EUSTATek landutako datuen arabera, 2005eko irailean, lan-egutegiko termino homogeneotan %4,1 hazi zen Euskal AEko industri produkzioa, 2004ko hil beraren aldean. Datu horrek berretsi egin zuen urtearen bigarren hiruhilekoan nabaritu zen industri jardueraren susperraldia, eta urtearen lehenengo bederatzi hilabeteetan %2,7ko hazkundea eragin zuen, aurreko urteko aldi beraren aldean.

Hilabete arteko datuak alderagarriak izan daitezen urtaroen eragina zuzenduta, 2005eko irailean %0,6 hazi zen Euskal AEko industri produkzioa, aurreko hilarekin alderatuta.

Sektore-bilakaera

Sektoreka, produzitutako ondasunen helburu ekonomikoaren araberako industri sektore handien sailkapena kontuan hartuta, 2005eko iraileko indizearen bilakaerak honako aldakuntzak izan zituen, 2004ko irailaren aldean: urte arteko aldakuntza-tasarik handiena ekipo-ondasunek (%6,7) lortu zuten, jarraian, kontsumo-ondasunek (%5,0): %8,0 hazi ziren kontsumo-ondasun ez-iraunkorrak eta %0,3 murriztu kontsumo-ondasun iraunkorrak. Bitarteko ondasunak neurritsuago igo ziren %3,2ko tasara eta energiak %0,2 egin zuen atzera, urtebete aurreragoko egoeraren aldean.

2005eko lehenengo bederatzi hilabeteen metatuan, ekipo-ondasunak %5,6 hazi ziren, bitarteko ondasunak %1,7, energia %1,9 eta kontsumo-ondasunak %0,3; azken horien barruan, kontsumo-ondasun ez-iraunkorrak %0,4 hazi ziren, baina kontsumo-ondasun iraunkorrak (%0,0) ez ziren mugitu; guzti-guztiak 2004ko lehenengo bederatzi hilabeteekin alderatua.

2005eko abuztuaren aldean, 2005eko iraileko hil arteko aldakuntza bestelakoa izan zen industri sektore handietan. Hil arteko hazkundea izan zuten ekipo-ondasunek (%5,2) eta kontsumo-ondasunek (%3,8); kontsumo-ondasun iraunkorrak %1,7 hazi ziren eta kontsumo-ondasun ez-iraunkorrak %4,8. Gainerako sektore guztiek jaitsierak izan zituzten. Energiak %1,6 egin zuten atzera, eta bitarteko ondasunek %1,4.

Bilakaera lurralde historikoaren arabera

Lurralde historikoei dagokienez, iraileko Industri Produkzioaren Indizearen urte arteko bilakaerak positiboak izan ziren lurralde guztietan: %4,7 hazi zen Gipuzkoan, %3,9 Araban eta %3,8 Bizkaian.

Lurraldeetako hil arteko hazkunde-tasen (2005eko iraileko datu desestazionalizatuak, urte bereko abuztuaren aldean) bilakaerak desberdinak izan ziren hiru lurraldetan: %1,3 hazi ziren Gipuzkoan eta %1,0 Araban, baina %0,3 jaitsi Bizkaian.