2024/10/18ko prentsa-oharra

KANPO-MERKATARITZAREN ESTATISTIKA (KAMEE). 2024ko abuztua

Euskal AEko ondasunen esportazioak % 10,8 igo ziren 2024ko abuztuan

2024ko lehen zortzi hilabeteetako metatuan esportazioak % 4,7 jaitsi ziren, baina merkataritza-saldo positiboa mantendu egin zen, 2.442 milioi euro

2024ko abuztuan, Euskal AEko ondasunen esportazioek % 10,8ko urte arteko hazkundea izan zuten, Eustaten datuen arabera. Zenbatekoa 2.123,6 milioi eurokoa izan zen, aurreko urteko hilabete bereko 1.916,4 milioien aldean. Ondasun energetikoen esportazioak % 50,9 igo ziren eta ez-energetikoenak % 7,1.

Esportazioak % 4,3 hazi dira Araban, % 6,9 Gipuzkoan eta % 16,9 Bizkaian.

Euskal Autonomia Erkidegoko ondasunen inportazioak % 6,0 gehitu ziren eta 1.971 milioi eurora iritsi ziren. Inportazio energetikoak % 11,0 gehitu ziren eta ez-energetikoak % 4,0. Merkataritza-saldoa positiboa da (+152,5 milioi) eta estaldura-tasa % 107,7koa da.

Arabako inportazioak % 22,2 gehitu dira, Gipuzkoakoak % 4,8 eta Bizkaikoak % 2,3.

Produktuen araberako analisia (muga-zergen partidak)

2024ko abuztuan, bost muga-zergen partida esportatzaile nagusiak honako hauek izan ziren: "Ibilgailu automobilen zatiak eta osagarriak" (179 milioi, % 6,2ko hazkundearekin), "Findu gabeko kobrea; fintze elektrolitikorako kobrezko anodoak" (105,8 milioi, eta % 471,1eko igoera, hau da, aurreko urteko hilabete berean baino 87,3 milioi euro gehiago), "Petrolio-olio finduak" (88,2 milioi, aurreko urtean baino 40,7 milioi gutxiago esportatuta, hau da, % 31,6ko atzerapena), "Petrolio edo mineral bituminosoko olio gordinak" (76,8 milioi, 49,1 gehiago, +% 177,0) eta ""Tenperatura altuko harrikatz-mundrunen destilazioko olioak eta produktuak (benzola, toluola, xilola, naftalenoa, fenola, etab.)" (71,2 milioi). Partida horiek abuztuan guztizkoaren % 24,5 hartzen dute, guztira 520,9 milioi euroko balioarekin. Nabarmentzekoa da "Kautxuzko pneumatiko berrien" atzerakada (69,5 milioi esportaziorako salmentetan eta 42,6 milioi gutxiago, % 38,0ko jaitsierarekin) eta "Eztainu gordinaren" esportazioen hazkundea (45,4 milioi).

Araban, "Ibilgailu automobilen zatiak eta osagarriak" muga-zergen partida nagusiak hazkunde nabarmena izan du aurreko urtearekin alderatuta (% 63,9); halaber, "Hodi eta profil hutsak, soldadurarik gabeak, burdinazkoak edo altzairuzkoak" (% 52,2) eta "10 pertsona baino gutxiagoko turismoak" (% 2,4) eta "Kautxuzko pneumatiko berriak" (% 1,0) nabarmen hazi dira. Aitzitik, atzera egin dute "Salgaiak garraiatzeko ibilgailu automobilen" salmentek (-%22,2).

Bizkaian, nabarmentzekoak dira "Findu gabeko kobrea; finketa elektrolitikorako kobrezko anodoak" (% 471,1), "Petrolioaren edo mineral bituminosoaren olio gordinak" (% 177,0), "Tenperatura altuko harrikatz-mundrunen destilazioko olio eta produktuak (Benzol, Toluol, Xilol, Naftaleno, Fenol, etab.)" eta "Eztainu gordina". Aitzitik, "Kautxuzko pneumatiko berrien" esportazioek (-%64,4) beheranzko joerari eutsi diote beste hilabete batez, "Petrolio-olio finduek" bezalaxe (-%32,5).

