2015/06/23ko prentsa-oharra
Euskal AEko eraikuntza kostuak %0,1 garestitu ziren 2015eko maiatzean aurreko hilaren aldean
2014ko maiatzaren aldean eraikuntza kostuak %0,9 jaitsi ziren
2015eko maiatzean, Euskal AEko Eraikuntza Kostuen Indizea %0,1 goratu zen, aurreko hilaren aldean, eta urte arteko tasa %0,9 jaitsi zen, Eustaten datuen arabera.
Aurreko hilekoaren aldean, ez zen aldatu eskulanaren kostua, baina lehengaien kostuak % 0,1 handitu ziren.
Azpisektoreka, etxegintzak eta obra zibilak bilakabide antzekoa izan zuten maiatzean lehengaien kostuei dagokienez, aurreko hilarekin alderatuta; izan ere, eraikuntzako lehengaiak % 0,1 garestitu ziren eta obra zibilekoak, berriz, % 0,3. Bi azpisektoreon urtetik urterako bilakaerari dagokionez, zeinu berekoak dira (zeinu negatiboa, izan ere), baina intentsitate desberdinekoak. Eraikuntzako lehengaien kostuak % 0,9 jaitsi ziren eta obra zibilekoak, aldiz, % 2,4.
Sektoreak kontsumitutako zenbait lehengairen urteko prezioak garestitu egin ziren (2015eko maiatzean, 2014ko maiatzekoen aldean). Nabarmentzekoak dira metalgintzakoak (% 1,1eko hazkundea), metalezko artikuluen sektorekoak (% 0,4ko hazkundea), zuraren industriakoak eta material elektronikoaren sektorekoak (% 0,3ko hazkundea azken biak). Aldiz, beste sektore batzuetako lehengaien prezioak txikitu egin dira hamabi hilabete hauetan. Aipatzekoak dira petrolioaren finketaren sektorekoak (% 14,0 txikiagoak), industria kimikoarenak (% 2,0 txikiagoak) eta mineral ez metalikoen sektorekoak (% 1,9 txikiagoak).
Informazio gehiago:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1. 01010 Vitoria-Gasteiz
Prentsa zerbitzua: servicioprensa@eustat.eus Tel.: 945 01 75 62
Euskal AEko Eraikuntzako kostuen indizeari buruzko prentsa-ohar gehiago (EEKI)
Euskal AEko Eraikuntzako kostuen indizeari buruzko datu-bankua (EEKI)