori 2004ko aurreneko hiru hilabeteetan baino nahiko txikiagoa da, aldi hartako ezkontzen %64,5 zibilak izan baitziren.

2004ko bigarren hiruhileko horretako 3.002 ezkontzetan, bizilekua Euskal Autonomia Erkidegoan duten 2.891 gizonezko eta 2.951 emakumezko ezkondu ziren. Horietatik 2.696 senarrentzat (%93,3), lehen ezkontza izan zen; 16 alargun eta 179 dibortziatu, aldiz, berriro ezkondu ziren. Lehen ezkontza zuten emakumeen ehunekoa gizonezkoena baino zertxobait altuagoa izan zen: aurretik ezkongabeak ziren emakumeak 2.780 (%94,2) izan ziren; alargunak, 7; eta dibortziatuak, 164.

Ezkonberrien adinak gorantz jarraitu zuen

Ezkontideek eztei-egunean zuten adinari erreparatuta, senarren artean, %68,9k 30 urtetik gora zituzten; emazteen artean, berriz, %51,5ek. Ehuneko biak 2003ko hiruhileko berean izandakoak baino handiagoak dira, aldi hartan %65,9 eta %45,1 izan baitziren, hurrenez hurren.