Eustaten datuen arabera, 2006ko hirugarren hiruhilekoan 5.023 ume jaio ziren Euskal Autonomia Erkidegoan, aurreko urteko hiruhileko berean baino %2,9 gehiago. Lurraldeka, Araban 731 ume jaio ziren (aurreko urteko aldi berean baino %4,1 gehiago) Gipuzkoan 1.782 ume jaio ziren (%4,8 gehiago) eta Bizkaian gehikuntzarik txikiena eman zen, 2.510 jaiotza (%1,2 gehiago).

Jaiotzen hurrenkera kontuan hartuta, 2006ko hirugarren hiruhilekoan jaiotzen erdia baino gehiago (2.939 ume) lehenengo seme-alabak izan ziren; 1.760 ume (%35) bigarren seme-alabak izan ziren eta jaiotako umeen %6,5 hirugarren edo hortik gorako seme-alabak izan ziren. Soilik Bizkaian (%39,2) gertatu da bigarren edo ondorengo seme-alaben ehunekoa Euskal Autonomia Erkidegoko batez bestekora (%41,5) ez heltzea.

Lau jaiotzatik hirutan amak 30 urte baino gehiago izan zituen

Jaiotzak amaren adinaren arabera banatzean ikus daiteke 30-34 urtekoak oraindik nagusi direla, jaiotzen %46 adin-tarte horretan gertatu baitziren. Gero 35-39 urteko amen artean eman zen jaiotza gehien (%26,3), eta 25-29 urteko amen artean soilik izan ziren jaiotzen %17,5. Muturreko adin-tarteetan, 25 urtetik beherako multzoan jaiotzen %5,8 izan ziren eta 40 urtetik gorakoen multzoan jaiotzen %4,4.

Jaiotako ume guztien %24,9 ezkontzatik kanpo jaiotakoak izan ziren, 2005eko hirugarren hiruhilekoan jaiotakoak baino puntu bi gehiago beraz. Hiru lurraldeen artean soilik Gipuzkoak izan du Euskal Autonomia Erkidego osoko balioak baino txikiagoak (%23,3). Multzo honetako ama izateko adina seme-alabak izan dituzten emakume guztiena baino txikiagoa izan zen, ezkondu gabe zeuden amen %15,4ak 14 eta 24 urte bitartean baitzituen.

1. taula: Bizirik jaioak Euskal AEn. Taula konparatiboa.

1. grafikoa: Jaiotzen hilez hileko mugimendua.