EUSTATen datuen arabera, euskal administrazioen gastu arruntak (Eusko Jaurlaritza, foru aldundiak, udaletako administrazioak, erakunde autonomoak eta udalaz gaineko erakundeak) %7,5 gehitu ziren 2004ko kontabilitate-ekitaldian. 2004ko ekitaldi horretan, guztira 9.552,2 milioi euroko gastua (%+5,8) eta 11.584,4 milioi euroko sarrera arruntak izan ziren; beraz, tasa hori urtean %9,2 igo da.

Aurreko elementuen bilakaeraren ondorioz, eragiketa arrunten saldoa (sarrera arruntak ken gastu arruntak) 2.032 milioikoa izan zen; hain zuzen, kopuru horrek %18,2an gainditu zuen aurreko urtekoa. Aurreko urteko aurrezki gordina 1.720 milioikoa izan zen.

Zerga-sarrerak gastu arrunt guztien ia %90 izan ziren, eta %8,1eko aldakuntza positiboa ekarri zuten. Horien artean, BEZaren ziozko sarrerak %12,5 gehitu ziren urtean.

Zerga bereziak %11,2 gehitu ziren 2004. urtean eta sozietateen gaineko zergak %10,3. PFEZk eta udal-zergek hazkunde txikiagoko bilakaerak izan zituzten, hau da, %2,3 eta %2,6ko hazkundeak hurrenez hurren.

Gastu arruntaren kapituluetan, langileriaren gastuek neurrizko bilakaera izan dute: %3,7 gehitu dira urtean, hau da, 2003. urtean baino puntu bi eta bi hamarren gutxiago. Transferentzia arruntak –itzuli beharrik gabeko diru-laguntzak eta laguntzak- %11,2 gehitu ziren, aurreko urtean baino puntu bat eta bi hamarren gehiago alegia. Beste gastu arruntak –funtzionamenduaren gastuak- bilakaera ertaina izan zuten, %6,6koa. Ondorioz, transferentzia arruntak izan ziren gorako joera eman ziotenak gastu arruntaren guztirakoari (%7,5), gastu arruntaren ia %40 izan zirelako.

Eragiketa arrunten saldotik finantzazkoa ez den aurrekontuko saldora igarotzeko kapital-eragiketen sarrerak eta gastuak kontabilizatu behar dira. 2004. urtean, kapital-sarrerak %4,2 gehitu ziren baina kapital-gastuak (inbertsio errealak gehi kapital-transferentziak) %1,8 gutxitu ziren. Kopuru absolutuetan, lehenengoek 256,3 milioi izan zituzten eta bigarrenek 1.922,8 milioi; kapital-eragiketen saldoa, horrenbestez, negatiboa izan zen (-1.656,6 milioi).

Eragiketa arrunten saldoari kapital-eragiketen saldoa gehituz gero finantzazkoa ez den aurrekontu-saldoa aterako da; hain zuzen ere, azken saldo hau 365,7 milioikoa izan zen 2004. urtean, eta aurreko urtean 8,4 milioikoa.

Euskal administrazioen zor biziak 2001. urtean izan zuen kuotarik txikiena, 2.776,4 milioi izan zirelako ordaindu gabe; baina 2004. urtean 3.497,6 milioiraino igo zen. Azken urte horretan, gainera, ordaindu gabeko 371,9 milioiko zorra amortizatu zen baina 520,6 milioiko zor berria ere egin zen; beraz, zorraren guztirakoa gehitu egin zen.

Bestalde, euskal administrazioen finantza-zorra (BPGari dagokionez) %6,76ekoa izan zen 2003. urtean baina 2004. urtean %6,56ra jaitsi zen. Hori dela eta, BPGk zorrak baino hazkunde-tasa handiagoa izan zuen.

Euskal administrazioen aurrekontu-plantilla 59.378koa izan zen 2003. urtean eta urtebete geroago, 2004. urtean, 59.606koa izan zen.