2024/06/06ko prentsa-oharra

ZERBITZUEN INKESTA. JARDUERA PROFESIONALAK ETA ZERBITZU LAGUNGARRIAK. 2022

Lanbide- eta enpresa-zerbitzuek 10 mila milioi euroko negozio-zifra gainditu dute 2022an lehen aldiz Euskal AEn

10-49 enpleguko establezimenduak, hazkunde ekonomikoaren eragile

Lanbide eta Enpresa Zerbitzuen sektoreko establezimenduen negozio-zifra 10.392 milioi eurokoa izan zen 2022an, uneko prezioetan, hau da, 2021ean baino % 11,6 gehiago, Eustaten datuen arabera.

Jarduera ekonomikoaren susperraldi nabarmen bati esker, sektoreak mila milioi euro baino gehiago handitu du bere negozioa 2021aren aldean, eta, horrela, 393 milioi eurotan gainditu du 2019an lortutakoa, COVID-19 pandemiaren aurreko urtean. Horren ondorioak bereziki larriak izan ziren 2020an, % 14 inguruko beherakada eragin baitzuen. Hala ere, hurrengo urteetan suspertze argia gertatu zen: 2021ean salmentak % 7,8 hazi ziren, eta 2022an, 10.392 milioi eurorekin, inoizko negozio-zifrarik handiena lortu zuten.

Pertsona enplegatuen kopurua % 3 hobetu zen, 131.663 pertsona guztira, nahiz eta establezimenduen kopurua pixka bat jaitsi, termino erlatiboetan 2021ean baino % 1,5 gutxiago, 26.926 izatera iritsi arte.

Negozio-zifraren gorakadarekin bat etorriz, Lanbide eta Enpresa Zerbitzuetako establezimenduek faktoreen kostuan lortutako balio erantsi gordinak % 10,7ko igoera izan zuen. BEGak sortutako aberastasuna adierazten du, produkzio gordinari dirulaguntza eta zeharkako zergengatiko doikuntzaren osteko bitarteko kontsumoak kenduta. 2022an, 6.725 milioi euroko zenbatekora iritsi zen, 2021ean lortutakoa baino 652 milioi euro gehiago, ezagutzen den serie historikoaren balio erantsi gordinaren baturarik handiena.

Zerbitzu profesional eta enpresarialen sektoreko jarduera ekonomikoari buruzko adierazleen martxa onaren ondorioz, ustiapenaren emaitza 2021ean lortutakoa baino % 21,8 handiagoa da, eta 2.572 milioi euroko zifra errekorrera iritsi da. Azken horrek interes eta zergen aurreko mozkina adierazten du, eta ekitaldi baten amaieran enpresa batek bere jarduerari dagokionez galerak edo irabaziak dituen adierazten du.

Iturria: Eustat. Zerbitzuen inkesta

Aldiak 201320142015201620172019202020212022

Iturria: Eustat. Zerbitzuen inkesta

Aldiak 201320142015201620172019202020212022

Dibisioen analisia

Lanbide eta Enpresa Zerbitzuen sektorea bi ataletan banatzen da: Jarduera profesional, zientifiko eta teknikoen atala eta Jarduera administratibo eta zerbitzu osagarrien atala.

Lehenengoari dagokionez, Jarduera profesional, zientifiko eta teknikoen atalak 21.085 establezimendu ditu, eta nagusi da establezimenduen kopuruari dagokionez, guztizkoaren % 78,3. Negozio-zifrari dagokionez ere, fakturatutako 7.081 milioi euroak sektorearen % 68,1 dira. Enpleguari dagokionez, 64.547 langilek sektorearen erdia baino zertxobait gutxiago biltzen dute, guztizkoaren % 49.

Emaitzak jarduera-maila bereiziago batean aztertuz gero, atal honen barruan Jarduera juridikoak eta kontabilitatekoak eta Arkitektura- eta ingeniaritza-zerbitzuak nabarmentzen dira duten garrantziagatik. 3.273 milioi euroko fakturazioarekin lehenak, bere dibisioaren % 46,2arekin, eta 2.395 milioi eurorekin bigarrenak, dibisioaren % 33,8arekin, bien artean negozio-zifra osoaren % 80 metatzen dute, establezimenduen guztizkoaren % 73,7 eta enpleguaren % 69,1.

