Euskal AEko okupazio-tasa, -%66,5- 27-EBko batez bestekoaren -%64,3- gainetik dago, Eustaten 2006ko datuen arabera, urte horretakoak baitira azken datu eskuragarriak. Urte horretan Espainiakoa %64,8 zen.

Danimarka (%77,4), Herbehereak (%74,3), Suedia (%73,1), Bretainia handia (%71,5) eta Austria (%70,2) ziren okupazio-tasarik handienekoak zonan. Azpitik, Polonia (%54,5), Malta (%54,8), Hungaria (%57,3) eta Italia (%58,4) dauzkagu.

Datu hauek 1995 eta 2.000koekin alderatuz gero errotiko aldaketa igartzen da; izan ere, okupazio-tasa 1995ean %48,5 zen, %57,5 2000n eta %66,5 2006an, azken urte honetan 27-EBko batez bestekoa gainditu zuelarik. Urte horietan Espainiako portzentajeak %46,9, %56,3 eta %64,8 ziren; eta 27-EBn %62,2 2.000n eta %64,3 2.006an.

Okupazio-tasa (%) 27-EBn (1995-2006)

Iturria: Eustat eta Eurostat

Euskal AEko emakumeen okupazio-tasa, %57, 27-EB herrialdeetako berbera da ia (%57,1). Azken urte hauetako Euskal AEren bilakaera azpimarragarria da; izan ere, 1995eko %34,4tik 2000ko %43,0ra eta hortik 2006ko %57,0ra.

Europako iparraldeko herrialdeak ziren aurrenekoak ere 2006an atal honetan: Danimarka (%73,4), Suedia (%70,7), Herbehereak (%67,7) eta Finlandia (%67,3) zeuden aurreneko tokietan. Maltan (%34,9), Italian (%46,3) eta Grezian (%47,4) zeuden emakumeen okupazio-tasarik txikienak. Espainian 1995ean %31,7 zen tasa, %41,3 2000n eta %53,2 2006an, 27-EBko batez bestekoaren azpitik.

Jakingarria da, baita ere, 2006an Euskal AEn 55 eta 64 urte arteko biztanleriaren okupazio-tasa %41,7 zela, 27-EBko (%43,5) eta Espainiako (%44,1) batez bestekoen azpitik.