2023/03/27ko prentsa-oharra
OSPITALEETAKO ERIKORTASUN-ESTATISTIKA. 2021
Ospitalizazioen % 83ri Euskal AEko ospitale publikoetan eman zaie arreta 2021ean, eta Estatuan, % 72,4ri, batez beste
Euskal AEn 100.000 biztanleko tasa 10.679 ospitalizaziokoa izan da; alegia, Estatuko batez bestekoa baino handiagoa (9.536)
Euskal AEko ospitaleek 233.853 ospitalizazio izan dituzte 2021ean, aurreko urtean baino % 5,1 gehiago, Eustaten datuen arabera; alegia, Estatu osoaren % 5,2. Igoera hori izan da 2020an COVID-19aren inpaktuaren ondorioz ospitalizazio kopurua % 10,1 jaitsi ondoren.
Arreten % 83 ospitale publikoetan izan dira, Estatuan baino ia ehuneko hamaika puntu gehiago (% 72,4), eta honako autonomia-erkidego hauen aurretik kokatu da: Katalunia (% 51,1), Balear Uharteak (% 64,1), Madrilgo Erkidegoa (% 65,4) eta Kanariak (% 71); autonomia-erkidego horien arreta publikoaren datuak Espainiako batez bestekoa baino baxuagoak dira.
Euskal AEk 100.000 biztanleko 10.679 ospitalizazio izan ditu; hala, Estatuko batezbestekoaren gainetik dago (9.536), eta ospitalizazio-tasa handienak dituzten autonomia-erkidegoen artean, Kataluniaren (11.048), Aragoiren (10.978) eta Asturiasko Printzerriaren (10.764) ondoren.
Sexuaren arabera, gizonen propotzioa (% 50,7) emakumeena (% 49,3) baino pixka bat handiagoa izan da; Estatu-mailan, altuagoa izan da emakumeetan (% 51,7). Haurdunaldi, erditze eta puerperioaren gertakariak kontuan hartu ezean, emakumeen ehunekoa baxuagoa izango litzateke Euskal AEn, % 45,8koa (% 47,3koa Espainian). Zahartzearen berezko aldaketen ondorioz, ospitaleratutako pertsonen erdiek baino gehiagok, % 51,1ek, 65 urte eta gehiago izan dituzte (% 46,5 Espainian).
Ospitalizazio-kausa nagusiak, Estatuan bezala, zirkulazio- eta digestio-gaixotasunak izan dira; ospitalizazio guztien % 25,8 izan dira (% 25,2 Espainian), eta, ondoren, tumoreak eta, azkenik, traumatismoak eta lesioak, % 9 baino gehiagoko ehunekoekin. Bestalde, alderik handienak haurdunaldi, erditze eta puerperioaren taldean izan dira; ospitalizazioaren bosgarren kausa ohikoena izanik Espainian (% 8,3) zortzigarren postuan egon da Euskal AEn (% 6,6), arnas gaixotasunen, aparatu muskuloeskeletikoen eta genitourinarioen atzetik.
Euskal AEn ospitalizazioen % 5,3 COVID-19aren eraginez izan dira, Estatuan bezala
Euskal AEko ospitaleetako ospitalizazioen 12.394 kasutan, guztira, COVID-19a izan da kausa nagusia; alegia, Euskal AEko 2021eko ospitalizazioen % 5,3, Estatuko ehuneko bera. Gainera, kausa horregatik ospitaleratuta egon diren egun kopurua 123.389 egunekoa izan da; egonaldia, batez beste, ia 10 egunekoa (11,9 egun Estatuan).
COVID-19agatiko ospitalizazioen % 58,1 gizonena izan da eta % 41,9, emakumeena (% 57,6 eta % 42,4 Espainian). Adin-taldeen arabera, kasuen ehuneko handiena 65-84 urteko taldeari egokitu zaio (% 36,1), ondoren, 45-64 urtekoari (% 34,4), 85 urte eta gehiagokoei (% 15) eta 25-44 urtekoari (% 12,4).
Ospitalearen asistentzia-xedearen arabera, ospitalizazioen % 94,6 akutuen ospitaleetan izan dira (221.264 ospitalizazio), % 4,1 egonaldi ertain eta luzeko ospitaleetan (9.566) eta % 1,3 (3.023) psikiatrikoetan.