Jarduera juridikoen eta kontabilitateko jardueren banaketak 25.988 pertsona enplegatzen ditu 10.217 establezimendutan, eta Arkitektura- eta ingeniaritza-zerbitzuen 5.321 establezimenduek 18.597 pertsona okupatzen dituzte. Aurreko ekitaldiaren aldean, biek gehitu zituzten negozioak, % 7,9 eta % 19,1, hurrenez hurren. Establezimendu kopuruari dagokionez, biek egin dute behera: lehenengoek % 3,4 eta bigarrenek % 2,5. Enpleguari dagokionez, bi dibisioetan hazi da: Jarduera juridikoak eta kontabilitatekoak % 2 eta Arkitektura eta Ingeniaritza zerbitzuak % 0,6.

Gainerako hiru dibisioei dagokienez, Ikerketa eta garapena atalak oso portaera positiboa izan du fakturazioan, % 34,7 igo baita aurreko urtearen aldean. Beste jarduera profesional batzuek ere (besteak beste, Diseinua, Argazkilaritza, Itzulpengintza eta interpretazioa eta Albaitaritza) igoera nabarmena izan dute, % 14,4koa; Publizitatea eta merkatu-azterketak atalaren fakturazioa, berriz, % 0,7 igo da.

Ikerketa eta garapeneko jardueretarako enpleguaren bilakaera positiboa da; izan ere, 2021ean baino % 6 gehiago dago, eta establezimenduen kopurua ere % 5,9 igo da. Beste jarduera profesional batzuen enplegua % 4,8 hazi da, eta establezimenduen kopurua % 2. Aitzitik, Publizitatea eta merkatu-azterketak adarrean bilakaera-zifra negatiboak daude, bai establezimendu-kopuruan (%-3,2), bai langile okupatuetan (%-4,2).

Beste atal handia, Jarduera administratiboak eta zerbitzu lagungarriak, 3.312 milioi euroko fakturarekin, Jarduera profesionalen eta Zerbitzu laguntzaileen guztizkoaren negozio-zifraren % 31,9 da; 67.116 enpleguak enpleguaren guztizkoaren % 51 dira, eta 5.841 establezimenduak jarduera-sektore horretako establezimendu guztien % 21,7.

Sekzioaren barruan, Beste zerbitzu-jarduera batzuk dibisioa (Segurtasun- eta ikerketa-jarduerak, Eraikinetarako eta lorezaintzarako zerbitzuak eta Enpresentzako jarduera lagungarriak) bereizi da. Ataleko enpleguaren eta establezimendu guztien hiru laurdenak hartzen ditu (% 79,1 eta % 73,5, hurrenez hurren). Bilakaera positiboa izan du, bai landunei dagokienez (% 3,1), bai establezimendu-kopuruari dagokionez (% 0,2). Gauza bera esan daiteke fakturazioari buruz, % 7,5 igo baita.

Beste zerbitzu-jarduera batzuk alde batera utzita, beste dibisioek partaidetza txikia dute beren sekzioaren barruan. Horrela, establezimenduen % 12,3 eta enpleguaren % 2,7 Bidaia-agentziei dagokie, establezimenduen % 10,2 eta enpleguaren % 3,8 Alokairu-jarduerei, eta establezimenduen % 4 eta enpleguaren % 14,3 Enpleguarekin lotutako jarduerei.

Hirurek igoerak dituzte fakturazioan. Bereziki azpimarragarria da Bidaia-agentzien fakturazioak izan duen susperraldia, aurten % 12,3ko gorakada izan baitu aurreko urtearen aldean; enpleguak % 0,9 egin du gora, eta establezimenduen kopuruak ere % 3,9 egin du gora. Alokairu-jarduerek, berriz, % 6,2 egin dute gora fakturazioan, % 0,7 enpleguan eta, aitzitik, establezimenduen kopurua % 1,6 jaitsi da. Enpleguarekin lotutako jarduerek ere gora egin dute bai langile okupatuetan (% 10,1), bai fakturazioan (% 9,5), bai establezimendu-kopuruan (% 5,9).

Enplegu-geruzaren araberako analisia

10-49 enpleguko establezimenduak, hazkunde ekonomikoaren eragile

Establezimenduen tamainaren xehetasuna enpleguaren arabera aztertzeak informazio gehigarria ematen du.

