2004ko laugarren hiruhilekoan, ezkontza zibilak gehitu egin ziren aurreko urteko aldi beraren aldean eta 2003ko 1.014tik 2004ko 1.077ra iritsi ziren, Eustaten datuen arabera. Normalean urteko azken hilabete horietan (% 49,3) udakoetan (% 34) baino ezkontza zibil gehiago izaten da eta udakoetan ospatzen dira urte guztiko 10 ezkontzatik 4.

2004ko laugarren hiruhileko horretako 2.185 ezkontzetan, bizilekua Euskal Autonomia Erkidegoan duten 2.108 gizonezko eta 2.143 emakumezko ezkondu ziren. Horietatiko 1.951 senarrentzat (% 92,6), lehen ezkontza izan zen; 14 alargun eta 143 dibortziatu, aldiz, berriro ezkondu ziren. Lehen ezkontza zuten emakumeen ehunekoa gizonezkoena baino zertxobait altuagoa izan zen: aurretik ezkongabeak ziren emakumeak 1.997 (% 93,2) izan ziren; alargunak, 8; eta dibortziatuak, 138.

Ezkontzak ezkontideek eztei-egunean zuten adinaren arabera banatuz gero, 2004ko laugarren hiruhilekoan, senarren artean, %73,1ek 30 urtetik gora zituzten; emazteen artean, berriz, %54,3k. Aurreko urteko hiruhileko beraren aldean, proportzioa 2 ehuneko-puntu altuagoa izan zen senarren kasuan, eta ia berdina emazteenean.

Aurrera doa, beraz, ezkontzeko adina atzeratzeko joera; 2004. urtean senarren %69,1 eta emazteen %51 30 urte edo gehiagorekin ezkondu ziren eta aurreko urtean baino proportzio altuagoak lortu ziren, % 66 eta %47 izan baitziren, hurrenez hurren.

2004. urtea osotara hartuta, Euskal Autonomia Erkidegoan bizi zirenen ezkontzak 9.932 izan ziren, aurreko urtean baino 14 gutxiago. Ezkontza zibilen proportzioak 5 ehuneko-puntutan gainditu zuen 2003koa eta 2004an ezkontza guztien % 43,4 izatera iritsi ziren.