2021/04/26ko prentsa-oharra

ERAIKUNTZAREN KOSTUEN INDIZEA. 2021EKO MARTXOA

Euskal AEko eraikuntzaren kostuak % 0,3 igo dira 2021eko martxoan aurreko hilaren aldean

Aurreko urtearekin alderatuta (2021eko martxoa 2020ko martxoarekiko), kostuak % 1,6 igo dira

Euskal AEko Eraikuntzaren kostuen indizea % 0,3 igo da 2021eko martxoan, aurreko hilaren aldean. Urte arteko terminoetan, kostuak % 1,6 igo dira, Eustatek landutako datuen arabera.

Etxegintzaren sektoreko kostuak % 0,2 igo dira hil arteko terminoetan, eta Obra Zibilekoak % 0,8. 2020ko martxoarekin alderatuta, bestalde, prezioen aldakuntza positiboa ere izan da: % 1,6 Etxegintzaren kasuan eta % 1,7 Obra Zibilarenean.

Aurreko hilabetearen aldean lehengaien kostuak % 0,5 igo dira, eta eskulanaren kostuak ez du aldaketarik izan (% 0,0). Urtetik urterako terminoetan, igoerak % 1,5 izan dira lehengaien kasuan eta % 1,9 eskulanaren kasuan.

Martxoan, Etxegintzaren azpisektoreak hil arteko % 0,3ko igoera izan du bere lehengaien kostuan, eta Obra Zibilaren azpisektoreak % 1,0koa. Urte arteko bilakaeran, Etxegintzako lehengaien kostuak % 1,5 igo dira, eta Obra Zibilekoak % 1,6.

Sektoreak kontsumitutako lehengaien prezioei dagokienez, 2021eko martxoan, 2020ko martxoaren aldean, honako sektore hauek nabarmendu dira igoeretan: Petrolioa fintzea (% 23,8), Metalurgia (% 11,8) eta Material elektronikoa (% 6,9). Aitzitik, prezioek behera egin dute sektore hauetan: Mineral ez-metalikoak (% 1,8 behera egin duena), Makineriaren fabrikazioa (% 1,6 behera) eta Energia elektrikoa eta gasa (% 1,5 behera).

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62