2007ko uztailean, Euskal AEko Eraikuntzaren Kostuen Indizea ez zen aldatu (%0,0) aurreko hilaren aldean, eta uztaileko urte arteko tasa %5,1era iritsi zen, EUSTATen datuen arabera.

Uztailean Eraikuntzako azpisektoreak egonkor iraun zuen (%0,0) eta Obra Zibilekoa %0,1 hazi zen; urte arteko tasak %5,3 eta %4,4 izan ziren, hurrenez hurren.

Urte arteko aldakuntza-tasak, 1997-2007

(*) Hazkundea uztailako urte artekoa da

Iturria: EUSTAT

2007ko uztailean, lan-eskuaren kostua ez da aldatu (%0,0); ezta ere lehengaien kostuak (%0,0).

Eraikuntza eta Obra Zibila azpisektoreek antzeko bilakaera izan zuten: aurreko hilaren aldean %0,0 igo zen Eraikuntzako lehengaien kostua eta %0,1 Obra Zibilekoa. Azken honen pisu erlatiboa txikiagoa da Eraikuntzarena baino. Azpisektore bien urteko bilakaeran ikusten denez, biek antzeko joerak izan dituzte baina indar ezberdinez: eraikuntzako lehengaien kostuak %6,1, hazi dira, eta obra zibilekoak, %4,9.

Uztailean, prezio hazkunderik handienak kontsumitutako honako lehengaiek izan zituzten: energia elektrikoa (%2,7), asfalto-produktuak (%1,0), petroliotik eratorritakoak (%0,8), eta ateratze agregakinak (%0,6), besteren artean. Aitzitik, beste lehengai batzuen prezioak jaitsi egin dira, hala nola karea, igeltsua eta eskaiola (%-0,5), burdina eta altzairua (%-0,4), leherkariak eta gasak (%-0,4) eta metalezko hoditeria (%-0,3) lehengaienak, besteak beste.

Sektorean kontsumitu diren lehengaien prezioari dagokionez, azken hamabi hilabeteetan inflazio-tasa handienak izan dituztenak ondokoak izan dira: beira (%24,8), burdina eta altzairua (%17,0), metalezko hoditeria (%14,1) eta karea, igeltsua eta eskaiola (%7,9). Bestalde, urte batetik bestera (2006ko uztailetik 2007ko uztailera) honako hauen lehengaien prezioak murriztu dira: asfaltozko produktuak (%-9,2), petrolioaren eratorriak (%-4,4), egiturak eta galdaragintza (%-1,2).

Eraikuntzaren kostuen indizea. Euskal AE / Datu aurrerapena. 2007ko uztaila.

Iturria: EUSTAT