EUSTATen datuen arabera, Euskal AEko BPGdak urte arteko %3,7ko hazkunde erreala izan zuen 2005eko hirugarren hiruhilekoan, 2004ko aldi beraren aldean; hau da, bigarren hiruhilekoko urte arteko tasa baino (%3,5) bi hamarren handiagoa izan zen. Hirugarren hiruhilekoak bigarrenaren aldean izan zuen hiruhilekoen arteko hazkundea %1,4koa izan zen, eta 25 kideen Europar Batasunean %0,6koa.

Euskal AEko BPGdaren urte arteko hazkunde-tasa hori Espainiako ekonomiak lortutakoa (%3,5) baino bi hamarren handiagoa izan zen, eta 25 kideen Europar Batasunerako balioetsitakoa (%1,6) baino bi puntu eta hamarren bat handiagoa. AEBko ekonomiaren urte arteko hazkunde-tasa hamarren bat txikiagokoa izan zen (%3,6) eta Japoniakoak erregistro apalagoa izan zuen (%2,9).

Eskaintzaren ikuspegitik, ohiko lau sektore nagusienetatik soilik eraikuntzaren sektorea hazi zen BPGdaren batez bestekotik gora, urte arteko %5,7ko tasarekin; hala ere, tasa hori aurreko hiruhilekokoa baino hamarren bat txikiagoa izan zen. Dena den, sektore horren erregistroa aurreko hiruhilekokoa baino %1,2 handiagoa izan zen eta bigarren hiruhilekoan izandako hiruhilekoen arteko erregistro bera eduki zuen.

Industri sektorea, eraikuntzak (%5,7) eta zerbitzuek (%3,3) lortutako urte arteko tasetatik urrun gelditu zen artean, baina bere suspertzea bizkortzen ari dela erakutsi zuen, ondoz ondoko bigarren hiruhilekoan. Bigarren eta hirugarren hiruhilekoko urte arteko tasak %2,3koak izan ziren, baina hiruhilekoen arteko aurrerapenak bizkortzen jarraitu zuen: %1,8koa izan zen bigarren hiruhilekoan eta %2,4raino igo zen hirugarren hiruhilekoan, bigarrenaren aldean.

Merkatuko zerbitzuek %3,6ko urte arteko hazkundea izan zuten; hau da, lehenengo hiruhilekoko (%3,2) eta bigarren hiruhilekoko (%3,5) urte arteko emaitzak gainditu egin zituzten. Zerbitzuen hiruhilekoen arteko bilakaerak %0,6 egin zuen aurrera hirugarren hiruhilekoan, bigarren hiruhilekokoa (%1,3) baino gutxiago izan bazen ere. Merkatukoak ez diren zerbitzuek urte arteko profil neurrizkoagoa izan zuten (%2,0) bigarren eta hirugarren hiruhilekoan, hiruhilekoen artean azelerazioa arina (%0,5) izan zen arren.

Lehenengo sektorean (%+0,3) nekazaritzak eta arrantzak bilakaera ezberdina izan zuten. Nekazaritza %1,3 txikitu zen 2004ko hirugarren hiruhilekoaren aldean, eta arrantzak urte arteko %4,6ko hazkundea izan zuen.

Eskariaren ikuspegitik, ekonomiaren urte arteko hazkundeak barne-eskarian oinarritzen jarraitu zuen; izan ere, eskari hori urte arteko %3,5eko tasaraino iritsi zen hirugarren hiruhilekoan eta, kasu honetan, kanpoko sektorearen ekarpen negatiboa txikiagoa izan zen, aurreko urtean baino. Esportazio guztiek urte arteko %2,8ko hazkundea izan zuten eta inportazio guztiek %2,6koa; ondorioz, kanpoko saldo negatiboak urte arteko %5,5eko gutxitzea izan zuen.

Etxeetako kontsumo-gastuak bigarren hiruhilekoko urte arteko bilakaera-tasa bera mantendu zuen (%3,2) eta bi hamarrenetan hobetu zuen hiruhilekoen arteko profila. Kontsumo publikoko gastua, bigarren hiruhilekoan izandako urte arteko %2,7ko tasatik hirugarreneko %1,8kora gutxitu zen. Hiruhilekoen arteko aurrerapenak positiboa izaten jarraitu zuen, baina aurreko hiruhilekoan baino erritmo txikiagoarekin.

2005eko lehenengo hiru hiruhilekoetan, barne-eskariaren osagairik dinamikoena Kapital Eraketa Gordina (inbertsioa) izan zen. Horren urte arteko hazkundea %5,0koa izan zen lehenengo hiruhilekoan, %5,2koa bigarrenean eta %5,1ekoa hirugarrenean. Aldi guzti horretan, azken kontsumoa baino bi puntu eta bi hamarren gorago egon zen. Gainera, inbertsioek hiruhilekoen arteko profil nabarmen positiboa izan zuten; hirugarren hiruhilekoan erritmoa bizkortu egin zen (hiruhileko arteko %1,3), Eraikuntzak portaera ona izan zuelako eta ekipo-ondasunak eskuratu zirelako.

Enplegatuek bost hamarrenetan gainditu zuten 2005eko bigarren hiruhilekoko lan-maila eta %2,4ko urte arteko bilakaera izan zuten, 2004ko hirugarren hiruhilekoaren aldean.

Euskal AEko hiru lurralde historikoetako BPGdaren urte arteko bilakaera honelaxe banatu zen: Arabako eta Bizkaiko BPGda %3,7ko urte arteko tasaraino hazi zen, hau da, Euskal AEko batez bestekoraino; Gipuzkoako BPGda bi hamarren beherago gelditu zen hirugarren hiruhilekoan, %3,5eko tasarekin.