2011/11/17ko prentsa-oharra
Euskal AEko I+Gko gastua BPGren %2,08 izan zen 2010ean
Gastua 1.360,3 milioi eurokoa izan da eta %6,2 hazi da 2009ren aldean
Ikerketa Zientifikoa eta Garapen Teknologikoa (I+G) Euskal AEn: 2010. urtean guztira 1.360,3 milioi euro erabili ziren I+Gko jardueretan, aurreko urtean baino %6,2 gehiago, EUSTATek landutako datuen arabera.
Euskal AEko I+Gko gastua BPGrekiko: %2,08ra igo zen, aurreko urtean baino bederatzi ehunen gehiago, aurreko urteetan izandako gastuaren hazkunde positiboari eutsiz.
Dedikazio osoan aritu ziren langileak 17.532 izan ziren, langile landunen %1,8, 2009an baino %5,0 gehiago. Horietatik 11.071 dedikazio osoko ikertzaileak dira, aurreko urtean baino %6,6 gehiago hauek ere.
I+Gko langileen %33,4 emakumezkoak dira
I+Gko langileen %33,4, 5.863 langile, emakumezkoak dira. I+Gko jardueretan emakumeek duten parte hartzearen ehunekorik handienak Administrazio Publikoan eta Goi-mailako Irakaskuntzan gertatzen dira, %51,9 eta %47,4 baitira, hurrenez hurren. Enpresetan berriz, %28,5 dira emakumeak.
Euskal AEn egindako I+Gko gastuaren %77,1 enpresa-sektorean egikaritu zen
Egikaritza-sektoreei dagokienez, gasturik handiena enpresek egin zuten, I+Gko gastuaren %77,1 (1.048,5 milioi euro); %17,2 goi-mailako Irakaskuntzak egikaritu zuen (234,5 milioi), eta gainerako %5,7a administrazioaren mendeko zenbait organismo publikok (77,2 milioi).
Beraz, Euskal AEko enpresa-sektorea da, erkaketaz, ikerketa-ahaleginik handienaren egile, aurreko urteko gastuaren aldean 8 hamarren gehiagorekin gainera. Administrazio Publikoaren sektoreak bere pisua mantendu du, eta Goi-mailako Irakaskuntzarena 8 hamarren jaitsi da.
2010ean 27-EBko eta Espainiako datu eskuragarririk ez badago ere, aurreko urteetan nabarmena zen Euskal AEko gastu-egiturak Espainiako batezbestekoarekin zuen aldea: Espainian, 2009. urtean, enpresek I+Gko gastuaren %52,1 egikaritu zuten, Goi-mailako Irakaskuntzak %27,8 eta Administrazio Publikoak %20,1.
Jarduera sektoreka, industriak 2010eko I+Gko gastuaren %43,7 kontzentratu zuen, eta zerbitzuek %54,2. Eraikuntzak eta lehen sektoreak %2,1 egikaritu zuten. Industria-enpresen artean, ondoko jarduera adarrek egikaritu zuten I+Gko barne gasturik handiena: Garraio materiala (%10,7), Beste makineria (%6,6) eta Metalezko artikuluak (%4,3). Zerbitzuetan, I+G Jarduerak (%34,3) eta Bestelako jarduerak (%8,3) dira baliabiderik gehien bideratzen dituztenak enpresen I+Gko barne gastura.
Finantzaketaren ikuspegitik, 2009ko antzeko portzentajeak mantentzen dira. Finantzaketa pribatuak, enpresen bidez, 733,9 milioi euro bideratu zituen ikerketara, guztizkoaren %53;9; finantzaketa publikoak 542,3 milioi (%39,9) eta goi-mailako irakaskuntzak 30,0 milioi (%2,.2). 49,8 milioi bideratu zituzten atzerriko funtsek (%3,7) eta 4,3 milioi irabazi-asmorik gabeko zenbait erakundek (%0,3).
Euskal AEkoTeknologia Zentroen pisua dela eta, egiten duten gastua 139,7 milioi eurokoa da (guztizkoaren %10,3); dedikazio osoko 1.751 langile ari dira teknologia zentroetan, guztizkoaren %10.
Azkenik, Espainiari eta 27-EBri dagokienez, BPGrekiko I+Gko gastuaren bilakaerari buruzko datu eskuragarririk ez dago 2010erako. Hala ere, eta aurreko urteak kontuan hartuta, ikusten da Espainiako batezbestekoarekin erkatuta, Euskal AEko BPGrekiko I+Gko gastu-portzentajeak alde handia zeukala, eta 27-EBren zifretara heltzen zela 2009an.
Argibide gehiago:
Euskal Estatistika Erakundea / Instituto Vasco de Estadística
Donostia-San Sebastián, 1 01010 Vitoria-Gasteiz
Tel.: +34-945-01 75 00 Faxa: +34-945-01 75 01 Helb. elek.: eustat@eustat.eus
Harremanetan jartzeko pertsona: José Miguel Escalada
Tel.: +34-945-01 75 96 Faxa: +34-945-01 75 01
Euskal AEko ikerketa eta garapen teknologikoko (I+G) jardueren estatistikari buruzko prentsa-ohar gehiago
Euskal AEko ikerketa eta garapen teknologikoko (I+G) jardueren estatistikari buruzko datu bankua