Gipuzkoan, aipagarriak dira "Prentsa-papera bobinetan (biribilkiak) edo orrietan" (% 345,2) eta "Makina-erremintak (iltzatu, grapatu, mihiztatu, zerratu, eskuilatu, moldatu, zulatu, etab.) zura, plastikoa edo antzeko gai gogorrak lantzeko" (% 285,9). Aipagarria da, halaber, "Trenbideetarako automotorrak eta tranbia autopropultsatuak" (% 63,4) eta "Burdinazko edo aleatu gabeko altzairuzko profilak" (% 55,1).

Inportazioak aztertuz gero, ikusten da garrantzitsuena, "Petrolio edo mineral bituminosoko olio gordinak" (guztizkoaren % 19,8), % 18,9 hazi dela, 391 milioi inportatuta. Garrantzian horren atzetik doan partidak nabarmen egin du atzera, "Petrolio-olio finduak" (% -34,8, aurreko urteko hilabete berean baino 60,2 milioi gutxiago). Aitzitik, tradizioz gure esportazioen parte izan diren bi produktu nabarmen hazi dira: "10 pertsona baino gutxiagoko turismoak" (ia osorik Arabatik erositako 56,8 milioi), "Burdinurtuzko, burdinazko edo altzairuzko txapa, barra, profil, hodi eta antzekoekin egindako eraikuntzak" (25,5 milioi inportatu dira) eta "Berotan ijeztutako produktu lauak, aleatu gabeko eta txapatu edo estali gabeko burdinazkoak edo altzairuzkoak > 599 mm" (38,2 milioi). “Petrolio-gasaren eta gainerako hidrokarburo gaseosoen” (72,3 milioi) inportazioek ere gora egin dute (% 241,5)

Jatorri-helmuga herrialdeak, 2024ko abuztua

Hilabete honetan, honako hauek dira ranking esportatzailearen lehen postuak:

- Frantzia: 349,1 milioi euroko ondasunak esportatu dira herrialde horretara, eta estaldura-tasa % 235,2koa izan da.

- Alemania: gure erkidegoko 209,3 milioiko produktuak jasotzen ditu, % 84,5eko estaldura-tasarekin.

- Estatu Batuak: 191,9 milioi euroko balioarekin esportatzen da, % 115,3ko estaldura-tasarekin.

- Belgika: herrialde horretara bideratu dira gure esportazioetatik 190,6 milioi, eta estaldura-tasa % 371,0koa izan da.

- Herbehereak: herrialde horretara bideratutako salmentak 130,6 milioira iritsi dira, eta estaldura-tasa % 200,4koa izan da.

Herrialde horiek esportazio guztien % 50,5 hartzen dute, eta horietako hiru 27. EBkoak dira, eta erakunde horrek esportazioen % 61,6 biltzen ditu.

Euskal AEko ondasunen kanpo-merkataritzak 2.442 milioi euroko saldo positiboa izan du 2024ko urtarriletik abuztura arteko metaturako

Lehenengo zortzi hilabeteetan, eta Euskal AEko esportazioen kasuan, % 4,7ko jaitsiera erregistratu da aurreko urteko aldi beraren aldean, hau da, 1.012,6 milioi euro gutxiago. Esportazioen zenbatekoa 20.499,9 milioikoa izan da aldi horretan.

Bizkaiko esportazioak Euskal AEko handienak dira, 8.133,6 milioi; Gipuzkoak 6.596,4 eta Arabak 5.769,9 milioi.

Produktu-mota kontuan hartuta, "Produktu ez-energetikoak" dira ugarienak, 18.996,1 milioi eurorekin.

