EUSTATen datuen arabera, Euskal Autonomia Erkidegoan dauden herri administrazioek (euskal administrazioak eta EAEn kokatuta dauden Estatuko administrazioa eta Gizarte Segurantza), 2006. urtean, 2.824 milioi euroko superabita izan zuten finantzatzeko ahalmenari dagokionez, hau da, BPGaren %4,6.

Euskal Autonomia Erkidegoko herri administrazioek ehuneko sei hamarren hobetu zuten 2005eko BPGren balioa. Era berean, Espainian, herri administrazioen sektoreak zortzi hamarren gehiagoko superabita izan zuen: 2005ean BPGaren %1,0 izan zen superabita eta 2006an %1,8. Horrela, 27 kidez osatutako Europar Batasunaren defizitak behera egiten jarraitu du: 2005ean BPGaren %2,5 izan zen eta 2006an %1,4.

1. grafikoa. Herri administrazioen finantzatzeko ahalmenaren (+) edo beharrizanaren (-) bilakaera (BPGaren %)

Iturria: Eustat

Euskal Autonomia Erkidegoan herri administrazioek finantzatzeko gaitasuna hobetu zuten, finantzazkoak ez diren baliabideek gehikuntza handiagoa izan zutelako finantzazkoak ez diren enpleguekin erkatuta: 2005ekoen aldean %9,2 gehitu ziren aipatutako baliabideak, eta finantzazkoak ez ziren lanpostuak %7,4.

Euskal Autonomia Erkidegoko herri administrazioen barruan sartzen diren erakunde-sektore guztiek izan zituzten 2006. urte horretan superabitak, baina ez zen kasu denetan modu berean eman:

EAEn kokatuta dauden Estatuko administrazioak eta Gizarte Segurantzak superabita hobetu zuten: 2005. urtean 1.496 milioi eurokoa izan zen eta 2006. urtean 1.562 milioi eurokoa; hau da, Estatuak EAEn duen zerga-balantzaren arabera diru-fluxutan Estatuari BPGaren %2,53ko ekarpena egin zitzaion. Osagaiak banakotuz gero, EAEn kokatuta dagoen Estatuko administrazioak saldo soberakina gehitzen jarraitu du: 2006an 1.505 milioi eurokoa izan zen eta 2005ean 1.154koa. EAEn kokatuta dagoen Gizarte Segurantzak ere izan zuen superabita, 57 milioikoa, nahiz eta 2005. urteko superabita (342 milioi) baino txikiagoa izan.

EAEko administrazioek saldo positiboa hobetu zuten: 2005. urtean 781 milioikoa izan zen eta 2006. urtean 1.262 milioikoa. Emaitza hori ondoko saldo positibo hauek batuz lortu zuten: 750 milioi Eusko Jaurlaritzaren erakundeen artean, 92 milioi Arabako foru eta toki erakundeetan, 359 milioi Bizkaikoetan eta 62 Gipuzkoakoetan.

1. taula: Euskal Autonomia Erkidegoko herri administrazioen aurrezki garbia eta finantzatzeko ahalmena (+) edo beharrizana (-). 2006. urtea. (Mila eurotan)

Iturria: Eustat

2000-2006 denboraldian, Euskal Autonomia Erkidegoko herri administrazioek finantzazkoak ez diren baliabideak %43,8 gehitu zituzten, eta finantzazkoak ez diren enpleguak %48,5. Horrenbestez, finantzatzeko ahalmena %17,4 gehitu zen denboraldi horretan.

Euskal Autonomia Erkidegoko administrazioen aurrezki garbia 2000. urteko 3.793 milioi eurotik 2006ko 4.590 milioi eurora igo zen; hau da, %21,0 gehitu zen.

2. taula: Herri administrazioek azken eskarian duten partaidetza. Euskal Autonomia Erkidegoa (mila eurotan). 2000-2006

Iturria: Eustat

Barne-eskari publikoak barne-eskari osoan izan zuen parte-hartzea aurreko ekitaldietako berdina izan zen: %16,6koa.

Herri administrazioen azken kontsumoko gastua, EAEko azken kontsumoan izandako gastuaren %19,5 izan zen 2006. urtean; hots, 2005ekoa baino hamarren bat altuagoa.

Inbertsio publikoa %10 gehitu zen; beraz, herri administrazioek 2006. urtean %9,2ko inbertsioa egin zuten EAEko ekonomiaren Kapitalaren Eraketa Gordinean, 2005. urtean baino ehuneko puntu erdi handiagoa. Erakundeen arabera, 2006ko inbertsioen %93 euskal administrazioei egokitu zitzaizkien, eta EAEn kokatuta dauden Estatuaren administrazioei eta Gizarte Segurantzari %7 baino ez. Ehuneko horiek maila berdinetan mantendu ziren azken urteetan.