2025/09/23ko prentsa-oharra

KANPO-MERKATARITZAKO ESTATISTIKA (ECOMEX). 2025eko uztaila

Euskal AEko ondasunen esportazioak % 4,1 handitu ziren 2025eko uztailean, eta inportazioak % 6,2

Produktu energetikoen esportazioek, ordea, % 49,4 egin zuten behera

2025eko uztailean, Euskal AEko ondasunen esportazioek % 4,1eko urte arteko hazkundea izan zuten, Eustaten datuen arabera. Zenbatekoa 2.654 milioi eurokoa izan zen, aurreko urteko hilabete bereko 2.550 milioi euroen aldean. Ondasun energetikoen esportazioak % 49,4 murriztu ziren eta ez-energetikoenak % 7,3 handitu ziren.

Araban esportazioak % 10,1 igo dira eta Gipuzkoan % 7,5; aitzitik, Bizkaiko esportazioak % 4,2 jaitsi dira.

Euskal AEko ondasunen inportazioek % 6,2ko igoera izan zuten eta 2.407 milioi eurora iritsi ziren. Inportazio energetikoek % 7,8 egin zuten behera, baina ez-energetikoek % 10,2 gora.

Merkataritza-saldoa positiboa da (247 milioi euro) eta estaldura-tasa % 110,2koa.

Arabako inportazioak % 26,5 igo dira, eta Gipuzkoakoak % 2,6; baina Bizkaikoak % 1,4 jaitsi dira.

Produktuen araberako analisia (muga-zergen partidak)

Xehetasunetan arreta jarriz, uztailean muga-zergen bost partida esportatzaile nagusiak hauek dira: "10 pertsona baino gutxiagoko turismoak" (310,2 milioi esportatu dira, urte arteko 85,2 milioiko gehikuntzarekin edo % 37,9 gehiago kopuru erlatiboetan); "Salgaiak garraiatzeko ibilgailu automobilak" (170,5 milioi, 38,7 milioiko gehikuntzarekin eta % 29,3ko hazkunde erlatiboarekin); "Ibilgailu automobilen zatiak eta osagarriak" (138,7 milioi, 42,8 milioiko gutxitzearekin, hau da, -% 23,6); "Petrolio-olio finduak" (57,3 milioi esportatu dira, aurreko urtearekin alderatuta 14,6 milioiko murrizketarekin, hau da –% 20,3); eta "Hodietarako txorroten, balbula eta antzeko organoen artikuluak" (54,7 milioi eta % 17,3ko gehikuntzarekin). Partida horiek guztizkoaren % 27,6 hartzen dute eta, guztira, 731,4 milioi euroko balioa dute.

Araban, "10 pertsona baino gutxiagoko turismoak" (lurralde honetan esportatutako guztizkoaren % 33,2) eta "Salgaiak garraiatzeko ibilgailu automobilak" (zifra globalaren % 19,8), hots, muga-zergen bi partida nagusiek gehikuntza nabarmenak izan dituzte aurreko urtearekin alderatuta, 72,7 milioi euro (% 34,3) eta 37,8 milioi euro (% 28,7) hurrenez hurren. Aitzitik, atzera egin du "Kautxuzko pneumatiko berriak" partidan (34 milioi gutxiago edo -% 74,3), baita "Ibilgailu automobilen zatiak eta osagarriak" partidan ere (-% 38,2 eta 19,1 milioi gutxiago).

Bizkaian nabarmentzekoa da "Soja-olioaren" hazkundea, 46 mila eurotik (2024ko uztailean) 20,2 milioira (aurtengo uztailean) igaro baita, eta "10 pertsona baino gutxiagoko turismoena" (23,5 milioi esportatu % 100,8ko hazkundea). Aitzitik, Bizkaian esportazio-pisu handiena duten bi partidak murriztu egin dira: "Petrolio-olio finduak" eta "Ibilgailu automobilen zatiak eta osagarriak", % 21,3 eta % 28,5 jaitsi baitira hurrenez hurren, lehenengo kasuan 14,8 milioi euroko atzeraldi absolutuarekin eta bigarrenean 15,1 milioi eurokoarekin.

