2013/11/13ko prentsa-oharra
Euskal AEko BPGk urte arteko %1,1eko murrizketa izan zuen 2013ko hirugarren hiruhilekoan
Aurreko hiruhilekoaren aldean aldaketarik ez (%0,0)
Euskal AEko BPGk urte arteko %1,1eko tasa negatiboa izan du 2013ko hirugarren hiruhilekoan, aurrekoan baino ehuneko lau hamarren hobeto, Eustaten datuen arabera. Espainiako ekonomiaren beherakada %1,2 izan zenez INE-ren zenbatespenaren arabera, hamarren bat gutxiago murriztu da Euskal AEkoa.
Euskal AEko BPGk hiruhileko artekoan ez du aldaketarik izan (%0,0) 2013ko hirugarren hiruhilekoan. Hiruhilekoen arteko aldakuntza hau Espainiako ekonomiak edukitakoaren (%0,1) hamarren bat azpitik izan da.
Eskaintzaren ikuspuntutik BPGren urte arteko murrizketa lau jarduera-sektore handiei zor zaie. Bai Lehen Sektorean, bai Industrian, bereziki Eraikuntzan jaitsi da jarduera-maila. Zerbitzuetan gauza bera gertatzen da; denetan, lehen sektorean izan ezik, beherakadak apalagoak izan dira aurreko hiruhilekoak baino.
Lehen Sektoreak bilakaera negatiboa izan du urte artean (%-1,8), eta positiboa hiruhileko artean (%+25).
Industriak zortzigarren hiruhilekoz jarraian jokaera negatiboa (%-1,9) izan du urte artean; aurreko hiruhilekoan bezalaxe, hiruhilekoen arteko positiboa (%0,1) izan du. Hiruhilekoen arteko positiboa, eta urte arteko beherakada zortzi hamarrenez arindu da.
Eraikuntza gutxiago murriztu da, bai urte artean, bai hiruhileko artean. Urte artean %-5,2, aurreko hiruhilekoan baino ehuneko 1,4 puntu gutxiago; hiruhileko artean %-0,2.
Zerbitzuen jarduera osoak %0,4 beherakada erakusten du, bai hiruhileko artean, bai urte artean.
Urte artean, Zerbitzuen sektoreko hiru azpisektoreetatik bitan tasa negatiboak dauzkagu, eta hirugarrenean aldaketarik ez.
Urte artean Zerbitzuetako jarduera-jaitsierarik aipagarriena Merkataritza, Ostalaritza eta Garraioan da, %-1,4, eta ondoren Administrazio Publikoa, Hezkuntza, Osasungintza eta Gizarte zerbitzuak adarrean, %-0,1. Gainerako zerbitzuetan (jarduera profesionalak, finantzetakoak eta aseguruak, besteren artean) ez dago aldaketarik.
Hiruhileko artean hazkunderik handiena Administrazio Publikoa, Hezkuntza, Osasungintza eta Gizarte zerbitzuak adarrean dugu, %0,2. Merkataritza, Ostalaritza eta Garraioan %-0,7 eta Gainerako zerbitzuetan %-0,5.
Sektore-agregatuen joerak Balio Erantsiaren urte arteko bilakaera negatiboak ekarri ditu, %-1,1 urte artean eta %-0,1 hiruhileko artean. Urte artekoa ehuneko bost hamarren gutxiagoz murriztu da 2013ko bigarren hiruhilekoaren aldean. Hiruhilekoen artekoan aurrekoko jaitsiera-erritmo bera daukagu.
Eskariaren ikuspuntutik, berriz ere aurreko hiruhilekoan bezala, Barne eskariaren bilakaera negatiboa eta kanpo-sektorearen dinamismoa batera dauzkagu, hortik datorrelarik bere ekarpen positiboa BPGren hazkundeari. Ondasun eta zerbitzuen esportazioak eta inportazioak, bai urte artean, bai hiruhileko artean, bilakaera positiboa dute.
Familia-etxeen azken kontsumoaren gastuan (Kontsumo pribatuan), aurreko hiruhilekoetan bezala desazelerazioa dago: %1,3ko murrizketa aurreko urteko hiruhileko beraren aldean. Jaitsiera aurreko hiruhilekoa baino lau hamarren handiagoa da. Hiruhileko artean, aldakuntza-tasa negatiboa da, aurreko hiruhilekoan %0,0 izan zelarik.
Kontsumo publikoan (Administrazio publikoen azken kontsumoko gastua) tasa negatiboak berriz ere, baina bigarren hiruhilekoak baino apalagoak. Urte artean %-1,1 eta hiruhileko artean %-0,3.
Administrazio Publikoen Azken Kontsumo Gastuak eta Familia-etxeen Azken Kontsumo Gastuak baturik Azken Kontsumo Gastuaren %1,3ko jaitsiera ekarri dute. Aurreko hiruhilekoaren aldean ehuneko 0,3ko jaitsiera dugu.
Kapital eraketa gordinean (Inbertsioan) jaitsiera dago berriz urte artean (%-3,8), gutxixeago aurreko hiruhilekoan (%-4,0) baino. Urte arteko jaitsiera-erritmoa apaltzeak %0,6ko hiruhileko arteko hazkundea ekarri du. Kapital Eraketa Gordinaren bi osagaietan, ekipo-ondasunetan eta eraikuntzan, tasak negatiboak dira urte artean. Hiruhileko artean, ekipo-ondasunetako inbertsioaren bilakaera (%0,0) okerragoa da eraikuntzari lotutakoarena (%0,9) baino.
Barne eskariak, zeina osatzen baitute Azken Kontsumoko Gastuak eta Kapital Eraketa Gordinak, murrizte-mailari heltzen dio, aurreko urteko hiruhileko beraren aldean. Urte artean %1,8ko jaitsiera dago hiruhileko honetan, aurreko hiruhilekoan bezalaxe.
Kanpo-sektoreak berriz ere egin dio ekarpen positiboa BPGren bilakaerari. Kanpo-saldoa positibo egin dute ondasun eta zerbitzuen esportazioen urte arteko bilakaera positiboak, %5,5, eta inportazioen %4,0koak.
BPGren jaitsierak, behera eragin dio enplegu-mailari, Dedikazio Osoko Baliokidetzako Lanpostuetan neurturik. Urte artean enplegua %2,0 jaitsi da eta %0,3 hiruhileko artean.
Enplegua, urte artean eta hiruhileko artean, jarduera-adar guztietan galdu da. Lehen sektorean, %4,3 eta %1,2. Industria %4,0 jaitsi da urte artean, erritmoa moteltzen delarik; aurreko hiruhilekoaren aldean %0,3 jaitsi da. Eraikuntzaren enpleguan jaitsierak areagokoak dira Industrian baino, aurreko hiruhilekoan bezalaxe. Zerbitzuetan urte arteko eta segidako zortzigarren jaitsiera dago, %0,5. Hiruhileko artean, berriz ere, tasa negatiboak, %0,3.
Lurraldeetako BPGri begiratuz gero, urte artean Arabak du jaitsierarik handiena, %1,3; Gipuzkoan eta Bizkaian %1,0. Hiruhileko artean, Araban %0,3ko jaitsiera, Bizkaian %0,1; Gipuzkoan %0,3 hazi.
Informazio gehiago:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1. 01010 Vitoria-Gasteiz
Prentsa zerbitzua: servicioprensa@eustat.eus Tel.: 945 01 75 62
Euskal AEko Hiruhilekoko Kontu Ekonomikoen gaineko prentsa-ohar gehiago
Euskal AEko Hiruhilekoko Kontu Ekonomikoen gaineko datu-bankua