HomeGaiakJaiotzakPrentsa Oharrak Jaiotzak %10 gutxitu...

2013/12/13ko prentsa-oharra

EUSKAL AEko JAIOTZEN ESTATISTIKA (JAIE) 2013ko 2. hiruhilekoa

Jaiotzak %10 gutxitu ziren 2013ko bigarren hiruhilekoan

Ezkongabeko amen jaiotzak, %37

Euskal AEn jaiotako haur kopurua: 2013ko bigarren hiruhilekoan, Euskal AEn 4.820 haur jaio ziren, iazko aldi berean baino %10 gutxiago, Eustaten datuen arabera. Jaiotzak hiru lurraldeetan gutxitu dira: Gipuzkoan %-11,3, Bizkaian %-9,4 eta Araban %-9. Araban 793 haur jaio ziren, 1.571 Gipuzkoan eta 2.440 Bizkaian.

2013ko apiril, maiatz eta ekainean ezkontzaz kanpo jaioak guztizkoaren %37,1 izan ziren (%34,5 2012ko hiruhileko berean). Bizkaia (%37,3) izan zen Euskal AEko kopuru orokorraren gainetik ibilitako lurralde bakarra. Gipuzkoan eta Araban, %36,9.

Jaiotza-hurrenkeraren arabera, 2013ko bigarren hiruhilekoan, erdiak baino gehiago, 2.494, lehenengo haurrak izan ziren; 1.885 (%39,2) aurretik beste bat zegoen familietara iritsi ziren; hirugarren eta ondorengoak, %8,8.

Jaiotzen %18,8an amak 30 urte baino gutxiago zituen

Jaiotzak amaren adinaren arabera banatzen baditugu, ikusiko dugu 30-34 urteko amen taldea oraindik ere nagusi dela argi eta garbi, haien artean gertatu baitziren erditzeen %39,4. Talde horren ondotik, hurrengo goragoko taldea kokatu zen, hau da, 35-39 urte artekoa (%34,5). Askoz ehuneko txikiagoak dauzkate 25-29 urte bitartekoek (%13,6), 25etik beherakoek (%5,2) eta 40tik gorakoek (%7,3).

Ama ezkongabeen amatasun-adina ama izan direnen multzoarenaren azpitik dago; ama ezkongabeen %10,1 25 urtetik beherakoak baitziren, eta 25-29 urteen artekoak %16,9.

Amen %17,5 atzerritarra da

2013ko udaberrian Euskal AEn ama izandakoen %17,5 atzerritarrak ziren. Araba oso goitik dago, %24,8; Bizkaian %16,4 eta Gipuzkoan %15,7.

1. taula: Euskal AEn bizi den ama batengandik bizirik jaioak. Alderaketa taula.
Iturria: Eustat. Euskal AEko jaiotzen estatistika