Gipuzkoan aipagarriak dira "Hamar pertsona edo gehiago —gidaria barne— garraiatzeko ibilgailu automobilak" eta "Trenbideetarako eta antzekoetarako bidaiari-autoak, bagajeak, posta eta abar" atalen igoerak, 16,1 eta 11,2 milioi euro gehiago baitira aldi berak alderatuz; hau da, % 106,2ko eta % 30,3ko hazkundeak izan dira hurrenez hurren. Aitzitik, behera egin dute "Ibilgailu automobilen zatiak eta osagarriak" partida nagusiko esportazioek (–% 10,9).

Inportazioak aztertuz gero, ikusten da hirugatik biderkatu direla "10 pertsona baino gutxiagoko turismoen" erosketa (% 190,0), 33,5 milioitik 97,1 milioira pasatuz. Halaber, asko hazi dira "Metal preziatuzko bitxigintzako gaiak, baita estaliak edo xaflatuak ere" (% 471,8; eta 33,3 milioi, inportatuak) eta "Petrolio-olio finduak" (% 18,3; eta 108 milioira iritsiz). Partida garrantzitsuenak, "Petrolio edo mineral bituminosoko olio gordinak", % 12,1 egin du behera (359,5 milioi euro inportatu ditu). Horrez gain, lehenengo hamar partidetatik beste bik atzerakada nabarmenak izan dituzte balio absolutuetan: "Ibilgailu automobilen zatiak eta osagarriak" (-% 11,7 eta 10,3 milioi gutxiago) eta "Berotan ijeztutako produktu lauak, aleatu gabeko eta xaflatu edo estali gabeko burdinazkoak edo altzairuzkoak > 599 mm" (-% 36,0 eta 26,1 milioi gutxiago).

Jatorri/helmuga herrialdeak, 2025eko uztaila

Hilabete honetan, ranking esportatzailearen lehen postuetan honako hauek daude:

-Alemania: 431,5 milioiko balioa duten produktuak jaso ditu gure erkidegotik, % 103,9ko estaldura-tasarekin.

-Frantzia: 359,1 milioi euroko ondasunak esportatu dira herrialde horretara, % 191,8ko estaldura-tasarekin.

-Erresuma Batua: 188,9 milioi euroko balioagatik esportatu da, % 339,5eko estaldura-tasarekin.

-Estatu Batuak: gure esportazioetatik 162,9 milioi herrialde horretara bideratu dira, eta estaldura-tasa % 166,0koa izan da.

-Italia: herrialde horretara 156,5 milioi euroko salmentak egin dituzte, % 141,4ko estaldura-tasarekin.

Bost herrialde horiek esportazioen guztizkoaren % 48,9 hartzen dute; horietako hiru EB27koak dira eta bertan biltzen da esportazioen % 59.

2025eko lehen zazpi hilabeteetako metatuan, esportazioek 5.331 euro egin dute atzera 2024ko aldi berarekin alderatuta, eta 2.360 milioi euroko merkataritza-saldo positiboa izan dute

Lehenengo zazpi hilabeteetan, eta Euskal AEko esportazioek ia ez dute aldaketarik izan (% -0,03) aurreko urteko aldi beraren aldean, hau da, 5.331 milioi euro gutxiago izan dira. Esportazioen zenbatekoa, berriz, 18.371 milioikoa izan da aldi horretan.

Bizkaiko esportazioak Euskal AEko handienak dira, 6.402,9 milioi euro guztira; Gipuzkoakoak 6.163,4 miloi euro eta Arabakoak 5.804,8 milioi euro.