Urte arteko bilakaera, oro har, positiboa da enplegu-maila guztietarako, baina bereziki egokia tamaina txikikoen kasuan, 10-49 enplegukoetan. Establezimendu-tamaina hori da onena adierazle guztietan: % 5,2ko hazkundea izan da establezimendu-kopuruan, % 5ekoa enpleguan eta % 17,6koa negozio-zifran. Izan ere, geruza horretako establezimenduei sektore osoko negozio-zifraren 2022ko hazkundearen ia erdia (% 48) dagokie, baina enpleguaren % 23 baino ez dira. Martxa bikain horren ondorioz, ekitaldiaren emaitza biziki hazi da, 2021ean baino % 81,4 gehiago.

Era berean, 50 enplegu baino gehiago dituzten enpresen fakturazioa (% 8,6 gehiago), enplegua (% 4,6) eta establezimenduen kopurua (% 2,1) hazi egin dira; ekitaldiko emaitzak % 47,7ko igoera izan du. Mikroenpresetan, berriz (enplegua 1etik 9ra bitartean), establezimenduen kopurua % 1,9 jaitsi da eta enplegua % 0,6. Aitzitik, fakturazioa % 8,9 igo da eta ekitaldiko emaitza % 2,2 hobetu da.

Azken horietan, mikroenpresak establezimendu guztien % 92,9 dira, langile guztien % 31,6 hartzen dute eta sektorearen fakturazioaren % 38,1 sortzen dute. Enpresa txikiek, 10-49 enplegukoek, establezimenduen % 5,6 hartzen dute, baina sektorearen % 23,2ri ematen diote enplegua, eta Jarduera profesional eta zerbitzu lagungarri guztien % 33,4 fakturatzen dute. Azkenik, 50 enplegu baino gehiagoko enpresek, establezimenduen % 1,5ekin bakarrik, guztizkoaren % 45,2ko enplegua zuten eta guztizkoaren % 28,4ko bolumenarekin fakturatu zuten.

Lurraldekako analisia

Hazkunde orokorra, baina lurraldeen arteko desberdintasunekin

Lurraldeen araberako banaketan, eta establezimendu-kopuruari erreparatuta, Euskal AEko establezimendu guztien % 52,6 Bizkaian dago, % 33,8 Gipuzkoan eta % 13,5 Araban, jardueraren araberako garrantzizko aldaketekin. Adibidez, Jarduera juridikoak eta Kontabilitatekoak % 58,4 dira Bizkaian, Ikerketa eta garapenekoak % 47,9 dira Gipuzkoan, eta Enpleguarekin lotutako jarduerak % 21,1 dira Araban, lurralde bakoitzean adierazgarrienak aipatzearren.

Enplegua aztertzen bada, lurralde-banaketa Bizkaiari esleitzen zaio (% 56,3), Gipuzkoari (% 29,4) eta Arabari (% 14,3). Kasu honetan, konparazioz, jarduera esanguratsuenak, lurraldearen arabera, hauek izan dira: Bidaia-agentziak Bizkaian (% 61,9), eta, berriz ere, Ikerketa eta garapena Gipuzkoan (% 48,7) eta Enpleguarekin lotutako jarduerak Araban (% 28).

Lurraldeka, hiru lurraldeek bilakaera positiboa izan zuten fakturazioari dagokionez. Arabako negozio-zifra % 16,9 igo da, Gipuzkoakoa % 15 eta Bizkaikoa % 9,1. Bizkaiko lurraldeak 2022an izan duen hazkunderik apalena honako honetan islatzen da: ia ez du berreskuratu 2019ko maila, pandemiaren aurreko urtea; izan ere, bi urteak alderatuz gero, aldea % 1,1 handiagoa da azken urte horretan; Gipuzkoan, aldiz, konparazioak % 8,1eko aldakuntza izan du, eta Araban % 9,7koa.

Establezimendu kopuruaren eta enpleguaren bilakaera aldakorra da lurralde bakoitzean. Lehenengoari dagokionez, hiruretan jaitsi da: % 2, % 1,1 eta % 0,8 Bizkaian, Araban eta Gipuzkoan, hurrenez hurren. Enpleguari dagokionez, hiru lurraldeetan hazi da: % 6,2 Gipuzkoan, % 5,2 Araban eta % 0,8 Bizkaian.

Langileen gastuari dagokionez, hiru lurraldeek izan dituzte hazkundeak, baina oso garrantzi ezberdinekoak: Gipuzkoan eta Araban, % 11,7 eta % 10,7 hazi dira, hurrenez hurren, eta Bizkaian, % 1,1 baino ez.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62