2011-12-01eko prentsa-oharra
Euskal AEko ospitaleetan 2010ean sartutako pertsonen %42,9k 65 urte eta gehiago zituen
Katarata eta bihotz-gutxiegitasuna izan ziren ospitalean sartzeko arrazoi nagusiak
Eustaten datuen arabera, Euskal AEko ospitale publiko eta pribatuek ospitalera sartutako pazienteen 318.194 alta izan zituzten 2010ean (2009an baino % 0,5 gehiago). Alten % 74 ospitale publikoetakoa izan zen eta % 26 pribatuetakoa.
65 urte eta gehiagoko pertsonen % 42,9 batez ere nerbio-sistemako eta zentzumenen organoetako gaixotasunak (katarata) eta zirkulazio-sistemakoak (bihotz-gutxiegitasuna) zirela kausa ospitaleratu ziren; horiek horrela, ospitaleratze gehienen eragileak gaixotasun mota horiek biak izan ziren.
Zehazki, nerbio-sistemako eta zentzumenen organoetako gaixotasunak ospitaleratze guztien % 12,1 izan ziren, eta zirkulazio-sistemakoak % 11,5. Hirugarren tokian digestio-aparatuko gaixotasunak egon ziren (%11,1) eta laugarren eta bosgarren tokian tumoreak eta gaixotasun osteomuskularrak (% 9,1 eta % 8,6, hurrenez hurren).
Ospitaleetako batez besteko egonaldia 6,1 egunekoa izan zen 2010ean, aurreko urtekoa baino % 3,2 gutxiago. Egonaldirik luzeenak, buruko gorabeherez beste, gaixotasun perinatalek eragindakoak izan ziren (12,3 egun); gaixotasun infekziosoak eta tumoreak egon ziren ondoren (9,1 eta 8,4 egun, hurrenez hurren).
Ospitalera sartutako pertsona guztien %51,7 emakumezkoak izan ziren, gizonak baino gehiago ospitaleratu zirenak haurdunaldien eta erditzeen ondorioz. 76 urtekoa izan zen ospitaleratzeko adinik arruntena.
Gizonetan zirkulazio-sistemako gaixotasunak izan ziren ospitaleratzeko arrazoi nagusiak (%13,8), gaixoaren adina aurrera egin ahala maizago; gaixotasun talde honetan arteroesklerosi koronarioa eta bihotz-gutxiegitasuna ugarienak izan ziren. Jarraian digestio-aparatukoak egon ziren (% 13,3), iztai-etena oroz gain, eta nerbio-sistemako eta zentzumenen organoetako gaixotasunak (%10,6), hauen artean katarata argi eta garbi nagusi.
Haurdunaldien ondorioz egindakoak dira emakumezkoetan ospitaleratze gehienen eragileak (% 15,8); salbuespen horrekin, sarrien gertatzen diren hiru gaixotasun- taldeak bat datoz emakumezkoetan eta gizonezkoetan, hurrenkera bestelakoa bada ere.
Katarata 65 urte eta gehiagoko emakumeetan nahiko sarri gertatzen den gaixotasuna denez gero (12.613 alta), nerbio-sistemako eta zentzumenen organoetako gaixotasunen taldea emakumeak ospitaleratzeko bigarren eragile nagusia izan zen (% 13,4). Hirugarren tokian zirkulazio-sistemakoak egon ziren (% 9,4), euren artean barizeak eta bihotz-gutxiegitasuna ugarienak. Laugarren postua digestio-aparatuko gaixotasunek hartu zuten (% 9), sarrien gertatzen direnen artean besikulako harria zegoela.
Beste gaixotasun-talde ohiko batzuk (20.000 alta baino gehiago) tumoreak, gaixotasun osteomuskularrak eta arnas aparatuarenak izan ziren. Tumoreen kokalekurik ohikoenak prostata, maskuria , bularra eta umetokia izan ziren. Tumoreak heriotzaren kausa arruntena dira oraindik ere Euskal AEko ospitaleetan (% 24,6); heriotzaren kausa gisa, trakeako minbizia, bronkioetakoa eta biriketakoa dira ohikoenak. Minbiziak eragindako batez besteko heriotza-adina 67 urtekoa izan zen.
Zahartzaroarekin zerikusia duten gaixotasun osteomuskularrak, osteoartrosia besteak beste, arnas-aparatuko gaixotasunen aurretik egon ziren; azken hauek % 8,3 egin zuten behera 2009ko datuekin alderatuta, gripe eta pneumonia-kasu gutxiago gertatu ziren eta.
Argibide gehiago:
Euskal Estatistika Erakundea / Instituto Vasco de Estadística
Donostia-San Sebastián, 1. 01010 Vitoria-Gasteiz
Tel.:+34-945-01 75 00 Faxa:+34-945-01 75 01 Helbide elektronikoa: eustat@eustat.eus
Harremanetarako pertsona: Marta de la Torre Fernández
Tel.:+34-945-01 75 48 Faxa:+34-945-01 75 01
Ospitaleetako erikortasunaren estatistikari buruzko prentsa-ohar gehiago
Ospitaleetako erikortasunaren estatistikaren datu-basea