2011-06-29ko prentsa-oharra

Euskal AEko SEKTORE PUBLIKOAREN AURREKONTUEN ESTATISTIKAK, 2009. URTEA

EAEko administrazioen sarrera arruntek % 12,7 egin zuten behera 2009an

BPGrekiko finantza zorra igo zen: 2008ko % 4,3tik 2009ko % 7,2ra

EUSTATen datuen arabera, EAEko administrazioen (Eusko Jaurlaritza, foru aldundiak, udaletako administrazioak, horien erakunde autonomoak eta udalaz gaineko eta azpiko erakundeak) sarrerek % 1,0 egin zuten behera 2009an, 2008. urtearen aldean; gastuak, aldiz, % 5,4 igo ziren.

Sarrera guztien beherapena eragiketa arrunten ondorioz eman zen: guztirakoaren % 83 izan ziren eta beherapena % 12,7koa. Izan ere, kapitalaren sarreretan eta finantza sarreretan izandako igoerek ezin izan zioten aurre egin beherapenari.

Gastu guztiak % 5,4 igo ziren, finantzazkoak ez diren eragiketak % 5,2 igo zirelako eta finantza-eragiketak % 10,5.

Bilakaera horien ondorioz, “eragiketa arrunten saldoa” negatiboa izan zen, 247,5 milioi eurotan; eta “finantzazkoa ez den aurrekontu saldoa” 2008. urtearekiko narriatu egin zen, 3.020,7 milioi euroko defizita lortu zuen.

Zerga-sarreren bilakaera aztertzean aurkitu den ezaugarri komuna, udal-zergak izan ezik, 2009ko zerga-bilketaren beherapena da.

Diru-bilketaren garrantzia kontuan hartuta egindako azterketaren arabera, PFEZren ziozko sarrerek (zerga-sarrera guztien artean % 34,4 izan zirenak) % 13,3 egin zuten behera. Bigarrenik, BEZa, guztirakoaren % 33,5 izan zen eta % 8,4 egin zuen behera. Hirugarrena eta laugarrena dira, diru-bilketaren garrantziaren arabera, Zerga Bereziak eta Sozietateen gaineko Zerga. Hauek % 4,3 eta % 27,0 egin zuten behera, hurrenez hurren.

Garrantzi kuantitatibo askoz txikiagoa izan arren, udal-zergek ez dute ia aldaketarik izan; eta beste zerga batzuek % 30,7 egin dute behera. Beste sarrera arruntek, gainera, % 13,0 egin zuten behera.

Gastuari dagokionez, finantzazkoak ez diren kapitulu guztietan eman ziren aldakuntza-tasa positiboak, transferentzia arruntetan izan ezik. Langileriaren gastuak % 6,1 igo ziren, aurreko urtean baino puntu bat eta lau hamarren gutxiago. Aurreko urtearen aldean hazkunde neurrizkoagoa izan zuten arren, beste gastu arruntak % 8,5 igo ziren. Transferentzia arruntetan joera-aldaketa eman zen: aurreko urtearen aldean % 8,0 egin zuten behera. Deskribatutako bilakaera multzoaren ondorioz, eragiketa arrunten ziozko gastua % 1,5 igo zen eta, kapital-gastuaren eragiketekin batera, finantzazkoak ez diren eragiketen ziozko gastuaren guztirakoa % 5,2 igotzea eragin zuen.

Eragiketa arrunten saldo negatiboa eta kapital-eragiketen saldo negatiboa batzean finantzazkoa ez den aurrekontu saldo negatiboa atera zen, 3.020,7 milioi eurokoa, hau da, 2009ko BPGren % 4,7.

Administrazio publikoen zor bizia 4.678,2 milioi eurokoa izan zen 2009ko abenduaren 31n. Egindako pasibo berrien eta ordaindu gabe dagoen zorraren amortizazioaren arteko aldea 1.751,9 milioi eurokoa izan zen 2009. urtean; hots, 2008. urteko amaieraren aldean zor garbia % 59,9 igo zen.

Zorraren igoera horrek ekarri du BPGri dagokionez ehunekoa % 4,3raino igotzea 2008an, eta % 7,2raino 2009an.

2009. urtean, administrazio publikoa 1.096 erakundek osatzen zuten. Guztira 111.834 langile izan zituen, 2008an baino % 1,2 gehiago. Langile guztien artean % 68,7k Euskal Autonomia Erkidegoko Administrazio Orokorreko sektore publikoan lan egin zuen; % 9,1k foru administrazioetako sektore publikoan eta gainerako % 22,2k tokiko administrazioetako sektore publikoan. Lan motari dagokionez, % 69,9k enplegu finkoa zuen.

Argibide gehiago:

Euskal Estatistika Erakundea Donostia-San Sebastian kalea, 1 01010 Vitoria-Gasteiz Tel.: +34-945-01 75 00 Faxa: +34-945-01 75 01 Helb. elek.: eustat@eustat.eus Harremanetan jartzeko pertsona: Jose Javier Aramburu Tel.: +34-945-01 75 80 Faxa: +34-945-01 75 01 Euskal AEko Sektore Publikoaren Aurrekontuen Estatistikei buruzko prentsa-ohar gehiago Euskal AEko Sektore Publikoaren Aurrekontuen Estatistikei buruzko datu-bankua