2022/10/28ko prentsa-oharra
OSPITALEETAKO ERIKORTASUN ESTATISTIKA. 2021
Euskal AEko akutuen ospitaleetako ospitaleratzeak % 5,8 igo ziren 2021ean
Ospitaleratzeak gehitu ziren, baina arnas gaixotasunengatiko ospitaleratzeak % 7,2 jaitsi
Eustaten datuen arabera, 2020an COVID-19aren ondorioz ospitalizazioek behera egin ondoren, Euskal AEko akutuen ospitaleetan % 5,8ko hazkundea izan zen 2021ean, 221.264 ospitaleratzerekin. Ospitaleratzeen % 83,3 ospitale publikoetan izan ziren, eta % 16,7 pribatuetan. COVID-19a ospitaleratzeen % 5,1 izan zen. Gainera, kirurgiako modalitatea, 82.104 gertakari zenbatu zituena, % 25 igo zen 2020. urtearekin alderatuta, eta pandemiaren aurreko balioetatik hurbil geratu zen.
Zirkulazio-aparatuko eta digestio-aparatuko gaixotasunak izan ziren 2021ean ospitaleratzeko arrazoi nagusiak (biak % 13,1ekin); ondoren, ehunekotan bat etorriz, tumoreak eta traumatismoak eta lesioak (% 9,5) eta aparatu muskuloeskeletikoko gaixotasunak (% 8,2) izan ziren. 2020arekin alderatuta, arnas aparatuko gaixotasunen taldeak % 7,2 egin zuen behera, batez ere gripearen, pneumoniaren eta beste arnas nahasmendu batzuen kasuen kopuruak behera egin zuelako, eta, ondorioz, seigarren lekuan geratu zen (bosgarren postuan zen 2020an, eta hirugarrenean 2019an).
Ospitaleratutako pertsonen profilari dagokionez, % 51 gizonak izan ziren eta % 49 emakumeak; % 49,7k 65 urte eta gehiago zituzten, eta 73 urte izatea zen ohikoena gizonen artean eta 84 emakumeen artean. Lurraldeka, % 50,6 Bizkaian bizi ziren, % 31,8 Gipuzkoan eta % 15,1 Araban; gainerakoak (% 2,5) probintzia mugakideetakoak izan ziren (Burgos, Kantabria eta Nafarroa).
Haurdunaldia, erditzea eta erdiberriaroa kontuan hartu gabe, gizonak eta emakumeak bat etorri ziren ospitalizazio-kausa nagusietan, baina prebalentzia handiagoa izan zuten gizonen artean zirkulazio-aparatuko gaixotasunetan D % 15,2 eta emakumeen % 11) eta digestio-aparatuko gaixotasunetan D % 14,3 eta % 11,8, hurrenez hurren)
Euskal AEko akutuen ospitaleetako ospitaleratzeak, gaixotasun ohikoenen taldeen eta adin-taldeen arabera. 2021
| | Guztira | % | Aldaketa-tasa | Adina (%) |
| | | | (%)2021/2020 | 0-14 | 15-44 | 45-64 | 65-79 | 80 eta gehiago |
| DIAGNOSTIKO-TALDE HANDIAK | | | | | | | | |
| Guztira | 221.264 | 100 | 5,8 | 100 | 100 | 100 | 100 | 100 |
| Zirkulazio-aparatua | 29.046 | 13,1 | 9,9 | 0,8 | 2,4 | 10,9 | 16,6 | 23,6 |
| Liseri-aparatua | 28.887 | 13,1 | 6,6 | 10,5 | 10,8 | 15,0 | 13,5 | 12,7 |
| Neoplasiak | 21.118 | 9,5 | 6,7 | 1,0 | 4,0 | 12,1 | 13,9 | 7,6 |
| Traumatismoak eta lesioak | 21.100 | 9,5 | 8,3 | 9,9 | 9,4 | 10,4 | 7,8 | 10,8 |
| Aparatu muskulueskeletikoa | 18.182 | 8,2 | 10,8 | 2,8 | 6,3 | 11,9 | 9,9 | 4,3 |
| Arnas aparatua | 17.500 | 7,9 | -7,2 | 21,2 | 5,5 | 5,7 | 7,3 | 11,0 |
| Aparatu genitourinarioa | 15.946 | 7,2 | 9,0 | 3,7 | 6,3 | 7,7 | 8,2 | 6,8 |
| Haurduntza, erditzea eta erdiberriaroa | 15.436 | 7,0 | -2,5 | 0,1 | 34,3 | 0,3 | - | - |
| Helburu berezien kodeak (COVID-19) | 11.247 | 5,1 | 7,3 | 1,2 | 3,8 | 7,2 | 5,4 | 4,0 |
Ehunekoa ospitaleratze guztien gainean kalkulatu da
CIE -10 : Gaixotasunen Nazioarteko Sailkapena, 10. bertsioa
Data 2022ko Urriaren 28a
Iturria: Eustat. Ospitaleetako erikortasun-inkesta
Adinaren arabera, beste gaixotasun-talde batzuek hartzen dute protagonismoa; hala, 0-14 urte bitarteko populazioan arnasketakoak izan ziren (bronkiolitis akutua eta amigdalen eta adenoideen hipertrofia); 15-44 urte bitartean, emakumeen artean erditze- eta haurdunaldi-arretak, eta gizonen artean traumatismoak eta lesioak (lotailu gurutzatuko bihurritua); 45-64 urte bitartekoen artean, digestio-aparatukoak (iztaiko hernia) nabarmendu ziren gizonen artean, eta tumoreak (bularra eta umetokia) emakumeen artean; 65 urte eta gehiagokoen artean, zirkulazio-gaixotasunak nabarmendu ziren (bihotz-gutxiegitasuna).
