2020/09/15eko prentsa-oharra
JAIOTZEN ESTATISTIKA. 2020/I
Jaiotzak egonkor mantendu ziren 2020ko lehen hiruhilekoan Euskal AE osoan
Lurraldeka, bilakaera desberdina izan da: Bizkaian % 2,2 hazi dira, Gipuzkoan egonkor mantendu dira, eta Araban % 6,3 jaitsi dira
Eustatek landutako datuen arabera, 2020ko lehen hiruhilekoan 3.723 haur jaio ziren Euskal AEn, hau da, aurreko urteko aldi berean baino % 0,1 gutxiago. Jaiotza-kopurua % 2,2 hazi da Bizkaian; Araban, ordea, % 6,3 jaitsi da, eta Gipuzkoan egonkor mantendu da. Zehazki, Bizkaian 1.862 haur jaio ziren; Gipuzkoan, 1.265; eta Araban, 596.
Jaiotzak amaren adinaren arabera banatzen baditugu, 35-39 urteko amen taldea nagusi da erditzeen % 34,6rekin. Ondoren 30-34 urteko amena da, % 34,3rekin, eta 25-29 urtekoena, % 14,2rekin.
2019ko hiruhileko berarekin alderatuta, 40 urte edo gehiagorekin ama izan diren emakumeen kopuruak behera egin du: 2019an 421 izan ziren, eta 2020an, 404. Emakume horien jaiotzak guztizkoaren % 10,9 izan dira (% 11,3 2019an), 25 urtetik beherako amen jaiotzak (% 6,1) baino gehiago.
Ezkontzaz kanpoko jaiotzak guztizkoaren % 44,6 izan ziren, 2019ko lehen hiruhilekoan izandako kopuruaren antzekoa (% 44,8). Bizkaiak eta Arabak Euskal AE osoak baino balio handiagoak dituzte, % 46 pasatxo; Gipuzkoan, aldiz, ehuneko hori txikiagoa da (% 41,2). Ama ezkongabeen amatasun-adina ama guztiena baino txikiagoa da, eta nabarmentzekoa da ezen haien % 9,1ek zituztela 25 urte baino gutxiago.
Jaiotza-hurrenkeraren arabera, 2020ko lehen hiruhilekoan jaiotzen % 49,1 (1.827 haur) lehenengo haurrak izan dira; 1.410 (% 37,9) aurretik beste bat bazen familietara iritsi dira; eta hirugarren eta ondorengoak % 13,1 izan dira, hau da, 0,5 puntu gehiago 2019ko hiruhileko beraren aldean.
Gora doa, % 28,4ra, atzerriko naziotalitatea duten amen ehunekoa
2020ko lehen hiru hilabeteetan Euskal AEn izandako jaiotzen % 28,4tan amak atzerriko nazionalitatea zeukan; hori 2019ko hiruhileko berean izandako ehunekoa baino puntu bat handiagoa da. Zifra hori handiagoa izan zen Araban, % 35,7: aldiz, Bizkaian % 26,7 izan zen, eta Gipuzkoan % 27,6.
Informazio gehiagorako:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1 01010 Vitoria-Gasteiz
Prentsa-zerbitzua: servicioprensa@eustat.eus Tlf: 945 01 75 62