EUSTATek landutako datuen arabera, 2004ko abenduan %2,0 hazi zen Euskal AEko industri produkzioa, 2003ko hil beraren aldean. Lan-egutegiaren balio homogeneotan, urte arteko aldakuntza %1,9koa izan zen. 2004 osoko hazkunde-tasa metatuak %4,1eko hazkundea izan zuen balio absolututan, eta %3,7koa lan-egutegiaren balio homogeneotan, aurreko urteko aldi beraren aldean.

2004ko abenduan, urte arteko aldakuntzarik positiboenak, balio absolututan, sektore hauei egokitu zitzaizkien: energia elektrikoa, gasa eta ura (%21,2), metalezko eta ez-metalezko meak (%4,1), elikagai-industria (%4,1), garraio-materiala (%3,5) eta kautxua eta plastikoa (%2,7) arloei, besteak beste.

Urte arteko hazkunde-tasa negatiboak, berriz, honako hauek izan zituzten: petrolioa fintzea (%-11,7), zurgintza (%-10,6), kimika-industria (%-9,0), ehungintza eta jantzigintza (%-6,6), ez-metalezko industria (%-6,0) eta larruaren eta oinetakoen industria (%-2,7) arloek, batik bat.

Ondasunen helburu ekonomikoka, 2004ko abenduan, igo egin ziren energiaren (%10,4) eta ekipo-ondasunen (%5,1) urte arteko tasak, baina apur bat jaitsi ziren bitarteko ondasunenak (%-0,7) eta kontsumo-ondasunenak (%-0,8). Azken horien baitan, %3,2 jaitsi ziren kontsumo-ondasun iraunkorrak eta apur bat igo ziren (%0,3) kontsumo-ondasun ez-iraunkorrak.

Lurralde historikoaren arabera, Indize Orokorraren urte arteko bilakaerak desberdinak izan ziren: balio absolututan, %4,6 hazi zen Gipuzkoan eta %1,5 Bizkaian, baina %1,2 jaitsi Araban.

2004ko urteko balantzea

Industri Produkzioaren Indize Orokorraren tasa metatuaren %4,1eko gehikuntzarekin itxi zen 2004ko balantzea, aurreko urtearen aldean. Datuen alderaketa homogeneoa egiteko lan-egutegiaren eragina zuzenduta, 2004ko hazkunde metatua %3,7koa izan zen.

2004ko aldakuntza metatuek hazkundeak erakutsi zituzten energian (%16,6), ekipo-ondasunetan (%5,2) eta bitarteko ondasunetan (%2,5), baina jaitsierak kontsumo-ondasunetan. Azken horiek orotara, %0,1 jaitsi ziren; zehatzago, %2,9 jaitsi ziren kontsumo-ondasun iraunkorrak eta %1,2 igo ziren kontsumo-ondasun ez-iraunkorrak.

2004ko balantzean lurralde bakoitzak joera desberdina izan zuen, hiruretan positiboa izan bazen ere: hazkunde metaturik handiena Araban (%7,3) izan zen, ondoren Bizkaian (%3,4), eta azkenik Gipuzkoan (%3,1).