2013/11/29ko prentsa-oharra
Zamudio, Zierbena eta Olaberria dira Euskal AEn per capita BPG handiena duten udalerriak
Arabako hiru eskualdek, berriz, biztanleko BPG balio handienak dituzte: Errioxa, Arabako ibarrak eta Gorbeiako inguruak
Euskal AEn, Eustaten datuen arabera, Zamudioko udalerriak, zeina Bizkaikoa baita, du biztanleko BPG handiena. Bigarren Zierbena (Bizkaia) eta hirugarren Olaberria (Gipuzkoa). Laugarren Loiu, bosgarren Ajangiz, Bizkaikoak; seigarren Legutio, Arabakoa.
Arabak du per capita BPG handiena, 107ko indizea, Euskal AEko batez bestekoa 100 delarik; Gipuzkoak 101, batez bestekoa ia, eta Bizkaiak 97.
Hiriburuetan Donostia (108) aurrena 2010ean; Gasteizek 102 eta Bilbok 97.
Udalerri bakoitzean BPGren sektore-banaketari begiratuz gero, Zamudion zerbitzuak (%50,7) eta industria (%45,7) dira nagusi, biak Teknologi Parkeko enpresa-jarduerarekin lotuak. Per capita BPG handienak dituzten hiru udalerrietako ezaugarria da lehen sektorearen pisu ezdeusa. Zierbenan (%80,4) eta Olaberrian (%72,4) industriak pisu handia da. Bi udalerrietan zerbitzuek pisu txikia dute, %18,0 eta %26,5.
Bilbon eta Donostian BPGren %85 pasa zerbitzuek sortua da; Gasteizen, aldiz, %65 inguru. Gasteizen industriak pisu handia (%24,1) du besteen aldean: Bilbon (%5,4), Donostian (%5,7).
Eskualdeka, Araban daude per capita BPG handienak dituzten lehenengo hirurak. Aurrena Errioxa (172) dugu, bai ardogintzaren sendotasunagatik, bai biztanle-dentsitate txikiagatik. Bertan Laguardia (337), Villabuena de Álava/Eskuernaga (200) eta Eltziego (188) nabarmentzen dira.
Arabako Ibarrak (160) dugu bigarren eta Gorbeiako Inguruak (146) hirugarren. Laugarren Debagoiena (Gipuzkoa, 127) dugu, eta bosgarren berriz ere Arabako bat, Mendialdea (123).
Eskualde hauetan, Arabako Mendialdean izan ezik, industriak pisu handia du balio erantsian, %50 batez beste, Euskal AEn %23,7 delarik. Kontrajarrita zerbitzuen sektorearen pisu txikiagoa dugu (%40 inguru), Euskal AEn %66,7 delarik.
2008-2010 aldian, Euskal AEko 251 udalerrietako 177tan (%71) per capita BPGk bilakaera negatiboa izan du. 148tan (%59) bilakaera negatibo hori Euskal AEko batez bestekoa (%-2,1, urteko batez besteko aldakuntza metatua) baino okerragoa izan zen. Lanestosak (%46,4), Orozkok (%31,0) eta Sukarrietak (%21,2) dituzte hazkunderik handienak. 20.000 biztanle baino gehiagoko udalerrietan, Durango (%8,8), Leioa (%5,9), Santurtzi (%3,9) eta Erandio (%3,6) nabarmentzen dira positiboan eta Errenteria (%-6,0), Barakaldo (%-5,2) eta Sestao (%-3,5) negatiboan. Hiriburuen artean, Gasteizek du bilakaerarik negatiboena (%-4,1ko urteko batez besteko metatua) per capita BPGn; Bilbon %-0,5 eta Donostian, berriz, %+0,3, eta honek jarri zuen hiruen arteko lehena 2010ean, Gasteiz ordeztuz.
1. grafikoa. Per capita BPGren banaketa eskualdeka 2010. euroak.
Iturria: Eustat. Udal BPG
Ohar metodologikoa:
Udal BPGren edizio berri honetan funtsezko bi aldaketa daude aurrez argitaratutako datuen aldean.
Lehena, bi urteetako zenbatespenarentzat erabilitako sektore-sailkapena 2009-JESN-n oinarritzen da (Jarduera Ekonomikoen Sailkapen Nazionalean)
Bigarren, bai 2008ko, bai 2010eko datuetarako, erreferentziako oinarri urtea 2010 da; erabilitako okupazio-aldagaia, “Lanpostuak”, erabateko alderagarritasuna ahalbidetzen delarik.
Informazio gehiago:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1. 01010 Vitoria-Gasteiz
Prentsa zerbitzua: servicioprensa@eustat.eus Tel.: 945 01 75 62
Euskal AEko udal BPGri buruzko prentsa-ohar gehiago
Euskal AEko udal BPGri buruzko datu-bankua