Ospitaleratzeak Euskal AEko ospitaleetan, gaixotasun talde ohikoenen arabera, asistentzia-helburuari jarraiki. 2021
| | Guztira | Akutuak | Egonaldi ertain-luzea | Psikiatrikoak |
| | Kopurua | % | (%) ## | (%) ## | (%) ## |
| DIAGNOSTIKO-TALDE HANDIAK | | | | | |
| Guztira | 233.853 | 100 | 100 | 100 | 100 |
| Zirkulazio-aparatua | 31.016 | 13,3 | 13,1 | 19,7 | 2,9 |
| Liseri-aparatua | 29.131 | 12,5 | 13,1 | 2,6 | - |
| Neoplasiak | 21.953 | 9,4 | 9,5 | 8,7 | 0,0 |
| Traumatismoak eta lesioak | 21.614 | 9,2 | 9,5 | 5,1 | 1,0 |
| Arnas aparatua | 18.957 | 8,1 | 7,9 | 15,2 | 0,0 |
| Aparatu muskulueskeletikoa | 18.440 | 7,9 | 8,2 | 2,7 | 0,0 |
| Aparatu genitourinarioa | 16.556 | 7,1 | 7,2 | 6,4 | - |
| Haurduntza, erditzea eta erdiberriaroa | 15.436 | 6,6 | 7,0 | - | - |
| Helburu berezien kodeak (COVID-19) | 12.394 | 5,3 | 5,1 | 8,8 | 10,2 |
| Sintoma eta aurkikuntza anormal klinikoak | 11.043 | 4,7 | 4,9 | 2,4 | 0,4 |
| Nahasmendu mentalak eta portaerarenak | 7.511 | 3,2 | 2,2 | 1,0 | 84,1 |
| Nerbio-sistemako gaixotasunak | 5.606 | 2,4 | 2,3 | 4,4 | 1,4 |
| Osasun-egoeran eragina duten faktoreak eta osasun-zerbitzuekiko harremana | 5.514 | 2,4 | 1,8 | 16,2 | - |
Ehunekoa ospitaleratze guztien gainean kalkulatu da
CIE -10 : Gaixotasunen Nazioarteko Sailkapena, 10. bertsioa
Data 2023ko Martxoaren 27a
Iturria: Eustat. Ospitaleetako erikortasun-inkesta
Egonaldi ertain eta luzeko ospitaleek eta psikiatrikoek, ospitalizazioen % 5,4rekin, akutuen ospitaleen ereduaz bestelakoa dute, bai tratatzen dituzten patologiengatik bai ospitaleko egonaldiaren iraupenagatik.
Egonaldi ertain eta luzeko ospitaleetan, ospitalizazio gehienak (% 51,1) zirkulazio-aparatuko gaixotasunek eragin dute (% 19,7), ondoko zaintzetarako, kirurgia ondokoetarako, aringarrietarako eta beste batzuetarako osasun-zerbitzuekiko kontaktuek (% 16,2) eta arnas-aparatukoek (% 15,2); batez besteko egonaldia 19 egunekoa izan da. Ospitale psikiatrikoen kasuan, eskizofrenia izan da gehien diagnostikatu den patologia.
Metodologiari buruzko oharra
Eragiketa estatistiko hau Estatistikako Institutu Nazionalarekin (EIN) elkarlanean egin da.
Estatuko eta nazioarteko estatistikekin erkatu ahal izateko, ospitalizazioaren modalitatean 1 eguneko edo gehiagoko egonaldia duten gertakariak baino ez dira kontuan hartzen; alegia, ez dira kontuan hartzen 0 eguneko gertakariak. Egonaldiaren iraupena ospitaleratu den egunetik alta eman arteko egunera bitartean igaro den egun-kopuruaren arabera kalkulatzen da, ospitaleratze- edo alta-orduak aintzat hartu gabe.
Euskal AEn, 100.000 biztanleko ospitalizazio-tasa 2021/07/01eko populazioa kontuan hartuta kalkulatu da.
Argibide gehiagorako:
Eustat - Euskal Estatistika Erakundea / Instituto Vasco de Estadística
Donostia-San Sebastian kalea, 1 01010 Vitoria-Gasteiz
Prentsa Zerbitzua: servicioprensa@eustat.eus Tel.: 945 01 75 62