Produktu mota kontuan hartuta, Euskal AE osoan "Produktu ez-energetikoak" izan ziren nagusi esportazioan, 17.631,1 milioi eurorekin, 2024ko lehen zazpi hilabeteetan baino % 3,0 gehiago. Hazkunde hori ez zen homogeneoa izan; Bizkaiko esportazioak % 10,2 jaitsi ziren bitartean, Arabako eta Gipuzkoako esportazioek aurreko urtekoak gainditu zituzten, % 8,4an eta % 4,6an, hurrenez hurren. Era berean, "Produktu energetikoen" esportazioek % 41,1eko atzerapena izan dute urte arteko konparazioan.

"10 pertsona baino gutxiagoko turismoak" partida esportazioen artean liderra da 2.038,3 milioi merkaturaturekin, eta % 39,0ko igoera izan du. 25 partida nagusien artean, hazkunde esportatzaile handienak —% 100etik gorakoak— honako hauetan eman dira: "Trenbideetarako eta antzekoetarako bidaiari-autoak, bagajeak, posta eta abar" (278,4 milioi euro esportatu eta % 106,4 gehiago); ondoren datoz "Soja-olioa" (139,6 milioi euro esportatu eta % 156,3 gehiago) eta "Trenbide edo antzekoetarako ibilgailuen parteak" (319,7 milioi euro esportatuta —aurreko urteko aldi berean baino 153,1 milioi euro gehiago—).Beste aurrerapen nabarmen batzuk partida hauetan eman dira: "Turborreaktoreak, turbopropultsatzaileak eta gainerako gas-turbinak, horien zatiak eta osagaiak barne" (42,4 milioi euro gehiago) eta "Hodietarako txorroten, balbula eta antzeko organoen artikuluak" (46,0 milioi euro gehiago).

Aitzitik, partida nagusietako hirutan atzerapenak izan dira: "Ibilgailu automobilen zatiak eta osagarriak" (–% 11,9 eta 164,3 milioi gutxiago), "Kautxuzko pneumatiko berriak" (–% 29,0 eta 187,2 milioi gutxiago) eta "Petrolio-olio finduak" (–% 34,2 eta 325,8 milioi gutxiago).

2025eko lehen zazpi hilabete hauetako rankingaren arabera, Alemania da herrialde hartzaile nagusia, esportatutako guztizkoaren % 15,1ekin 2.775,8 milioi euroko balio baterako. Herrialde horretatik oso hurbil dago Frantzia, 2.701,2 milioi eurorekin eta esportatutako guztizkoaren % 14,7rekin. Ondoren datoz Erresuma Batua (1.203,3 milioi eta % 6,5), Estatu Batuak (1.106,8 milioi eta % 6,0) eta Italia (1.086,2 milioi, % 5,9); bost herrialde horien artean Euskadiko esportazioen % 48,3 biltzen da.

Euskal AE osorako inportazioen metatua 16.011 milioi euro ingurukoa da. Urte arteko alderaketa eginez gero, ikusten da aurreko urteko aldi berean erregistratutakoa baino 76 milioi euro gutxiago dela. Jaitsiera horren arrazoia da Bizkaiak (8.464 milioi) % 9,8 gutxiago inportatu duela (924 milioi). Bestalde, Arabako inportazioak 658 milioi euro (4.191,8 milioi guztira), eta Gipuzkoakoak 189,7 milioi euro (3.354,7 milioi euro guztira) igo ziren.

"Produktu ez-energetikoak" partidaren inportazioa % 8,0 igo da, baina "Produktu energetikoen" partidarena % 23,3 jaitsi da.

Euskal AEko ondasunen kanpo-merkataritzak, 2025eko urtarriletik uztailera, 2.360 milioi euroko saldo positiboa izan du, eta estaldura-tasa % 114,7 izatera heldu da.

Informazio gehiago:

Eustat - Euskal Estatistika Erakundea / Instituto Vasco de Estadística
Donostia kalea, 1 01010 Vitoria-Gasteiz
Prentsa Zerbitzua: servicioprensa@eustat.eus Tel.: 945 01 75 62