2022/12/07ko prentsa-oharra

UDAL BPG. 2020

Zamudiok, Olaberriak eta Ajangizek jarraitzen dute izaten, 2020an, Euskal AEn per capita BPG handiena duten udalerriak

Euskal AEko hiru hiriburuak dira BPG bolumen handiena sortzen duten udalerriak, eta, haietan, zerbitzuetako jarduerak nagusitzen dira

Zamudioko udalerriak, Bizkaiko lurralde historikoan, Euskal AEn per capita1 barne-produktu gordinik handiena duen udalerria izaten jarraitzen du 2020an, eta, ondoren, Olaberriak, Gipuzkoan, eta Ajangizek, Bizkaian ere bai, Eustatek emandako datuen arabera. 2000. urtean ez bezala, 2020an Ajangiz eta Loiu per capita BPG handiena duten lehen bost udalerrien artean daude, eta Izurtza eta Legutio udalerriak, berriz, ez.

Emaitza horiek COVID-19ak 2020an eragindako pandemiaren ondoriozko testuinguru sozial eta ekonomikoaren barruan aztertu behar dira; izan ere, Euskal AEko ia udalerri guztien BPGren bilakaera negatiboan du eragina.

Zamudio (Bizkaia) egitura ekonomiko sendoko udalerria da; egitura ekonomiko hori industria- eta zerbitzu-enpresetan oinarritzen da. Olaberria, Gipuzkoan, eta Ajangiz, Bizkaian, bigarren eta hirugarren postuetan daude, hurrenez hurren. Berantevilla, Araban, bederatzigarrren postuan dago per capita BPG handiena duten udalerrien artean. Udalerri horiek industria-izaera nabarmena dute, eta industria-sektorearen pisua % 75,0etik gorakoa da guztietan.

Gasteizek Arabako BPGren % 73,4 sortzen du

Gasteizek, Arabako lurralde historikoko hiriburuak, lurraldeko BPGren % 73,4 kontzentratzen du. Era berean, Araban biztanle-kontzentrazio handiena duen udalerria izanik, BPG hori sortzen duten zerbitzuen bolumen handia ere biltzen du; Higiezinen jarduerak eta Administrazio publikoen jarduerak dira nabarmenenak.

Oro har, BPG gehien sortzen duten Arabako lurraldeko 6 udalerriek lurraldeko guztizkoaren % 87,0 kontzentratzen dute. Laudio da Araban BPG gehien duen bigarren udalerria, Beiraren industria edo industria horrekin lotutako Handizkako merkataritza jarduerei esker, besteak beste. Hirugarren eta laugarren postuan Amurrio eta Legutio daude; haien enpresa-egitura industrian oinarritzen da.

Bosgarren postuan Oion dago; udalerri horrek industria-izaera nabarmena du, hala nola Edariak edo Ingeniaritza mekanikoa jarduerengatik. Seigarren postuan, Iruña Oka dago; udalerri horren egitura ekonomikoa, nagusiki, Administrazio publikoen jarduerak edo Salgaietarako lurreko beste garraio batzuk zerbitzuetan oinarritzen da.

Iturria: Eustat. Udal BPG

Bilbo Handiko sei udalerrik Bizkaiko BPGren % 54,2 kontzentratzen dute

2020an BPG gehien sortu duten Bizkaiko udalerrien artean, Bilbo Handia eskualdeko udalerrien kontzentrazio handia dago. Bertan, lurraldean BPG gehien duten 6 udalerri daude; haietan, Bizkaiko guztizkoaren % 54,2 kontzentratzen da. Zerrenda horren buru Bilboko udalerria dago; 2020an, Bizkaiko BPGren % 31,9 sortu du.

Bilbo, Barakaldo, Leioa, Getxo eta Basauri Bilbo Handiko udalerriak dira rankingeko buru, eta haiek guztiek honako bereizgarri hauek dituzte: 30.000 biztanle baino gehiago dituzte eta zerbitzuen sektoreak presentzia handia du. Nabarmentzekoak dira Higiezinen jarduerak eta Administrazio publikoen jarduerak, bai osasun-arlokoak bai hezkuntzakoak, eta Merkataritza, besteak beste.

Zamudio BPG bolumen handiena duten gainerako udalerrietatik bereizten da, biztanle gutxiko udalerria delako (3.400 biztanle baino gutxiago), eta haren ekoizpen-egitura industria-sektorean (% 45,5) eta zerbitzuen sektorean (% 50,4) oinarritzen delako. Garrantzia berezia dute udalerrian Garraio-materialaren ekoizpenari lotutako enpresek, bai eta industriari lotutako Zerbitzu profesionalak eta teknikoak eskaintzen dituzten enpresek ere.

Iturria: Eustat. Udal BPG

Gipuzkoan biztanle gehien duten udalerrien BPG zerbitzuen sektorean oinarritzen da

Gipuzkoako lurralde historikoan sortutako BPGren % 50,4 6 udalerrik sortzen dute, eta % 29,6, lurraldeko hiriburuak baino ez, Donostiak.

BPG handiena duten udalerrien egitura sektoriala kontuan hartuta, oro har, zerbitzuen sektorearen pisu handiena nagusitzen da, batik bat biztanle kopuru handiko (50.000 biztanle baino gehiago) udalerrietan, besteak beste, Donostian eta Irunen. Esanguratsuak dira Higiezinen jarduerak bi udalerrietan, bai eta Administrazio publikoak Donostian edo Salgaietarako lurreko beste garraio batzuk eta Garraioari lotutako jarduerak, Irunen kasuan.



Hernani eta Beasain udalerrietan, industria-jardueren presentzia handiagoa da, % 50,6 eta % 66,6koa, hurrenez hurren. Nabarmentzekoak dira Trenbide-materialaren fabrikazioarekin lotutako jarduerak Beasainen edo Erabilera orokorreko makinekin edo Paperaren industriarekin lotutakoak, Hernanin.

Iturria: Eustat. Udal BPG

1 Ohar metodologikoa: Datuak hobeto interpretatzeko, udal BPG eta Udal-errenta bereizi behar dira. BPG ekoizpenarekin eta lurraldean aberastasuna sortzearekin lotuta dago, eta ekoizpen-establezimendu garrantzitsuak dituzten udalerrietan kontzentratzen da. Errenta, berriz, pertsonei eta haien bizilekuari lotuta dago.

Bestalde, BPG per capita terminoetan eskaintzen da, udalerrien tamaina birdimentsionatzeko –haietan sortzen den BPG biztanleriaren artean zatituz–, eta, hala, tamaina oso txikiko udalerrien eta tamaina handiko udalerrien jarduera ekonomikoaren arteko konparaziorako bide ematen da.

Informazio gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastian kalea, 1 01010 Vitoria-Gasteiz Prentsa-zerbitzua: servicioprensa@eustat.eus Tel.: 945 01 75 62