EUSTATen datuen arabera, Euskal Autonomia Erkidegoan eraikuntzaren kostuen indizeak %0,5eko igoera izan zuen 2007ko martxoan, aurreko hilabetearen aldean; horrela, hilabete horretako urte arteko tasa %5,7raino igo zen.

Urte arteko aldakuntza-tasak, 1997-2007

(*) Hazkundea martxoko urte artekoa da

Iturria: EUSTAT

2007ko martxoan laneskuaren kostuak ez zuen inolako aldaketarik izan (%0,0), aitzitik lehengaien kostuek %0,7ko igoera izan zuten.

Eraikuntzaren eta Obra Zibilaren azpisektoreek bilakaera berbera izan zuten; bai eraikuntzak bai obra zibilerako lehengaien kostuek %0,7ko gehikuntza izan zuten aurreko hilabetearen aldean. Bi azpisektore horien urte arteko bilakaeran, argi ikusten da antzeko joerak izan dituztela baina ezberdintasun batzuekin: eraikuntzako lehengaien kostuak %7,1 gehitu ziren, eta obra zibilekoak %5,4.

Martxoan, prezioen hazkunde handienak, besteak beste, ondoko hauetan kontsumitutako lehengaietan eman da: petrolioaren eratorriak (%4,6), asfaltozko produktuak (%4,0), burdina eta altzairua (%3,1), burdindegiko gaiak (%2,4) eta beira (%1,6). Ondoko hauetako lehengaien prezioak, berriz, gutxitu egin dira, besteak beste: kare, igeltsu eta eskaiolan (-%1,7), egiturak eta galdaragintza (-%1,0), lehergaiak eta gasak (-%0,2) eta erauzketa-agregakinak (-%0,1).

Sektorean kontsumitu diren lehengaien prezioari dagokionez, azken hamabi hilabeteetan inflazio-tasa handienak izan dituztenak ondokoak izan dira: burdina eta altzairua (%24,6), metalezko tutueria (%18,5), beira (%17,3) eta energia elektrikoa (%16,6). Bestalde, ondoko hauen lehengaien urte arteko prezioak (2006ko martxotik 2007ko martxora) murriztu egin dira: petrolioaren eratorriak (-%6,4) eta asfaltozko produktuak (-%4,9).

Eraikuntzaren kostuen indizea. Euskal AE / Datu aurrerapena. 2007ko martxoa.

Iturria: EUSTAT