2003. urtean Euskal AEn 700 milioi euro gastatu ziren Ikerketa zientifiko eta Garapen Teknologikoko (I+G) jardueretan. Gastu honetatik, 341 milioi (%48,8) Bizkaiari dagozkio, 265 (%37,9) Gipuzkoari eta 93 (%13,3) Arabari, Eustatek eman dituen datuen arabera.

Aurreko urtearen aldean, I+Gko barne-gastuaren batez besteko hazkundea %4,1ekoa izan zen, eta Gipuzkoa izan zen batez besteko horren gainetik hazi zen lurralde bakarra, %16,5 hazi baitzen. Bizkaian jaitsi egin zen (%-2,8) eta Araban mantendu (%0,1).

Gipuzkoan izandako gehikuntza nabari da I+Gko gastua BPGaren portzentaje gisa konparatzerakoan ere. Izan ere, balio hori %1,48koa izan zen Euskal AE guztirako eta lurraldeka, %1,70koa Gipuzkoan, %1,43koa Bizkaian eta %1,20koa Araban. Hiru lurraldeak Espainiako batez bestekoaran (%1,10) gainetik kokatu ziren.

Egikaritze-sektoreari dagokionez ere, lurralde historiko bakoitzak berezitasunak agertzen ditu. Araban, oraindik ere oso garrantzitsua da administrazio publikoaren gastua, administrazioaren meneko erakunde asko bertan kontzentratzen direlako eta aurten I+Gra bideratutako baliabideak %14 gehitu direlako. Bestalde, unibertsitatearen pisuak Euskal AEko gainerako lurraldeetan duenaren azpitik jarraitzen du eta enpresen sektoreak, berriz, %2ko atzerakada izan du.

Gipuzkoan, aldiz, gastu txikiena duen sektorea administrazioa da, baina enpresen sektoreak nabarmen egin du gora (%19ko hazkundea, 2002. urtearen aldean), bere enpresa-ehundura espezifikoaren ondorioz. Maila altuari eusten dio unibertsitate-sektoreak ere, teknologia-fakultateen proportzio handiaren eraginez eta I+Gra bideratutako baliabideak %6,5 gehitzearen eraginez. Baliabide horiek Euskal AEko batez bestekoa (%3,3) bikoiztu zuten.

Bizkaiko gastua altua da sektore guztietan. Unibertsitate-sektorea nabarmentzen da, batez ere, Euskal Herriko Unibertsitateko Zientzia Fakultateak Leioako kanpusean kontzentratuta daudelako. Hala ere, aipatzekoa da 2003. urtean administrazio publikoaren sektoreko gastuak izan zuen hazkundea, %18 gehitu baitzen. Hala ere, enpresa-sektorean 2002an baino %5 gutxiago inbertitu zen ikerkuntzan.

Finantzaketa pribatuaren garrantziak (%66,1), estatuko batez bestekoaren gainetik (%48,8) kokatzen ditu hiru lurraldeak, Alemania, AEB, Suitza eta Belgikaren parean, enpresek ikerketara bideratutako baliabideei dagokionez. Atzerritik etorritako funtsei dagokienez, 2002an baino 29 milioi euro gutxiago lortu ziren 2003an eta guztizkoaren %3,8 hartu zuten.

Gasturik handiena eta pertsonal gehien duen diziplina zientifikoa ingeniaritza eta teknologia da herrialde guztietan. Lurralde historiko bakoitzak diziplina horretara dedikatu zituen gastu-portzentajeak honakoak izan ziren: Gipuzkoak %86%, Bizkaiak %72 eta Arabak %74.

Euskal AEn jarduera nagusi gisa I+Gko jarduerak dituzten enpresak kontuan hartuta, Gipuzkoan kokatu ziren horien %50, Bizkaian %32 eta Araban %18.

Manufaktura-enpresei aplikagarri zaien teknologia-mailakako sailkapenaren arabera ere alde esanguratsuak dira lurraldeen artean. Araban goi-mailako eta erdi-goi mailako teknologiako sektoreetan batzen diren enpresek egindako barne-gastuak manufaktura-industriak egindako guztizko gastuaren %59 hartu zuen, Bizkaian %70 eta Gipuzkoan %75.

Emakumeek I+G jardueretan duten parte hartzeari dagokionez, Araban eta Gipuzkoan langile guztien %27 bakarrik ziren emakumezkoak; Bizkaian, ostera %35. Ehuneko guztiak estatuko batez bestekoaren azpitik kokatu ziren, %37ra iritsi baitzen.