2024/05/15eko prentsa-oharra

ZERBITZUEN INKESTA. OSTALARITZA. 2022

Euskal AEko ostalaritza-sektoreak inoizko emaitzarik onena lortu zuen 2022an, % 21,7ko igoerarekin

Enpleguak, bi urtez behera egin ondoren, % 5,5 egin du gora, sektorean 62.000 langile baino gehiago izateraino

Euskal AEko ostalaritza-sektoreak % 21,7ko hazkundea izan du 2022an jardueraren emaitzan; horrela, Euskal AEn ezagutzen den serie historikoaren emaitzarik onena lortu du, Eustatek landutako datuen arabera.

Sektore horrek ostatu-zerbitzuak eskaintzen dituzten enpresak eta janari- eta edari-zerbitzuak eskaintzen dituztenak biltzen ditu, eta 2022an 291,4 milioi euroko irabazia lortu du, termino nominaletan, diru-sarreren eta gastuen artean, mozkinen gaineko zerga deskontatu ondoren.

Emaitza bikaina, funtsean, negozio-zifraren portaerari zor zaio; izan ere, % 25,7ko igoerak 2021ean izandako % 33,9ko igoera sendotzen du, eta 2020an COVID-19 pandemiak gogor zigortutako sektorearen susperraldi argia erakusten du, urte horretan negozio-zifra ia erdira jaitsi baitzen, -% 47,4ra.

Negozio-zifra 4.000 milioi euro ingurukoa bada ere (3.992,5 milioi), 2019an erregistratutako 4.500 milioi euroen azpitik dago oraindik.

Euskal ostalaritzaren jarduerak 2022an izan duen bilakaera onaren isla da enpleguaren hazkundea, % 5,5, 3.262 pertsona gehiago, 62.406 lanpostura iritsi arte, 2020an eta 2021ean, hurrenez hurren, % 5,6ko eta % 2,3ko murrizketak izan ondoren. Igoera horren ondoren, 2022an enpleguaren bigarren erregistrorik onena lortu zen, 2019an 64 mila pertsona enplegaturen errekorra lortu ondoren. Eta hori, establezimendu kopurua egonkor mantenduz, 13.420 guztira, % 0,1eko igoera txikiarekin.

Gastuei dagokienez, bai hornikuntzek bai langile-gastuek igoera handiak izan dituzte, % 23,1 lehenengoek eta % 22,1 bigarrenek, baina negozio-zifrarekin gertatzen den bezala, balio absolutuetan pandemia aurreko zifren azpitik.

Era berean, garrantzitsua da faktore-kostuaren araberako balio erantsi gordinaren bilakaera – sortutako aberastasuna adierazten du, eta diru-laguntzen eta zeharkako zergen doikuntzaren ondoren bitarteko kontsumoak kenduta egiten den ekoizpen gordinaren baliokidea da – % 21,2 da, 1.721 milioira iritsiz.

Iturria: Eustat. Zerbitzuen inkesta

Aldiak 20142015201620172019202020212022

Dibisioen araberako analisia

Ostalaritzaren barruan, Janarien eta edarien dibisioa da nagusi: Jatetxeak, Beste janari-zerbitzu batzuk eta Edari-establezimenduak azpisektoreak. Horrek establezimenduen % 89,5 hartzen du, % 89,4ko enplegu-zifra dauka, eta fakturazioaren % 83,9.

3.349 milioi euroko negozio-zifra izan zuen, hau da, aurreko urtean baino % 21,6 gehiago. Era berean, enpleguak % 5,4 egin du gora, eta 2.853 enplegu irabazi ditu; guztira, 55.777 pertsona daude lanean dibisio horretan. Establezimendu kopurua, 12.105, ia berdin mantendu da – 22 establezimendu gutxiago –.

