2020/09/09ko prentsa-oharra

INDUSTRIA PRODUKZIOAREN INDIZEA. 2020KO UZTAILA

Euskal AEko industria-jarduera 12,4 % murriztu da 2020 uztailean

Aurreko hilabetearekin alderatuta, 2020ko ekaina, industria-sektoreak % 3,0 egin du gora ekoizpenean

Eustaten datuen arabera, eta lan-egutegiko termino homogeneoetan, Euskal AEko industria-produkzioa % 12,4 murriztu da 2020ko uztailean, 2019ko hil beraren aldean. Urte arteko jaitsiera hori txikiagoa da martxotik aurrera —hil hori barne— izandako jaitsierak baino.

Urtaroen eragina zuzenduta, % 3,0 hazi da Euskal AEko industria-produkzioa 2020ko uztailean aurreko hilarekin, ekainarekin, alderatuta.

2020ko lehen zazpi hilabeteetako balantzea industria-jardueraren % 16,2ko uzkurtze metatuarekin itxi da.

2020ko uztaileko indizearen bilakaera, 2019ko uztailarekin alderatuta, negatiboa da industria-sektore handi guztietan. Kontsumo-ondasunak, oro har, % 3,9 jaitsi dira urte batetik bestera; izan ere, Kontsumo-ondasun iraunkorrak % 8,3 jaitsi dira, eta Kontsumo-ondasun ez iraunkorrak % 2,9. Kontsumo-ondasun iraunkorrak epigrafean altzariak, etxeko tresnak edo produktu elektronikoak fabrikatzeko jarduerak daude. Elikagaien fabrikazioa, prozesatzea eta kontserbazioa, garbiketarako eta higienerako produktuen fabrikazioa eta jantziak egitea dira, besteak beste, Kontsumo-ondasun ez-iraunkorren sektore handiaren barruko jarduerak.

Bestetik, Ekipo-ondasunak % 10,6 jaitsi dira; Bitarteko ondasunak, aldiz, % 12,6 murriztu dira. Lehenengoen artean, motordun ibilgailuen fabrikazioa, tren-makinen eta trenbide-materialen fabrikazioa edo aireontziak eta itsasontziak egitea dira nagusi; bigarrenen artean, berriz, metalurgiako eta metalezko produktuen fabrikazioko jarduerak, industria kimikoa edo kautxuzko eta plastikozko produktuen fabrikazioa.

Energiak, azkenik, % 14,7 egin du behera, behin zuzenduta dagozkion egutegi-efektuak. Sektore horretako jarduera azpimarragarrienen artean energia elektrikoa hornitzea eta petrolioa fintzea daude.

Hilabete arteko aldakuntzak, 2020ko uztaila 2020ko ekainaren gainean, berriz, bilakaera positiboa izan du industria-sektore handi guztietan, urtaroen ondorioak zuzendu ondoren. Kontsumo-ondasunak, oro har, % 2,6 hazi dira, bi portaera desberdinen konbinazioz: Kontsumo-ondasun ez iraunkorrak % 3,3 hazi dira, eta Kontsumo-ondasun iraunkorrak % 0,6 jaitsi. Ekipo-ondasunak % 3,3 igo dira, eta Bitarteko ondasunak % 2,4. Azkenik, Energia % 3,8 hazi da hilabete artean, behin zuzendurik urtaroen eraginak.

Maila bereiziago batean, Euskal AEko industrian pisu handiena duten sektoreen artean, 2020ko uztailean jaitsiera handienak izan dituztenak, urtetik urterako aldaketetan, honako hauek izan dira: Metalurgia eta produktu metalikoak (% 20,7 behera), Energia elektrikoa, gasa eta lurruna (% 16,8) eta Material eta ekipo elektrikoa (% 10,6), egutegiaren ondorioak zuzendu ondoren.

Lurraldeetan, Industria produkzioaren indizearen uztaileko urte arteko bilakaera negatiboa izan da hiruretan. Halatan, Bizkaian % 14,4ko beherakada izan da, Gipuzkoan % 11,9koa eta, azkenik, Araban % 10,1ekoa.

Hilabete arteko terminoetan, 2020ko uztaila 2020ko ekainaren aldean, behin zuzenduta urtaro-eraginak, ekoizpena % 5,2 hazi da Bizkaian, % 1,9 Araban eta % 1,6 Gipuzkoan.

INFORMAZIO OHARRA

Egutegiaren ondorioak zuzentzeko eta serieak urtaro-ondoriorik gabe uzteko erabilitako modeloek COVID-19ak aztertutako aldagaietan duen eragina barne hartzen dute, Europar Batasuneko Estatistika Bulegoak (Eurostat) Guidance on Time Series Treatment in the context of the COVID-19 crisis ohar metodologikoan emandako gomendioei jarraituz.

Eustatek eskerrak eman nahi dizkie lagundu duten establezimendu guztiei egindako ahaleginagatik aparteko zirkunstantzia hauetan. Haiei esker, uztaileko indizea laginaren % 86,28ko estaldurarekin kalkulatu da (laginaren informazioa abuztuan zehar jaso da).

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62