2003ko ekitaldian, Euskadiko Autonomia-Administrazioen (Eusko Jaurlaritza, foru-aldundiak eta udal-administrazioak, euren erakunde autonomoekin eta udalez gaindiko erakundeekin batera) gastu arrunta %8,7 hazi zen eta 8.885,9 milioi eurora iritsi zen, Eustatek emandako datuen arabera. Sarrera arruntek, aldiz, %4,5eko urteko bilakaera-tasa apalagoa izan zuten eta 10.605,9 milioira iritsi ziren.

Ondorioz, eragiketa arrunten saldoa (sarrera arruntak ken gastu arruntak) %12,8 murriztu zen aurreko urtearen aldean, 2.002ko 1.972 milioitik 2003ko 1.720 milioira.

Zerga-sarrerek sarrera arrunten %90,5 hartu zuten eta horien artean BEZa (%10,3) eta Bestelako zergak (%6,7) nabarmendu ziren lortu zuten urteko bilakaera-tasagatik. PFEZ eta Zerga Bereziak %3,9 eta %3,5 hazi ziren, hurrenez hurren; eta sozietate-zergen sarrerak %0,6. Udal-zergak %3,6 murriztu ziren eta Bestelako sarrera arruntak %2,4.

Gastu arruntaren atalean, langileria-gastuak %5,9 hazi ziren, aurreko ekitaldian (%5,4) baino puntu erdi gehiago. Transferentzia arruntek, hots, diru-laguntzek eta itzuli beharrik gabeko diru-laguntzek %10,0ko hazkundea metatu zuten. Bestelako gastu arruntek, funtzionamendu-gastuek %9,4ko urteko progresio-tasa izan zuten, eta 4. eta 2. kapituluen artean %8,7ra igo zuten guztizko gastu arruntaren bilakaera.

Kapital-sarrerak aurreko urtearen aldean %20,6 murriztu eta 246,1 milioira iritsi ziren, eta Kapital-gastuak (inbertsioak gehi kapital-transferentziak) 1.957,5 milioira igo ziren (%+0,6). Kapital-eragiketen saldo negatibo horrek ia guztiz hartu zuen eragiketa arrunten saldo positiboa D 1.720 milioi).

Eragiketa arrunten eta kapital-eragiketen bilakaera horren ondorioz, aurrekontu-superabit ez-finantzarioa 2002ko 336,5 milioitik 2003ko 8,4 milioira jaitsi zen.

Zor biziak 2001ean izan zuen kotarik baxuena, 2.776,4 milioikoa; 2002an 3.118,1 milioira igo zen; eta 2003ko ekitaldian, 3.349,0 milioira iritsi zen, azken bi urte horietan BPGdaren portzentajea %6,8 inguruan egonkor mantendu zen arren. 2003ko ekitaldian 276 milioiko aurreko zorra amortizatu zen eta 516 milioiko zor berria egin zen.

Euskal AEko autonomia-administrazioetako langileak 59.378 izan ziren 2003an, hots, aurreko urteko 58.718 langileak baino %1,1 gehiago. Merkataritza-sozietateetako eta zuzenbide pribatuko entitate publikoetako langileak ere kontatuz gero, 88.482 langilera iritsi ziren 2003an, 2002an baino %1,0 gehiago. Enplegu-maila horrek Euskal AEko guztizko enpleguaren %9,7 hartu zuen 2003an.