1996tik hona, Ane da neska-izena aukeratzeko orduan gurasoen kutunena. Informazioa Eustatek jakinarazi du, Euskal AEn 2004-2006 artean jaiotakoei ipinitako izenez ari delarik. Bigarren Irati dator, hirugarren Naroa, gero June, Uxue, Leire eta Nahia.

Ikerrek ere eutsi egiten dio gurasoen gustukoena izateari; ondoren, Jon eta Unai. Eta gero Ander, Mikel eta Oier datoz tropelean.

Erregistro Zibilak gehienez bi izen bakun edo konposatu bat jartzeko aukera ematen du; gurasoek bakun batera jotzen dute.

Ehun izen ugarienen artean Jon Ander konposatua bakarrik agertzen da, mutilentzakoez ari garela; Mariarekin osatutako neskentzakoak, hain ugariak zirenak, ez dira agertu ere egiten.

Euskal izenak dira nagusi, batzuetan bi grafia agertzen direlarik: Ane-Anne, Itxaso-Itsaso, Leire-Leyre, Jon-Ion, Aritz-Haritz. Bikote hauek denak, Itsaso eta Ion izan ezik, 100 ugarienen artean daude.

Maria eta Miren bikotean izan ezik, izen baten euskal forma nagusitzen da; horixe gertatzen da Ane-Ana, Xabier-Javier, Jon-Juan, Mikel-Miguel bikoteetan.

2006ko estatistikan 1.511 neska-izen ezberdin agertzen dira, eta 1.358 mutil-izen. Horietatik, behin bakarrik agertzen dira 1.015 neska-izen eta 955 mutil-izen. Izen txinatarrak, afrikarrak, arabiarrak, italiarrak, anglo-saxoiak e.a. agertzen direlarik. Erabilitako izen-kopurua, 1999tik, %58,6 hazi da mutilen artean eta %44,3 neskenean.

1.taula: 25 izen ohikoenak azken hiru urteotan

Iturria: EUSTAT. Jaiotzen estatistika