EUSTATek landutako datuen arabera, Euskal AEko ekonomia %2,9 hazi zen 2005eko lehenengo hiruhilekoan 2004ko hiruhileko berdinaren aldean. Hiruhilekoaren bilakaera aurreko hiruhilekoarekin alderatuta, hiruhileko arteko %0,5eko hazkunde-tasa lortu zen.

Euskal AEko urte arteko bilakaera Espainiako ekonomiak izandakoaren antzekoa izan zen, baina Europar Batasuna-25erako (%1,7) eta Europar Batasunera-15erako (%1,6) estimatutako tasa gainditu egin zuen, eta Eurogunekoa (%1,4) bikoiztu.

Eskaintzaren aldetik, urte arteko tasan batez bestekoaren gainetik hazi ziren sektoreak nekazaritza eta arrantza (%14,3) eta eraikuntza (%4,3) izan ziren. Bi sektore horiek profil azeleratua erakutsi zuten, bai urte arteko baliotan, bai hiruhileko artekoetan.

Euskal AEko ekonomiaren egituran hedapen handia duen industria-sektoreak urte arteko tasa apalagoa izan zuen, %1,4koa. Bestalde, %0,3ko hiruhileko arteko tasa negatiboa izan zen, aurreko urteko azken hiruhilekoarekiko dezelerazioa nabarmenduz.

Zerbitzuek osotara hartuta, ibilbide positiboari eutsi zioten urte arteko bilakaeran, ekonomiaren batez bestekoaren erregistro bera markatuz. Zerbitzuetan, merkatukoak izan ziren eredua markatu zutenak, %3,0ko urte arteko hazkundearekin; ez-merkatukoek %2,0ko hazkundea lortu zuten.

Eskariaren aldetik, barne-eskaria %2,8 hazi zen, BPGarena baino hamarren bat gutxiago, eta ondorioz, kanpo-saldoak ekarpen txikia egin zion BPGaren hazkundeari, inportazioak zein esportazioak %0,6 besterik ez baitziren gehitu.

Etxeek kontsumoan izandako gastuak urte arteko %2,2ko bilakaera neurritsua izan zuen, aurreko hiruhilekoaren aldean azelerazioa erakutsi arren: 2004ko laugarren hiruhilekoan izandako %0,3ko hiruhileko arteko tasatik aurtengo lehenengo hiruhilekoan izandako %0,8ra pasa zen.

Kontsumo publikoan izandako gastuak etxeetakoak baino urte arteko ibilbide nabarmenagoa izan zuen: %3,3ko urte arteko tasara igo zen, eta azken kontsumoko gastu osoa %2,4ra.

Eskariaren osagairik dinamikoena Kapital Eraketa Gordina (inbertsioa) izan zen zalantzarik gabe eta urte arteko %4,0ko bilakaera izan zuen. Ekipo-ondasunen erosketetan eta eraikuntzako azpisektorean gauzatutako inbertsioek eskari efektiboaren joera goratu zuten.

Enplegua %1,8ko tasara igo zen, 2004ko lehenengo hiruhilekoaren aldean, eta 16.000 enplegu garbitik gora sortu ziren urtean. Urte arteko enplegua sortu zuten sektoreak eraikuntza (%2,6) eta zerbitzuak (%2,7) izan ziren; nekazaritza eta arrantzak (%-1,2) eta industriak (%-0,3), aldiz, enplegu-kotak galdu zituzten.

2005eko lehenengo hiruhileko horretan, lurralde historikoka, BPGa %3,0 igo zen Bizkaian, %2,8 Gipuzkoan eta %2,7 Araban, guztiak urte arteko tasetan.