EAEn eraikuntzako kostuen indizeak %0,5eko igoera izan du 2006ko apirilean, aurreko hilabetearen aldean; horrela, hilabete horretako urte arteko tasa %3,2ra igo da, EUSTATen datuen arabera. Aurreko urteko abenduaren aldean, %3,4 igo da.

2006ko apirilean laneskuaren kostuak ez du inolako aldaketarik izan (%0,0), aitzitik lehengaien kostuek %0,7ko igoera izan dute.

Eraikuntzaren eta Obra Zibilaren azpisektoreek antzeko bilakaera izan dute: eraikuntzak %0,7ko igoera izan du aurreko hilabetearen aldean, eta Obra Zibilerako lehengaien kostuek %0,6koa. Bi azpisektore horien urte arteko bilakaeran argi ikusten da antzeko ibilbideak izan dituztela: eraikuntzako lehengaien kostuak %2,9 gehitu dira, eta obra zibilekoak %2,8.

Apirilean, prezioen hazkunde handienak, besteak beste, ondoko hauetan kontsumitutako lehengaietan eman da: lehergailu eta gasak (%5,7), petrolioaren eratorriak (%4,9), asfaltozko produktuak (%4,9), burdina eta altzairua (%2,6), burdindegiko gaiak (%1,6) eta beirak (%1,4). Ondoko hauetako lehengaien prezioak, berriz, gutxitu egin dira, besteak beste: energia elektrikoa (%-1,7), egiturak eta galdaragintza (%-0,8), metalezko tutueriak (%-0,3) eta erauzketa-agregakinak (%-0,1).

Sektorean kontsumitu diren lehengaien prezioari dagokionez, azken hamabi hilabeteetan inflazio-tasa handienak izan zituztenak ondokoak izan ziren: asfaltozko produktuak (%23,4), petrolioaren eratorriak (%20,0), energia elektrikoa (%15,6), beira (%7,3) eta burdina eta altzairua (%5,0). Bestalde, ondoko hauen lehengaien urte arteko prezioak (2005eko apiriletik 2006ko apirilera) murriztu egin dira: metalezko tutueriak (%-7,1), karea, igeltsua eta eskaiola (%-1,9) eta zeramika-produktuak (%-0,1).