Eustatek eskainitako datuen arabera, 2005ko otsailean 108.718 bidaiari-sarrera erregistratu ziren Euskal AEko hotel-establezimenduetan, aurreko urteko hil berean baino ia 1.700 sarrera gutxiago, hots, %1 gutxiago. Gipuzkoan bidaiari-sarrerak nabarmen igo ziren urtebete lehenago (%29), baina otsailean %10 jaitsi ziren. Araban galera txikiagoa izan zen (%-1) eta Bizkaian, berriz, %6 igo ziren, aurreko urteko hil beraren aldean.

Estatutik etorritako bidaiarien sarrerak %1 igo ziren, eta atzerriko bidaiarienak %8 jaitsi. Estatutik etorritako bidaiarien kopurua %11 igo zen Bizkaian, baina %10 jaitsi zen Gipuzkoan eta %1 Araban. Atzerritarrak, aldiz, hiruretan gutxitu ziren: %9 Bizkaian eta Gipuzkoan, eta %1 Araban.

Estatutik etorritako bidaiarien artean, gehitu egin ziren, besteak beste, Kataluniatik, Galiziatik, Aragoitik eta Murtziatik etorritakoak. Gutxitu egin ziren batez ere Nafarroatik, Gaztela-Mantxatik eta Asturiastik etorritakoak. Atzerritarren artean, zertxobait igo ziren Frantziatik, Belgikatik, Holandatik, Alemaniatik eta EBkoa ez den Europatik etorritakoak; baina nabarmen jaitsi egin ziren Erresuma Batutik eta Portugaldik etorritakoak, besteak beste.

2005eko otsailean 190.202 gaualdi erregistratu ziren, hau da, iazko otsailean baino %4 gutxiago, 7.000 gaualdi gutxiago. Gaualdiek urte arteko bilakaera positiboa izan zuten Araban eta Bizkaian, %3 eta %4 igo baitziren, hurrenez hurren; baina, Gipuzkoan %15 jaitsi ziren.

Euskal AE osotara hartuta, bidaiarien batez besteko egonaldia 2004ko otsaileko 1,79 egunetik aurtengo otsaileko 1,75 egunera pasa zen, indize horrek Gipuzkoan eta Bizkaian (%-6 eta %-2, hurrenez hurren) izandako jaitsierek eraginda. Araban luzatu egin zen, 1,69 egunetik 1,75era.

Plazakako betetze-maila %3 jaitsi zen, eta iazko otsaileko %36,98tik aurtengo otsaileko %35,84ra pasa zen. Jaitsiera hori Gipuzkoan (%-8) eta Bizkaian (%-3) egiaztatu zen, baina Araban %8 igo zen.

Nekazalturismoa: jaitsi egin ziren bidaiarien sarrerak (%-11) eta gaualdiak (%-10)

Euskal AEko nekazalturismoko establezimenduetan, 4.679 bidaiari-sarrera zenbatu ziren joan den otsailean, aurreko urteko hil berean baino %11 gutxiago: %36 murriztu ziren Araban, %8 Gipuzkoan, eta %2 Bizkaian. Estatutik etorritako bisitariak %12 gutxitu ziren Euskal AEn: 37% gutxiago izan ziren Araban, %8 gutxiago Gipuzkoan %3 gutxiago Bizkaian. Atzerritik etorritakoak %1 gutxitu ziren Euskal AE osoan: Gipuzkoan %10 jaitsi ziren, baina %59 gehitu ziren Araban, eta %9 Bizkaian.

Euskal AEko nekazalturismoko establezimenduetan egindako gaualdiak 10.396 izan ziren otsailean, 2004ko hil berean baino %10 gutxiago, eta urte arteko jaitsiera-tasak izan ziren lurralde guztietan: Araban %40 gutxitu ziren, Bizkaian %6 eta Gipuzkoan %2.

Bidaiariko batez besteko egonaldia apur bat luzatu zen Euskal AE osoan, 2004ko otsailaren aldean: duela urtebete 2,19 egunekoa zen; eta, azken otsail honetan, 2,22koa. Bilakaera positibo hori Gipuzkoan bakarrik izan zen (%7), Araban %7 laburtu baitzen eta Bizkaian %3.

Plazen betetze-maila, azkenik, %13 jaitsi zen, lurralde guztietan izandako galeren ondorioz. Batez ere Araban (%-44) jaitsi zen, Bizkaian eta Gipuzkoan %5eko jaitsiera neurritsuagoak izan baitzituzten.

1. taula: Hileko emaitzak

Iturria: EUSTAT