EUSTATen datuen arabera, 2007ko uztailean, abuztuan eta irailean guztira 2.943 ezkontza egin ziren Euskal Autonomia Erkidegoan, hau da, aurreko urteko hiruhileko beraren aldean kopuru hori %11,9 gutxitu zen. Ezkontza horien artean, bestalde, 370 bikote Arabara joan ziren bizitzera, 932 Gipuzkoara eta 1.553 Bizkaira. Euskal Autonomia Erkidegokotik kanpora bizitzera joan zirenak 88 izan ziren.

Iraila izan zen ezkontzeko hilabete gustukoena

Irailean egin ziren ezkontza gehienak (1.285), eta gero uztailean 1.265. Bestalde, aurrekoetan bezala, ezkontza gutxien (393) izan zituen udako hilabetea abuztua izan zen.

Urtean ezkontza kanoniko gehien izan zituen hiruhilekoa izan arren, aurreko urteko hiruhileko beraren aldean ezkontza gutxiago egin izanak ez zuen eraginik izan ezkontza zibilen kopuruan, ia kopuru bera izan baitzuten; baina bai izan zuen eragina ezkontza erlijiosoetan, hauek ia %19 murriztu ziren aldi bi horien artean. Gipuzkoan ezkontza kanonikoak guztien %56,1 izan ziren, Bizkaian %56,2 eta Araban %57,6.

2007ko hirugarren hiruhilekoko 2.943 ezkontzen artean, Euskal Autonomia Erkidegoko egoiliar ziren 2.858 gizon eta 2.908 emakume ezkondu ziren. 2.680 senar (%93,8) lehenengo aldiz ezkondu ziren eta, bestalde, 12 gizonezko alargun eta 166 gizonezko dibortziatu berriz ezkondu ziren. Emakumeen lehenengo ezkontzen ehunekoa gizonenaren antzekoa izan zen: aldi horretan 2.707 emakume ezkongabe (%93,1), 11 alargun eta 190 dibortziatu ezkondu ziren.

Ezkontzak ezkontideen adinaren arabera banatuz gero, emazteen %55ak 30 urtetik gora zituen eta adin-tarte horretako gizonen kopurua %73,1ekoa izan zen.

1. grafikoa: Ezkontzen hilez hileko mugimendua