Xehetasunetara jaitsita, "10 pertsona baino gutxiagoko turismoen" esportazioak (1.528,3 milioi esportatu) jaitsi egin direla ikus daiteke (-%22,0). Ondorioz, partida horrek ranking esportatzailearen lehen postua utzi du eta "Ibilgailuen zatiak eta osagarriak" (1.555,8 milioi) baino gehiago izan dira. Aipatutako turismoez gain, atzerakadarik handienak "Salgaiak garraiatzeko ibilgailu automobilak" (-%31,3 eta 434 milioi gutxiago), "Kautxuzko pneumatiko berriak" (-%27,4, 269,4 milioi gutxiagorekin) eta "Soldadurarik gabeko hodi eta profil hutsak, burdinazkoak edo altzairuzkoak" (-%32,2, 165,4 milioi gutxiagorekin) izan dira.

Muga-zergen partida nagusien multzoaren barruan, esportazioen hazkunde handiena "Petrolio edo mineral bituminosoko olio gordinak" (2023ko metatu berean baino % 386,9 eta 218,5 milioi gehiago) eta "Petrolio olio finduak" (% 22,4, 1.040,2 milioi esportatuta eta 190,4 milioi gehiago) arloek izan dute.

2024ko lehen zortzi hilabete hauetako rankingaren arabera, Frantzia da herrialde hartzaile nagusia, esportatutako guztizkoaren % 16,3arekin (3.350,4 milioi). Frantziaren atzetik daude Alemania (% 14,0 eta 2.868,5 milioi) eta Erresuma Batua (% 7,1 eta 1.459,4 milioi); horrela, hiru herrialdeen artean, euskal esportazioen % 40 inguru biltzen dira (% 37,5).

Euskal AE osorako inportazioen metatua 18.058 milioi eurokoa da. Zifra horren urte arteko alderaketa eginez gero, ikusten da 285 milioi txikiagoa dela aurreko urteko aldi berean erregistratutakoa baino. Jaitsiera horren arrazoia da, hein batean, Bizkaiko lurraldean, 10.607 milioiko inportazio metatuekin, aldi horretan % 1,8ko beherapena izan dela, hau da, 191 milioi gutxiago 2023ko aldi berean baino. Arabako inportazioek ere atzera egin dute, 128 milioi gutxiago (-%3,2), 3.894,8 milioi guztira. Gipuzkoan % 1,0ko hazkunde txikia izan da (34 milioi gehiago), 3.556,3 milioirekin guztira. "Produktu ez-energetikoen" inportazioa % 4,0 jaitsi da, baina "Produktu energetikoena" % 5,7 igo da.

Aldi horretan inportatutako ekoizpen-partidak aztertuz gero, rankingaren lehen posizioa "Petrolio olio gordinak edo mineral bituminosoarenak" izan da (3.466,5 milioi, aurreko urtean baino 504 milioi gehiago, hau da, % 17,0ko igoera), eta bigarrena "Petrolio olio finduak" (1.156,6 milioi gehiago esportatu dira, 209,7 milioi gehiago eta % 22,1eko hazkundea). Partida horien atzetik daude "Ibilgailu automobilen zatiak eta osagarriak" (640,6 milioi), "Berotan ijeztutako produktu lauak, aleatu gabeko eta txapatu edo estali gabeko burdinazkoak edo altzairuzkoak > 599 mm" (428,1 milioi) eta "Enbolo, diesel edo erdi-diesel motorrak" (334,2 milioi).

Euskal AEko ondasunen kanpo-merkataritzak, 2024ko urtarriletik abuztura, 2.441,9 milioi euroko saldo positiboa izan du eta estaldura-tasa % 113,5ekoa.

Informazio gehiago:

Eustat - Euskal Estatistika Erakundea / Instituto Vasco de Estadística C/ Donostia-San Sebastián, 1 01010 Vitoria-Gasteiz Prentsa-zerbitzua: servicioprensa@eustat.eus Tlf: 945 01 75 62