2020/11/27ko prentsa-oharra

OSPITALEETAKO ERIKORTASUN ESTATISTIKA. 2019

Pixka bat murriztu dira ospitaleratzeak, 2019an, Euskal AEn, eta kausa nagusia gaixotasun digestiboak dira

Kirurgia anbulatorioaren modalitatean ospitaleratzeak % 4,1 areagotu ziren, eta begietako gaixotasunak izan ziren kausa nagusi

Guztira, 234.674 ospitaleratze erregistratu ziren 2019an, Euskal AEko akutuen ospitaleetan (ez dira kontuan hartzen egonaldi ertaineko eta luzeko ospitaleak eta psikiatrikoak); alegia, aurreko urtearen aldean, % 0,4 gutxiago, Eustaten datuen arabera. Ospitaleratzeen % 84 ospitale publikoetan izan ziren, eta urtarrila izan zen ospitaleratze gehieneko hila. Ospitaleratzeen erdia 65 urteko eta gehiagoko pertsonei dagokie, eta gaixotasun digestiboak izan ziren ospitalizazio-kausa nagusia. Gainera, kirurgia anbulatorioaren modalitatean, 82.490 ospitaleratze erregistratu ziren (+% 4,1), eta kausa nagusia, kasu horretan, kataraten interbentzioa da.

Digestio-aparatuaren gaixotasunak (% 13,5) eta zirkulazio-aparatukoak (% 12,8) eta arnasketakoak (% 11,9) izan ziren ospitaleratzeko kausa nagusiak; ondoren, antzeko pisuarekin, tumoreak (% 9,4), traumatismo eta lesioak (% 9,1) eta aparatu muskuloeskeletikoko gaixotasunak (% 8,8). 2018arekin erkatuta, behera egin dute arnas gaixotasunen ondoriozko ospitaleratzeak (-% 7,6) eta haurdunaldiagatiko, erditzeagatiko eta puerperioagatiko arretarenek (-% 3,5).

Emakumeen artean, haurdunaldi, erditze eta puerperioen gertakariek, nahiz eta urte hauetan behera egin duten, jarraitu zuten ospitale-arretako motibo maizena izaten (% 14,6), ondoren digestio-gaixotasunek (% 11,9), zirkulaziokoek eta arnasketakoek (azken biak, % 11 inguru).

Ospitaleratzeen % 51 gizonei dagokie, eta haiek ospitaleratzeko kausa nagusiak emakumeen berak izan ziren, baina prebalentzia handiagoarekin: digestio-aparatuaren gaixotasunak (% 15,1), zirkulaziokoak (% 14,9) eta arnasketakoak (% 13,2).

Ospitaleratze-eremuan artatutako osasun-arazoek harreman estua dute adinarekin: 0 eta 14 urte bitartekoetan, arnasketa gaixotasunak eta jaiotza inguruko jatorrikoak nagusitu ziren; 15 eta 44 urte bitartekoetan, haurdunaldiari, erditzeari eta puerperioari lotutako ospitaleratzeak; 45 eta 64 urte bitartekoetan, digestio-gaixotasunak eta tumoreak, eta 65 urtetik aurrerakoetan, zirkulaziokoak; ondoren, 65 eta 79 urte bitartekoetan, digestiboak, eta, 80 urteko eta gehiagokoetan, arnasketakoak. Nabarmendu behar da ospitaleratze guztien % 50 65 urteko eta gehiagoko kolektiboarena izan zela.

Urtarrilean ospitaleratzeak abuztukoak baino % 50 handiagoak izan ziren

Urtarrila izan zen ospitaleratze-kopuru handiena izan zuen hila, 23.000 inguru izan baitzituen, eta kausa nagusia arnas gaixotasunak (% 21) izan ziren; urtaroak pisu handia du horretan. Abuztua izan zen ospitaleratze gutxieneko hila (15.011 ospitaleratzea).

Artatutako patologien eredua ospitalearen titulartasunaren arabera aldatu egiten da. Ospitale publikoetan -bertan erregistratu ziren ospitaleratze guztien % 84-, gaixotasun maizenak digestio-aparatukoak eta zirkulaziokoak izan ziren (biak % 13,6), eta, pribatuetan, aparatu muskuloeskeletikoan eta ehun konektiboan (% 18,6) eragina dutenak.

Ospitale-egonaldiak, batez beste, 5,6 egunekoak izan ziren (2018an 5,7); luzeenak nahasmendu mentalen ingurukoak izan ziren (14 egun), ondoren jaiotza inguruko jatorriko gaixotasunak (10,5 egun) eta infekziosoak (8,6 egun).

Kirurgia anbulatorioaren % 36 kataraten eta begiaren gaixotasunen ingurukoa izan zen

Kirurgia anbulatorioaren modalitatean ospitaleratzen den egunean bertan konpontzen diren prozesuei ematen zaie arreta; hartan, 82.490 gertakari erregistratu ziren (% 4,1 gehiago 2018aren aldean). Begiaren gaixotasunen taldea izan zen ohikoena, arreten % 35,8 hartu baitzuen; haietatik, % 88 ospitale publikoetan egin zen eta % 12, pribatuetan, eta katarata izan zen patologia tratatuena.

Bigarren postuan, aparatu muskuloeskeletikoko gaixotasunak egon ziren (% 11,4); hartan, prozeduren % 61 ospitale pribatuetan gertatu zen, eta belauneko nahasmenduak izan ziren ohikoenak gizonetan, eta atzamarretako eta behatzetako deformazio hartuak emakumeetan.

Ohar metodologikoa:

Nazio- eta nazioarte-mailako erkagarritasuna dela eta, ospitaleratzearen modalitatean 1 eguneko edo gehiagoko egonaldia duten gertakariak baino ez dira kontuan hartzen; alegia, ez dira kontuan hartzen 0 eguneko gertakariak. Egonaldiaren iraupena ospitaleratu den egunetik alta eman arteko egunera bitartean igaro den egun-kopuruaren arabera kalkulatzen da, ospitaleratze- edo alta-orduak aintzat hartu gabe.

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastian kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62