EUSTATen datuen arabera, eta lan-egutegi homogeneoari dagokionez, Euskal Autonomia Erkidegoko industri produkzioa %21,5 gutxitu zen 2008ko abenduan, 2007ko abenduaren aldean. 2008. urte osoko beherapen-tasa metatua, aurreko urtearen aldean, -%3,4koa izan zen.

2008ko abenduan, eta azaroarekin erkatuta, Euskal Autonomia Erkidegoko industri produkzioa %6,0 gutxitu zen estazionalitate-ondorioak zuzendu ostean.

Euskal Autonomia Erkidegoko Industri Produkzioaren Indizearen urte arteko hazkunde zuzendua, hiruhilabeteka

Iturria: Eustat

Sektoreen arabera, eta industri sektore nagusienen sailkapena kontuan hartuta, 2008ko abenduko indizearen bilakaerak (2007ko abenduaren aldean) hurrengo aldakuntzak izan zituen: energiak %5,4ko aldakuntza positiboa izan zuen urte batetik bestera; aitzitik, ekipamenduko ondasunek %19,3 egin zuten behera, tarteko ondasunak %31,0 gutxitu ziren eta kontsumo-ondasunak %18,8 murriztu ziren. Azken kasu honetan, kontsumo-ondasun iraunkorren (-%25,5) eta kontsumo-ondasun ez iraunkorren (-%15,7) beherapenak eragin zuen murrizketa.

2008ko abenduko hil arteko aldakuntza negatiboa izan zen sektore guztietan; energia sektorean izan ezik, honek %1,7 egin baitzuen gora. Tarteko ondasunek %7,7 egin zuten behera; ekipamenduko ondasunak %7,1 gutxitu ziren eta kontsumo-ondasunak %5,3 murriztu ziren, kontsumo-ondasun ez iraunkorren (-%6,8) eta kontsumo-ondasun iraunkorren (-%0,7) beherapenaren ondorioz.

Lurralde historikoka, Industri Produkzioaren Indizeak urte batetik besterako abenduan izan zuen bilakaera negatiboa izan zen hiru lurraldeetan: Araban %25,8 egin zuen behera, Bizkaian %19,9 eta Gipuzkoan %20,9. Hil arteko hazkunde-tasak ere negatiboak izan ziren hiru lurraldeetan: Araban %10,3 jaitsi zen, Bizkaian %5,1 eta Gipuzkoan %4,8.

2008ko industri jardueraren balantzea

Euskal Autonomia Erkidegoko 2008. urteko balantzeak %3,4ko beherapen metatua erakusten du Industri Produkzioaren Indizean.

Industriako sektore garrantzitsuenek aldakuntza negatiboak izan zituzten urteko metatuan; energia izan zen salbuespen bakarra, %5,0 hazi zelako. Ekipamenduko ondasunek %2,2 egin zuten behera, tarteko ondasunek %5,0 eta kontsumo-ondasunek, denek, %6,9 egin zuten behera. Azken hauen artean, kontsumo-ondasun iraunkorrak %15,7 gutxitu ziren eta kontsumo-ondasun ez iraunkorrak %3,0 gutxitu ziren. Hori guztia, betiere, 2007. urtearekin alderatuta.

2008. urteko aldakuntza metatuak negatiboak izan ziren hiru lurralde historikoetan eta aipatutako hiru kasuetan: Arabak %4,1eko beherapena izan zuen, Bizkaiak %2,4koa eta Gipuzkoak %4,2koa.

Taula: 2008KO ABENDUA. Euskal Autonomia Erkidegoko Industri Produkzioaren Indizearen aldakuntza-tasak (%)

(1) t urteko urtarriletik azken hilera arte metatutako aldiaren urtetik urterako aldaketa-tasa da, t-1 urteko aldi berberaren aldean.

Iturria: Eustat