EUSTATek egindako Jaiotzen Estatistikako 2005eko lehen hiruhilekoaren datuetan, 4.747 jaio jaso ziren, hots, iazko aldi berean baino %3 gehiago. Lurraldeka, Araban 674 ume jaio ziren, %6,4ko hazkundearekin; Bizkaian 2.468 jaiotzarekin, hazkundea %4,5ean kokatu zen. Gipuzkoan, berriz, zifra mantendu egin zen, 1.605 jaiotzarekin.

Jaiotza-hurrenkeraren arabera, 2005eko lehen hiruhilekoan, erdiak baino gehiago, 2.718 ume, lehenengo seme-alabak izan ziren; 1.713 haur (%36,1) aurretik beste bat zegoen familietara iritsi ziren; eta hirugarren eta ondorengo seme-alabak %6,7ra iritsi ziren.

Jaiotzak amaren adinaren arabera banatzen baditugu, ikusiko dugu 30-34 urteko amen taldea oraindik ere nagusi dela argi eta garbi, haien artean gertatu baitziren erditzeen ia erdiak. Talde horren ondotik, hurrengo goragoko taldea kokatu zen, hau da, 35-39 urte artekoa (%27,2); 25-29ko taldea beherago geratu zen, erditzeen %17,9 ekarri baitzituen. Muturreko adinak dituzten taldeetan, 25 urtez behera amatu zirenak %5,2 izan ziren, eta 40 urtez gorakoen taldeak, berriz, jaiotzen %4,1 besterik ez zuen ekarri.

Ama ezkongabe gehiago

Ezkontzaz kanpo jaioek guztizkoaren %22,8 hartu zuten, eta bi puntu igo ziren 2004ko lehenengo hiruhilekoaren aldean. Bizkaia (%22) izan zen Euskal AEko kopuru orokorra baino txikiagoa izan zuen lurralde bakarra. Talde horren erditze-adina umeak eduki zituzten amen multzo osoarena baino txikiagoa izan zen, ama ezkongabeen %15,8 25 urtetik beherakoak baitziren.