Batez besteko egonaldia 5,7 egunekoa izan zen
Ospitaleko egonaldien batez besteko iraupena 5,7 egunekoa izan zen (5,8 egun 2020an); luzeenen artean, nahasmendu mentalak (13,2 egun), jaiotza inguruko jatorriko gaixotasunak (10,6 egun) eta COVID-19a (9,5 egun) izan ziren.
Ospitaleratzeen % 5,1 COVIDagatik izan ziren
Akutuen ospitaleetako ospitaleratzeen 11.247tan arrazoi nagusia COVID-19a izan zen, zeina 2021ean ospitaleratzeen % 5,1 izan baitzen. Gainera, ospitaleratze horiek 106.608 egonaldi eragin zituzten, hau da, 9,5 eguneko batez besteko egonaldia (10,1 egun gizonetan eta 8,5 emakumeetan).
Ospitaleratzeen hileko bilakaeraren arabera, otsaila, apirila-maiatza, abuztua eta abendua dira kasu gehien izan duten hilabeteak.
COVID-19ak eragindako ospitaleratzeen % 59,9 gizonenak izan ziren, eta % 40,1 emakumeenak. Adin-taldeen arabera, kasurik gehienak 45-64 urte bitartekoek izan zituzten (% 37,3), ondoren 65-79 urte bitartekoek (% 30), 80 urte eta gehiagokoek (% 16,8) eta 15-44 urte bitartekoek (% 15). Halaz ere, azken talde horrek protagonismo berezia izan zuen uztailean eta abuztuan, non gainerako adin-tarteak gainditu baitzituen.
Kirurgia anbulatorioko arretak gora egin zuen ia pandemiaren aurreko mailetaraino
Kirurgia anbulatorioaren modalitatean, zeinean ospitaleratzearen egun berean ebazten diren prozesuak artatzen baitira, 82.104 gertakari zenbatu ziren. Zifra hori 2019an erregistratutakoaren antzekoa da (82.490); horietatik, % 57,9 ospitale publikoetakoak izan ziren, eta % 42,1 pribatuetakoak.
Pazientearen patroiari dagokionez, % 52,5 emakumeak izan ziren, eta % 47,5 gizonak, eta gehienak (% 62,2) 45 eta 79 urte bitartekoak. Begietako eta haiekin loturiko gaixotasunen taldean egin zen ebakuntza kirurgiko gehien (% 32,9), bereziki begi-lausoko kirurgian eta, gehienetan, ospitale publikoetan.
Ospitale pribatuetan pisu handiagoa izan zuten aparatu muskulu-eskeletikoarekin lotutako kasuek (belauneko barne-nahasmendua gizonetan eta eskuetako eta oinetako hatzen deformazioak emakumeetan), larruazaleko afekzioekin batera.
Euskal AEko akutuen ospitaleetako kirurgia anbulatorioko pazienteak, sexuaren eta titulartasunaren arabera. 2021
| | 2021 | 2020 | 2019 | 2021 (%) | Sexua (%) | Titulartasuna (%) |
| | | | | | Gizon | Emakumea | Publikoa | Pribatua |
| DIAGNOSTIKO-TALDE HANDIAK | | | | | | | | |
| Guztira | 82.104 | 65.731 | 82.490 | 100 | 100 | 100 | 100 | 100 |
| Begiko eta anexuetako gaixotasunak | 27.026 | 23.256 | 29.552 | 32,9 | 30,2 | 35,4 | 48,2 | 12,0 |
| Aparatu muskulueskeletikoa | 9.066 | 7.300 | 9.439 | 11,0 | 11,2 | 10,9 | 6,8 | 16,9 |
| Liseri-aparatua | 7.735 | 5.761 | 6.844 | 9,4 | 12,5 | 6,7 | 9,4 | 9,4 |
| Neoplasiak | 6.683 | 6.031 | 6.238 | 8,1 | 6,1 | 10,0 | 6,6 | 10,2 |
| Azaleko gaixotasunak | 6.417 | 4.161 | 6.077 | 7,8 | 8,3 | 7,4 | 1,4 | 16,7 |
Ehunekoa ospitaleratze guztien gainean kalkulatu da
CIE -10 : Gaixotasunen Nazioarteko Sailkapena, 10. bertsioa
Data 2022ko Urriaren 28a
Iturria: Eustat. Ospitaleetako erikortasun-inkesta
Ohar metodologikoa:
Estatuko eta nazioarteko konparagarritasunagatik, ospitaleratze-modalitatean egun 1eko edo gehiagoko egonaldia duten gertakariak bakarrik hartzen dira kontuan, hau da, ez dira zenbatzen 0 eguneko egonaldia dutenak. Egonaldiaren iraupena kalkulatzen da egun-kopurua bezala ospitaleratze-datatik altakora arte, kontuan izan gabe ospitaleratzeko edo altako orduak.
Informazio gehiagorako:
Eustat - Euskal Estatistika Erakundea / Instituto Vasco de Estadística
Donostia-San Sebastián, 1 01010 Vitoria-Gasteiz
Prentsa-zerbitzua: servicioprensa@eustat.eus Tlf: 945 01 75 62