EUSTATen datuen arabera, 2006ko lehen hiruhilekoan 4.906 pertsona hil ziren Euskal Autonomia Erkidegoan, hau da, aurreko urteko denboraldi berean baino %19,4 gutxiago. Lurraldez lurralde, Araban 594 pertsona hil ziren (%19,3ko gutxipenarekin), Bizkaian 2.733 (-%18,8) eta Gipuzkoan 1.579 (-%20,5).

Urteko lehen hiruhilekoa izan ohi da heriotza gehien gertatzen dena. Arnas aparatuaren gaixotasunak izan ohi dira heriotza-kopurua gehien igotzea ekartzen dutenak. Aurten, ordea, jaitsiera garrantzitsua izan da 2005eko hiruhileko beraren aldean, zehazki, %44,7.

Gainera, 2006ko lehen hiruhilekoan, aurreko urteko hiruhileko beraren aldean, %18,9 jaitsi dira zirkulazio-sistemako gaixotasunak. Arrazoi horregatik 1.536 pertsona hil ziren, beraz, horixe da heriotzen kausa nagusia, heriotza guztien ia heren baten kausa izan baitzen.

Heriotzen bigarren kausa tumoreak izan dira, 1.368 heriotza ekarri dutenak (%27,9). Hirugarren tokia arnas aparatuaren eritasunentzat da, neguko hilabete hauetan 543 heriotza (%11,1) ekarri zizkigutenak.

Sexuaren arabera, heriotzaren eragileak ezberdinak izan ziren. Gizonen artean, tumore baten ondorioz hildakoak zirkulazio-sistemako arazoren baten ondorioz hildakoak baino gehiago izan ziren; emakumeen artean, ordea, heriotza gehien eragin zuten gaixotasunak kardiobaskularrak izan ziren eta bigarren gaixotasunak tumoreak. Arnas sistemako gaixotasunak bi sexuen artean heriotzaren hirugarren arrazoi moduan mantentzen dira.

2006. urteko lehen hiruhileko honetan, heriotzen artean urte bat bete ez zuten 13 ume hil ziren; 5 mutil eta 8 neska.

2006ko lehen hiruhilekoko hazkunde begetatiboa negatiboa izan zen, 62 pertsona gutxiago izan zirelako. Lurraldeka, Arabak eta Gipuzkoak saldo positiboak izan zituzten, 108 eta 92 pertsona hurrenez hurren. Bizkaian, aitzitik, heriotzak jaiotzak baino gehiago izan ziren (-262).

1 Taula: Euskal AEko heriotzak sexuka, heriotza-kausaren arabera. Hiruhilekoen alderaketa.

Iturria: EUSTAT