Janarien eta edarien dibisioa emaitza nabarmen positiboarekin eman dio amaiera 2022ari: dibisioaren maximoa lortu da, 237 milioi euro, eta 26,6 milioitan hobetu dira aurreko urtekoak (% 12,6).

Emaitzak jarduera-maila desberdinagoan aztertuz gero, Jatetxeen azpisektoreak, enpleguan eta negozio-bolumenean garrantzi handiena duenak, % 26,3ko aldakuntza positiboa izan du fakturazioan, enplegua (% 6,6) eta establezimenduen kopurua (% 5,1) handituz.

Iturria: Eustat. Zerbitzuen inkesta

Aldiak 20142015201620172019202020212022

Bestalde, Edarien establezimenduen azpisektorearen fakturazioa % 18,8 hazi da, baina murriztu egin dira enplegatutako pertsonen kopurua (-%1,3) eta establezimenduen kopurua (-%3,2).Beste janari-zerbitzu batzuen azpisektoreak, catering-ak, besteak beste, % 9,8 igo du bere negozio-zifra. Enplegatutako pertsonak ere % 16 gehitu dira, eta establezimenduen kopurua % 8.

Ostatu-zerbitzuak, Hotelen eta beste ostatu batzuen azpisektoreek osatuak, Ostalaritzaren zati txikiagoa dira, enpleguaren % 10,6 eta establezimenduen % 10,5 hartzen baitute. Hala ere, adierazle horiei dagokienez, negozio-zifra nahiko handiagoa da, % 16,1. Negozio-zifrak % 52,6 egin du gora (643 milioi euro), enpleguak (6.629 pertsona) % 6,6 egin du gora, eta establezimenduen bolumenak (1.405) % 2,3.

Sektore honetako adierazgarriena Hotelak azpisektorea da. Horren negozio-zifra % 56,6 hazi da, eta horrela Ostatu-zerbitzuen negozioaren ia % 80 kontzentratzen du.

Hain hazkunde berezia pandemiaren urteetan izandako beherakaden ondorioa da. Susperraldi horrek ekarri du 2022ko jardueraren emaitzaren gorakada ikusgarria (% 288), balio erantsi gordinarena (% 44,5), eta ez txikiagoa enpleguan (% 6,1) eta establezimendu-kopuruan (% 1,6).

Azkenik, Beste ostatu batzuk azpisektoreak urtea oso positiboki amaitu du: Ostatu-zerbitzuetako establezimenduen % 54ren jabe da, nahiz eta enplegatuen % 26 soilik okupatzen duen. Pandemiak gutxiago zigortuta, enplegua % 8,1 igo da, establezimenduak % 3, negozio-zifra % 39,4 eta balio erantsia % 30,1. Hala ere, emaitzak % 31 egin du atzera.

Lurralde-azterketa

Lurraldeen bilakaera aztertzean, adierazle guztien joera orokor positiboaren barruan, aldaketak ikusten dira lurralde bakoitzari eragiten dioten intentsitatean.

Ildo horretan, jardueraren emaitzaren kasuan, Bizkaian % 27 igo da, Gipuzkoan % 20,4 eta Araban % 6,5.

Era berean, negozio-zifrak gora egin du hiru lurraldeetan, baina erritmo txikiagoan Araban (% 22,4), Bizkaian (% 25,3) eta Gipuzkoan (% 27,5) baino.

Enpleguari dagokionez, Araba beste bi lurraldeen batez bestekoen artean dago. Gipuzkoan, Ostalaritzako enplegua nabarmen hazi da (% 8,4) azken urtean; Araban, % 6 inguru (% 5,9); eta Bizkaian, % 3,3 baino ez.

Azkenik, establezimenduen kopuruak ez du ia aldaketarik izan erkidego osoan (% 0,1), baina nabarmentzekoa da lurraldeak horretan heterogeneoak direla; izan ere, Araban % 0,7 hazi da eta Gipuzkoan % 0,5; Bizkaian, berriz, % 0,4 jaitsi da.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62