2013/12/19ko prentsa-oharra
Euskal enpresen %17,3k berrikuntza teknologikoa egin zuen 2012an, 10 langile eta gehiagokoen %36,2k
Berrikuntza teknologikoan eginiko gastua %3,4 gutxitu zen 2011ren aldean
Eustaten arabera, Euskal AEn 2012an enpresa berritzaileen portzentajea %17,3 izan zen, berrikuntza teknologikoa eta ez-teknologikoa zelarik. 10 enplegatu eta gehiagoko enpresak bakarrik kontuan hartuz, enpresa berritzaileak %36,2 dira, 2011n baino ehuneko 1,6 puntu gutxiago.
2010-2012 aldian berrikuntza teknologikoa eginiko enpresak guztien %11,6 izan ziren Euskal AEn; aurreko aldian baino ehuneko 0,7 puntu gutxiago. 19.466 enpresa. Enpresa berritzaile teknologikotzat hartzen dira merkatuan produktu berriren bat (ondasuna edo zerbitzua) edo asko hobetutako produkturen bat sartu dutenak (%6,5, 2012an), edota establezimenduaren baitan prozesu berriren bat edo asko hobetutako prozesua sartu dutenak (%9,5).
Ehuneko horiek %28,6raino iristen dira, 10 langile edo gehiagoko enpresak bakarrik kontuan hartuta, aurreko urtean baino ehuneko 2,1 puntu gutxiago. Enpresa horien artean, produktua eraberritu dutenak %19,6 izan dira, eta prozesua eraberritu dutenak %22,9.
Euskal AEko enpresek egindako gastua teknologia berritzeko jardueretan, BPGren %4 izan zen
Euskal AEko enpresek 2.583,7 milioiko gastua egin zuten 2012an teknologia berritzeko jardueretan; aurreko urtearen aldean %3,4 gehiago . Gastu hori BPGren %4 da.
Berrikuntzarako behar diren jarduera garrantzitsuenen artean banatuz gero, honako hauek nabarmentzen dira: barruko I+G (%53,1); makinak eta ekipoak erosteko gastua (%19,6); kanpoko I+Gren erosketa %14,3; gainerako jarduerak %13,0.
Enpresa berritzaileen %29,4k finantzaketa publikoa jasotzen du.
Laguntza horren jatorriari behatuz gero, Eusko Jaurlaritza nabarmentzen da, laguntza guztien %21,5. 10 langile edo gehiago dituzten enpresetan, %56,0k laguntzak jasotzen dituzte, eta Eusko Jaurlaritza da, halaber, enpresarik gehien finantzatzen duena. Zehazki, enpresen %45,8.
Enpresa berritzaileen %83,9k uste du berrikuntzak eragin positiboa duela
%80,5ek uste du berrikuntzak eragin positiboa duela produktuei buruz, ondasunak zein zerbitzuak izan; %58,3k barne-prozesuei buruz; %31,4k bestelakoei buruz, esaterako ingurumen inpaktu txikiagoa edo osasun hobea langileentzat.10 langile edo gehiagoko enpresa berritzaileetan, %92,8k uste du eragin positiboa duela; beste portzentajeak %85,1, %71,8, %55,2 eta %48,8 dira.
Faktore jakin batzuek teknologia-berrikuntza oztopatzen dutela uste du enpresen erdiak baino gehiagok
Enpresen %60,5ek uste du teknologia-berrikuntza zailtzen duten faktoreak badirela. Faktore horien artean, gehiegizko arrisku ekonomikoak (%43,0), berrikuntzen kostu handiegiak (%46,5), eta finantza-iturri falta (%45,9) nabarmentzen dituzte enpresek. 10 langile baino gehiagoko enpresetan, berrikuntza oztopatzen duten faktoreak badirela uste dutenak %70,1 dira, aipatutako oztopoak berberak direlarik.
Berrikuntza ez-teknologikoa (%11,6) antolaketa- edo merkaturatze-berrikuntzek osatzen dute. Antolaketa-berrikuntza enpresa barruan antolatze-metodo berriak ezartzea da enpresako barne-funtzionamenduan; euskal enpresen %6,9k egiten dute. Merkaturatzearena lehen erabili ez diren edo aurrekoak bezalakoak ez diren merkataritzako estrategia edo kontzeptuen egikaritzea da; Erkidegoko enpresen %6,1ek egiten dute. 10 langile eta gehiagoko enpresetan, berrikuntza ez-teknologikoa %23,1 da eta antolamenduan datza %18,7an eta merkaturatzean %11,6an.
Informazio gehiago:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1. 01010 Vitoria-Gasteiz
Prentsa zerbitzua: servicioprensa@eustat.eus Tel.: 945 01 75 62
Euskal AEko Berrikuntza Teknologikoaren Inkesta, BTI. Prentsa-ohar gehiago
Euskal AEko Berrikuntza Teknologikoaren Inkesta, BTI. Datu-bankua