EUSTATen datuen arabera, eta lan-egutegi homogeneoari dagokionez, Euskal Autonomia Erkidegoko industri produkzioa 2004ko maiatzarekin erkatuta %3,3 hazi zen 2005eko maiatzean. Urteko lehenengo bost hilabeteak aintzat hartuta, industri jarduerak aurreko urteko aldi berberean baino %1,4 gehiago hazi ziren.

2005eko maiatzean, eta aurreko urteko apirilaren aldean, EAEko industri produkzioa egonkor mantendu zen (%0,0ko hazkundearekin) baina estazionalitate-ondorioak zuzendu ostean.

Sektoreen araberako bilakaera

Sektoreen arabera, eta industri sektore nagusienen sailkapena kontuan hartuta, 2005eko maiatzeko indizearen bilakaerak (2004ko maiatzaren aldean) ikur ezberdinak izan zituen. Ekipamenduko Ondasunek eta Tarteko Ondasunek urte arteko %8,7 eta %2,5eko hazkundea izan zuten, hurrenez hurren. Aitzitik Energia %0,4 gutxitu zen. Kontsumo-ondasunak ere gutxitu ziren, %0,1; baina industri sektore nagusi honen bi osagaiek urte arteko bilakaera dibergenteak izan zituzten: kontsumo-ondasun iraunkorrak %0,4 igo ziren eta kontsumo-ondasun ez iraunkorrak %0,3 jaitsi ziren.

2005eko lehenengo bost hilabeteetan Ekipamenduko Ondasunak %4,8 hazi ziren, Tarteko Ondasunak %0,6 igo ziren eta Energiak %1,3 egin zuen behera. Kontsumo-ondasunak ere %1,1 jaitsi ziren, Kontsumo-ondasun iraunkorrek (%-1,0) eta Kontsumo-ondasun ez iraunkorrek (%-1,1) behera egin zutelako. Datu hauek guztiak, betiere, 2004ko lehenengo bost hilabeteetakoekin alderatuta daude.

2005eko maiatzeko hil arteko aldaketa, 2005eko apirilaren aldean, positiboa izan zen Ekipamenduko Ondasunei (%2,4) eta Energiari (%0,4) dagokienez. Tarteko Ondasunek, ordea, ez zuten aldaketarik izan (%0,0). Alabaina, Kontsumo-ondasunen hil arteko tasak %3,0 egin zuen behera; horien artean, Kontsumo-ondasun iraunkorrek %-2,2 egin zuten behera eta Kontsumo-ondasun ez iraunkorrek %-3,4.

Lurralde Historikoen araberako bilakaera

Lurralde historikoen arabera, Industri Produkzioaren Indizearen urte arteko bilakaerak ezberdinak izan ziren hiru lurraldeetan. Gipuzkoan %7,0 igo zen eta Araban %4,4, baina Bizkaiko maiatzeko urte arteko tasak %0,4 egin zuen atzera. Urteko lehenengo bost hilabeteetako metatuak bilakaera positiboa izan zuen Gipuzkoan (%2,7) eta Bizkaian (%1,1); Arabak, aldiz, aldaketa negatiboa metatu zuen (%-0,3).

2005ko maiatzeko hil arteko hazkunde-tasek (urte bereko apirilaren aldean) ikur positiboa izan zuten bi lurraldetan: Araban %1,8 hazi zen tasa hori eta Gipuzkoan %0,7, baina Bizkaiko hil arteko aldaketak %-1,6ko beherakada izan zuen.