EUSTATek egindako Jaiotzen Estatistikaren arabera 2005. urteko hirugarren hiruhilekoan 4.871 ume jaio ziren Euskal Autonomia Erkidegoan, aurreko urteko aldi berean baino %3,1 gutxiago. Lurraldeka, Araban 702 ume jaio ziren (aurreko urteko aldi berean baino %2,8 gutxiago) eta Gipuzkoan 1.691 ume (%6,7 gutxiago). Aitzitik Bizkaian 2.478 ume jaio ziren, 2004ko hirugarren hiruhilekoko antzeko kopurua lortuz (%-0,6).

Jaiotzen hurrenkera kontuan hartuta, 2005eko hirugarren hiruhilekoan jaiotzen erdia baino gehiago (2.857 ume) lehenengo seme-alabak izan ziren; 1.723 ume (%35,4) bigarren seme-alabak izan ziren eta jaiotako umeen %6 hirugarren edo hortik gorako seme-alabak izan ziren. Soilik Gipuzkoan (%42,5) gertatu da bigarren edo ondorengo seme-alaben ehunekoak Euskal Autonomia Erkidegoko batez bestekoa (%41,3) gainditzea.

Lau jaiotzatik hirutan amak 30 urte baino gehiago izan zituen

Jaiotzak amaren adinaren arabera banatzean 30-34 urtekoak dira oraindik nagusi, jaiotza guztien %45,5 adin-tarte horretako amen artean eman baitziren. Gero 35-39 urteko amen artean eman zen jaiotza gehien (%27,4), eta 25-29 urteko amen artean soilik izan ziren jaiotzen %17,6. Muturreko adin-tarteak aintzat hartuta, 25 urtetik beherako multzoan jaiotzen %5,2 izan ziren eta 40 urtetik gorakoen multzoan jaiotzen %4,3.

Jaiotako ume guztien %22,7ak gurasoak ezkondu gabe izan zituen, 2004ko hirugarren hiruhilekoko antzeko kopurua beraz. Hiru lurraldeen artean soilik Gipuzkoak izan du Euskal Autonomia Erkidego osoko balioak baino handiagoak (%23,2). Multzo honetako ama izateko adina seme-alabak izan zituzten emakume guztiena baino txikiagoa izan zen, ezkondu gabe zeuden amen %15,3ak 14 eta 24 urte bitartean baitzituen.