EUSTATen datuen arabera, eta lan-egutegi homogeneoari dagokionez, 2005eko laugarren hiruhilekoan Euskal Autonomia Erkidegoko eraikuntzaren sektoreak %8,3ko hazkunde nominala izan zuen 2004ko laugarren hiruhilekoaren aldean. 2005. urte osoan, aurreko urtearen aldean, %8,0 hazi zen.

Hiruhilekoak alderatu ahal izateko estazionalitate-ondorioak zuzendu dira eta ondoren ikusi da 2005eko hirugarren hiruhilekoaren aldean laugarren hiruhilekoko eraikuntzaren jarduera %3,3 hazi zela; gainera, aurreko hiruhilekoko hiruhileko arteko tasaren gainean pixka bat azeleratu zen (%2,8).

Eraikuntzaren sektoreak 2005eko laugarren hiruhilekoan izan zuen bilakaerak euskarri bi izan ditu: bata, garrantzitsuena, Obra zibilaren azpisektorea izan da %10,2ko urte arteko igoerarekin, eta bestea Eraikuntzaren azpisektorea, %7,5eko igoerarekin. Metatutako kopuruari dagokionez, aitzitik, kontrakoa eman zen: eraikuntzak %8,8ko igoera izan zuen urte osoan eta obra zibilak %6,1ekoa.

Hiruhileko artean, sektoreak 2005eko laugarren hiruhilekoan izan zuen jarduera 2005eko hirugarren hiruhilekokoarekin alderatuz gero, obra zibilaren azpisektoreak bilakaera positiboa izan zuen (%7,6) eta eraikuntzak hiruhileko arteko hazkunde neurrizkoagoa izan zuen (%1,5).

2005eko laugarren hiruhilekoan, eraikuntzaren sektoreko enplegua %2,0 gehitu zen urte bereko aldi beraren aldean; hiruhileko artean, 2005eko hirugarren hiruhilekoaren aldean, %0,7ko hazkundea izan zuen sektoreak.